HABAKKUK
THEMGAO LEKHABU
Habakkuk Themgao Lekhabu Sung Thu
Habakkuk hin Pathen thudoh hahsa tah chu ana dong in, hichu themgao lekhabu dang tobang loubeh hiche lekhabu hi ahin sundoh theijin ahi. Chule Habakkuk hin Pathen adohna le Pathen in Habakkuk adonbutna hohi themgaopa hin ana jih ahi.
Habakkuk in thumvei Pathen kom’a thu anasei in, hiche lekhabu hi hop thum’a hopkhen thei asodoh in ahi. Amasa bung-2 sunga hin themgao Habakkuk in Pathen thudoh nivei abol’in chule ajona pen in, bung-3 sunga Pathen thangvahna taona thudol ajihlut in ahi. Aman, Pathen in amite chonsetna avetthim hi oimona anei in, hinlah Pathen in amite chonsetna jeh chun, Babylonte hunguva Jerusalem soh’a ahung puimang diu thudol aseipeh in ahi.
Hinlah amite sanga chonse khohse cheh Babylonte chu iti dana gimbolna beija akoi ding ham, ti thudol adohnaa chun—Babylonte chu gimbolna thoh louva akoilou ding thua, athudoh chu donbutna aneijin ahi.
Lekhabu Jihpa Chule Ajih Kum
Hiche lekhabu hi Habakkuk themgao in Judah namsung Pathen’a kon agamlat pettah-u, chule Babylon ten Jerusalem ahung lah masang jep-uva anajih ahi. Hichu 610-605 BC vel-a anajih ahi.
Hiche Phat Laiya Thilsoh Umdol
Hiche phatlai hin, Judah phung sunga chonset ana hoise lheh in, milim houna’a achateu maicham thilto in ana tohdoh jiuvin ahi. Pathen hing leh dihtah chu ana hepha tapouve! Judahte lengpa gilou tah Jehoiakim chun Pathen themgao ho thusei angailou goh hilouvin, aman themgao ho lekhajih jong meiyin ahal in, chule atha jong ana um'in ahi.
1
Themgao Thudohna
1 Hiche hi Habakkuk themgaovin thilmu aneina thudol ahi. 2 Vo PAKAI, itihchan geija panpi ngaichaa kakou kou di hitam? Hinla nangin nei ngaipeh poi! “Muntina nosopma kibolna aum tai!” Ka kap in, hinla eipanhu dingin na hungpoi. 3 Hiche gitlou kibol hohi kavet vet jing ding hitam? Hiche gim gentheina ho jouse hi ibol’a kavet vet jeng ding ham? Keiman kavet chanin mahthahna le nosopma kibolna hobou ka mudoh’e. Mi nelkal hat ho leh kinahpia hat mihonpi chun eihin umkimvel tauve. 4 Dan hi donlou tobangbep chu ahitai, chule thutanna munho’a jong thudih umtalou ahi. Migilou ho chun midih ho sanga gamchenga atamjoh jeh-uvin, thudih chu heikoija um bepma ahitai.
Pakai akon donbutna
5 Pakai chun adonbut in, “Chitin namtin ho khu gahven chuleh kidangsa temin! Ajeh chu keiman nangma nikho laiya hi thilkhat kahin boldoh ding, mi koiham khattouvin seijongleh na tahsan louhel ding chu kahinbol ding ahije. ✡ Act 13:41 6 Keiman Babylon mite ho, giloutah le nosopma mibol ho chu ka hin tundoh ding ahi. Amahon vannoi muntin apaltan’uva kijotle ding’u chule gam dang tampi ahinjo dingu ahi. ✡ 2 Lengte 24:2 7 Amaho hi gitlou abol nauva engsetah’a chonna ahiuvin, chutia abolnom chengseu chu abol’u ahi. 8 Sakol aneihou jong lutnu sangin alhai hatjouvin, khomu chipchep a ngeihon lhakhom sangin jong ahoise jouve. Sakol kangtalaija touho chun gamlataha konin a sakol ho’u chu ahin thunun jeng uvin; Muvanlai lengle hon a anchah’u abokhumuva avallhum jiu kisei tobang ahiuve. 9 Oh, ahung tauve, abonchauvin nosopma boldin akunsuh tauve. A gancha hon hou jong chu nelphaija hui bangin ahung kitol’un, amasanguva asohchang ho’u ahin masot hou chu neldi tamin atam jeng uvin ahi . 10 Amahon leng ho le leng chapate ho chu isahlou tah'in abolun, chule akulpi ho jouse chu isah loutahin aboluve. 11 Amaho chu hui nung bangin akitolun chule achemang tauve. Hinla amaho sungil’a themona nei ahiuve, athahat uchu pathena nei ahiuve.” 12 Vo Pakai ka Pathen, nangma tonsotna um, ka Mithengpa Nangman nei theh manghel jeng hih nauvin nate na? Vo Pakai, ka Songpiu, nangman hiche Babylon mite hi eisudih dinguleh ka chonsetna ho’u atam jeh'a ei-gimbol dinguva na hinsol ahi. 13 Nangma hila athenga nahin chule agilou chu n maikoh a umtheilou ahi. Chuti ahileh amaho do’ha joulhepna namitsat ding hijaham? Mi engsete chun asanguva chonphajo avallhumu jongleh thipbeh a naum ding hitam? 14 Keiho hi ahinga kimandoh dinga le akithat dinga kiman ho tobangbep kahiuvem? Kei ho hi twikhanglen na um ganhing ho lamkai bei tobangbep ka hiuvem? 15 Amaho kipanaa le golnop bolna dinguva, ngakoija eiki khaidoh dinga chuleh lensunga ohden bep ding bou kahi dingu hitam? 16 Chuteng leh amahon lenthang anei hou chu Pathen tobang'in houvun tin, chuleh amasanguva chun gimnamtwi halna nei uvinte. Amaho chun, “Hiche lenthang pathen hohin keiho eihaodoh sah’u ahi” ati ding’u ahi. 17 Nangman ama ho hi hiti dinmuna hi nasolmangpai pai ding ham? Amaho hi phottohna beihella agaljouva hi i-tiha maipah jing dingu hitam?
DRAFT COPY