1 Thusoh hichengse kichai nung phat chomkhat jouvin, “Napa chu alhasuh lheh jeng tai” tia Joseph ahung seipeh uleh; Joseph chu apa kimupi din achen acha teni Ephraim le Manasseh jong akipuiyin ahi. 2 Chuin Jacob chu aseipeh un, “Ven nachapa Joseph chun nangma kom ahinjon e.” Hichun Jacob atha ahung kido in alupna apat in athou doh in atoutai. 3 Hichun Jacob in Joseph chu ahoulimpin, “Pathen hatchungnung in Luz mun'a Canaan gam'a eiki mupi chun phatthei eiboh e. ✡Semtilbu 28:13,14 4 Aman kakom'a ana seiyin, 'Ven nangma ka chiphat sah ding chule kapun sah ding chujongle nangma chilhah tamtah a kasem doh ding nahi. Na chilhah te chu Canaan gam hi amaho nei le gou dia atonsot a kapeh ding ahitai,' tin eihoulimpi e. 5 “Keima hung lhun masanga Egypt gamsunga nacha teni Manasseh le Ephraim hi keima a hi ding ahi. Reuben le Simeon keija ahi tobanga hi amani jong hi keiya ahi lhon'e. 6 Hinlah chapang naosen tu khonunga peng ho vang nangma a hi ding ahitai, chule amaho se chu asopi ho goulo min lah a kisimtha ding ahi lhon e. 7 Phatkhat lai chun, keima Paddan-aram lama kahung kinunglen Rachel chu Canaan gam'a athi tai. Keima ho Ephrath toh kikah gamla thim lheh nalaiyin lungkham tah in Rachel chu Ephrath (chehi Bethleham ahi) lampi pam a kahin vuitai.” ✡Semtilbu 35:16-19 8 Hichun Jacob in chapang teni chu aven “Hiche teni hi nangma chapa ham?” ati. 9 Joseph in adonbut in “Heng'e,” “Hiche chapa teni hi Pathen'in Egypt gamsunga eipeh ahi.” Jacob in adonbut in “Amani chu keima kom'a hinpui nai uvin, phatthei kaboh ding ahi.” 10 Jacob chu akum atam phat in amittha jong alhasam lheh jeng tai. Ajeh chu aha muchen jou tapoi; hichun Joseph in acha teni chu apa kom Jacob nai deuvin ahin puijin chuin apan amani chu achop in akoiyin ahi. 11 Chuin Jacob in Joseph kom'a aseiyin, “Keiman nangma maichang mukit dinga hi kana kiginchat lou ahitai, ahin tuhin Pathen'in nacha teni jong eimusah tai!” ati. 12 Hichun Joseph in acha teni chu apa khup a kon'in akhindoh in amai in tollang angan abohkhup tai. 13 Chuin acha teni chu Jacob masanga agoltoh e. Akhut jet lamin Ephraim chu Jacob khut veilama chun akailut peh in, chule aveilam in Manasseh chu Jacob jetlam a akailut e. 14 Ahin Jacob in akhut apenton aluchung lhon'a akhut angamtai. Aneojo hijongleh akhut jetlam chu Ephraim achunga angam tan, chule apeng masa ahivangin Israel in akhut veilam chu Manasseh chunga angam tan ahi. 15 Hichun Joseph phatthei aboh in hitin aseiye, “Ka Pathen kapu Abraham kapa Isaac masanga lamkai jingpa ka Pakai kelngoi chinga hung pang jing ka hinkho pumpi tuni geiya eipui hoipa; 16 Thil gilou tinchenga konna eina lhatdoh jing vantil chun chapang teni hi phatthei hin boh hen; chule amani chunga hin keima min le kapu Abraham min, kapa Isaac min hung kihedoh jing jeng hen; chujongleh amani hi leiset vaipi jalah a mipi atama tam in hung pung lhon hen,” ati. 17 Ahin Joseph chu apan akhut jetlam Ephraim chunga angap jeh chun alung lhaimo lheh jenge. Ahin Joseph in apa khut chu atuh in ajetlam chu Manasseh chunga angap sah in, akhut veilam chu Ephraim chunga angap sah tai. 18 “Ahipoi, Hepa,” ati. “Amapa joh hi apeng masapa ahi. Na jetlam chu Manasseh chunga hin ngamin.” 19 Amavang apa Israel anompoi, “Ka henai, ka chapa; kanai.” tin adonbut e. Manasseh jong nam len hung hintin, ahin anaopa ama sanga hung lenjo ding ahi. Chule ama chilhah ho chu nam tamtah hung hi diu ahi.” 20 Hichun Jacob in chapang teni chu hiche phattheina toh aboh in: “Israel miten phatthei akiboh teng ule namin hi apat diu ahi. 'Pathen'in nangma hi Ephraim le Manasseh bangin na lolhinsah hen,'” ati diu ahi. Hiti chun, Jacob in Ephraim chu Manasseh masanga akoi tan ahi. ✡Heb 11:21 21 Hichun Jacob in Joseph kom'a aseitai, “Ven keima kathina ding anaitai, ahin Pathen'in naumpi intin, chule Canaan a napu napate gam'a nanung puikit ding ahi. 22 Chule hiche kal a chu nasopi te ho kapeh sanga lenjo ka chemjam le ka thalpi a Amor mite gam kalah chu kapeh nahi,” ati.