1 Hichun Joseph ana tohkhompi ho masanga ama le ama akitim jou tapon hichun awthong jejun akaptan, mijouse hikoma konin asoldoh in ama asopi ho lah a akiphong doh tan ahi. ✡Act 7:13 2 Chuin ama hatah in akaptan ahile Egypt miten jong aja uvin, chule hiche thu kisei chu apet petin Pharaoh in ajatan ahi. 3 Joseph asopi ho kom a aseiyin “keima Joseph chu kahi! kapa chu dam nalai hinam?” ati, Hinlah asopiho imacha seithei louvin aum taovin ahi! Amasang uva ding Joseph ahi ahin hetdoh u chun alung kidang lheh jengun ahi. 4 Hung kikhin naijun ati, amapan hichun ama hon anai lut un, chuin ama aki phongdoh kit in “Keima hi Joseph kahi,” ati, na sopiu soh chang dinga Egypt gam'a najoh pa'u chu kahi ati. 5 Ahin nang hon nopmo sahih un, chule keima hilaimun a neijohdoh jeh uva nangho le nangho kilunghan jong bolhih un, ajehchu nangho hinkho huhdohna dinga Pathenin hilai mun a hi eina sol masahjoh ahibouve ati. 6 Hiche gamsung a hi kum ni bou kel hah hung kipan bep ahin, ahung lhung ding kum nga sunga chang um talou ding ahiye. 7 Pathenin nangho huh doh dinga eina sol masat joh ahi, nangho le na insung mite thilouva leichunga achi aman na lou ding ahi. 8 Hiche chu nanghon na bol ahipon, Pathenin eina masol joh ahi, chule Pathenin Pharaoh hithei ding ama lenggam ma Egypt gamsung a semang a pang ka hitai. 9 “Tun gangtah in kino uvin lang kapa gaseipeh loiyun lang nachapa Joseph aseiye: 'Pathenin Egypt gamsunga vaipo alen pennin eipansah tai. Hijeh chun kakom a hungsuh loiyin! ✡Act 7:14 10 Keima toh kinai cha a nachate le natute jouse, na gancha ho le nanei nagou jouseu pumma Goshem gamsunga na chen theiyu ahi. 11 Hikoma chu keiman kavetsui diu ahi, ijeh inem itile kel lhah na ding hi kum nga jen aum nalaiye, achuti louva ahile na insung pumpiu leh na gancha ho jouseuvin an angol diu ahi. 12 Hichun Joseph in athusei ajom in “Veuvin nangho che un, ka sopipa Benjamin neiven keima Joseph ka hi ati. 13 Cheuvin lang kapa Jacob chu gasei peh loi un, mun phatah hiche Egypt gamsunga kanei uve, chule amachu thil namu jouse seipeh un, chule aganna thei chan in hilanga hinpui jun ati. 14 Hichun Joseph in Benjamin chu angong koiyin akap tai, chuti ma chun Benjamin in jong akoiyin akap tai. 15 Joseph in asopi ho chengse chu akoiyin akap tai, chule asopite hon lungthoi na um louvin aki houlimpi tauve. 16 Joseph sopi ho ahung lhung tauve tithu chu Pharaoh le a insung miten jong aja tauve, chule amahno jong akipa pi lheh un ahi. 17 Hichun Pharaoh in Joseph koma aseiyin, “Na sopi ho chu seipeh in gangtah in na sangan chung uva napot hou chu hengdoh unlang gangtah in Canaan gama ki nungle loiyun,” ati. 18 Chule napa ahin adang insung mite jouse keima koma hinle pui loiyun Egypt gamsunga aphapen kapeh diu nahi; chule agam ga soh ahoipen na neh diu ahi ati. 19 Hichun Pharaoh in Joseph koma asei in, “Na sopiho chu seipeh tan amahon kangtalai chu kipuiyu hen lang chapang ho le a jiteho'u chule napa'u chu ka henga hinpui jun. 20 Nanghon nathil neihou chu lunggim pi da taovin, ajeh chu Egypt gamsunga ahoipen aphapen jouse nang ho a ahitai.” 21 Hichun Israel chaten amaho thu kisei peh bang chun abol'un, Joseph in jong kangtalai ho chu agontup peh in Pharaoh in aphatsah le athupeh dungjui in, chule lampi kah a neh le chah ding jong agontup peh in ahi. 22 Chule aman asopiho chu vonthah apecheh in, Benjamin vang chu golvah von nga chule dangka sum eng jathum toh apen ahi. 23 Joseph in apa din sangan chal ho poh thei Egypt gamsunga atwi aphapen ho jouse athot in chule sangan anu som dimset changlhah apohsah in lampi kah a akihinso thei na dingu ahi. 24 Hichun Joseph in asopiho chu alha doh in, amaho akipatdoh ding kon un, Joseph in amaho chu availhah in “Lampi najot lai un nangho kina pa hih un,” ati. 25 Chuin amahon Egypt chu adalha uvin Canaan gam lang apa Jacob kom anung lhun kit tauve. 26 Amahon apao chu aseipeh un hitin atiuve, “Joseph chu ana hing nalaiyin, chule Egypt gam pumpia vaipoa khu ama hijah ahiye,” atiuve. Ahinah vang chun Jacob in la amaho a tahsan loujeh in alungthim akiloh dehpoi. 27 Ahin amahon Joseph thusei chu avel vel in apao chu a seipeh un, chule Joseph in apa poh na dinga kangtalai chu agah ven amuphat in apao Jacob lhagao chu akidodoh kit tai. 28 Hichun Israel in aphong doh tai, “Keima kanomtai adih ahitai, Joseph hi ahing mong nai ka hinkho abei masang in kaga kimupi ding ahi,” ati.