HEBREW
MITE HENGA
LEKHA THOT
Yeshua toh tekahpi ding umlou ahi
Aman nangdin lampi khat nasempeh'e; Juiyin–itobang hahsatna hijongleh
Hebrew lekhabu sung thu umdan
Hahsatna phat tampi itoh jiuvin, hitobang chun eihin lhunkhum teng ule thilkhat chu bangkhaiyin iumsah ji tauvin ahi. Hiche hoa kon'a chu itilam dol'a ikisinsahpi jou ding ham, ti avel'in geldoh ute. Hebrew lekhabu hi hitobang dinmun chu ahin, adeh'a Yeshua nungjui Jewste chun atahsan jalun hitobang chu atoh jom jing tauvin ahi. Hinlah Yeshua chu thildang imatoh akitekah theipon, koima tohjong akitekah theipoi—Vantil ho sanga chungnungjo, Mose, Joshua, Aaron, Melchizedek ho sanga chungnungjo ahi. Ipi dinmun hijongleh Yeshua kal-a manlu ding dang aumpoi, ti muchet ahi. Ajihpa hin kijom in Thulhunlui dan le bih chule Thulhun thah a tahsan'a hin ding dan tekahna apen ahi. Hijehchun hiche dinmun toh kisaijin Jewste chu thulhunlui lam avel-a asutlou uva kitepna thah lam mano ding'in ajih in ahi. Itobang dinmun hijongleh Yeshua kalval aumpoi tihi—Hebrew lekhabua kon muchet ahi.
Lekhathot jihpa chule ajih kum
Hebrew lekhabu jihpa thua hin thudoh aum jing in ahi. Hinlah donbutna hi-koi jih ahi, akicheh poi. Mi tampi mudan in Solchah Paul jih ahi atiuvin, ahin akiloipi Jewste lah'a Barnabas, Apollos le Priscilla khat pen hiding in jong ginmo ahi. Lekhajol aluiho mudoh akon in numeiyin ajih hidin jong ginchat aumin, ahin koipentah ham kihejoulou ahitai.
Akijih kum hi Nero lengpa vaihopna noiya tahsan chate suhgentheiya aum hichu, Peter le Paul martyr chanjou AD 60 jou vellah hidin ginchat ahi.
Koi henga ajih ham?
Christa jal'a bolgimna thoh Judate dinga kijih ahi. Bolgimnan alhun khum'u dinmun laitah'a Thulhunlui juiya Christa atahsan nau ajamsan nalou diuva kijih ahi. Hebrew lekhabu hin athahbeh in Christa tahsan jal-a hinkho phal ngamna thun, tilkhouna aneiyin ahi.
1
Pathen in achapan thu aseitai
1 Masanglai chun Pathen in tamtahvei chule gotchom chomin ipu ipateu henga themgao hoa konin thu anaseiye. 2 Chule tuphat nunung pena hin Aman eiho henga Achapa a konin thu ahinseitai. Pathen in Chapa chu ijakai goulo dinga athutep sa ahin chule Chapa a kona vannoi pumpihi anasem ahi. 3 Chapa chun Pathen loupina vah akilahdoh sah in, chule Pathen chondan dihtah chu aphongdoh tan ahi, chule Aman athupeh thahattah jal'a ijakai atuhchah ahi. Aman ichonsetnauva kona eisilngim jouvu phat chun, Ama jabolna mun Pathen jetlam'a atouvin, Van mun'a loupitah in atoutai. 4 Hichun avetsah chu, Pathen in apeh min chu amaho minsanga chungnungjo ahi tobanga chu, Chapa chu vantil ho sanga gamchenga chungnungjo ahi.
Pathen chapa vantil ho sangin achungnung joi
5 Ajeh iham itileh Pathen in Yeshua koma asei chu vantil ho khatpen komah, “Nangma kachapa nahi, tunia hi keima napa kahung hi ahitai,” tin aseidoh khapoi, Chule Pathen in, “Keima Apa hingting, chule Ama kachapa hiding ahi,” tin aseikit in ahi.✡Labu 2:7; 2 Samuel 7:14; 1 Thusimbu 17:13 6 Chule Aman achapa chungnungpen chu vannoiya ahinpui chun, Pathen in, “Pathen vantil ho jousen Ama houcheh un.”✡Danbu Ni Na 32:43 7 Vantil ho thudola Aman aseijin, “Aman avantilte chu hui bangin asoldoh in, asohte chu meikongto abahsah e,” ati.✡Labu 104:4 8 Hinlah aman Chapa jah a, “Vo Pathen, nalaltouna chu atonsot tonsot'in aum jinge, nangman leng tenggola thutah'in vai napon ahi.✡Labu 45:6,7 9 Nangman thutandih nadeijin, chule aphalou nahotbol e. Hijeh a chu vo Pathen, na Pathen in thaonanua, kipana thao chu midang chung sanga nachunga asunlhah ahitai,” ati. 10 Aman Chapa jah a aseikit in, “Vo Pakai, atil in, nangman leiset bulhi nanaphutdoh in, chule van hohi nakhuttah a nasem ahi.✡Labu 102:25-27 11 Hiche hohi mangthah diu, hinlah Nangma aitih a umjing ding nahi. Hiche hohi ponbanga chul lhaloi dingu ahi. 12 Nangman hicheho hi pon kijeltum banga najeltum ding, ponlui banga napaidoh ding ahi. Hinla nangma angai chu nahi jingin; nangma aitih a nahin jing ding ahi,” ati. 13 Chule Pathen chun vantil ho khatpen koma, “Namelmate kasuhnema nakengphang noiya kakoi masangsen, kakhut jetlam jabolna a touvin,” tin aseikhapoi.✡Labu 110:1 14 Hijeh chun vantil ho hi lhachabou ahiuvin-huhhingna gouloding ho kinbol dinga kisoldoh lhagaoho ahibouvui.
DRAFT COPY