1 Hiche nam ho hi Canaan mite kisatna a ana pang khalou, Israel te patepna dinga Pakaijin gamsunga ana dalhah ho chu ahi. 2 Aman hiche hi galsatje hekhalou lai Israel khangthah ho galsatje akithem chuhna diuva abol ahi. 3 Hiche nam ho chu Philistine te (Phillistine vaipo nga ho noiya cheng ho chu ahiuve), Canaan mite jouse, Sidon mite chule Baal-hermon mol apat Lebo-hamath chan geiya kijam lhungpeh Lebanon mol chunga cheng Hiv mite ahiuve. 4 Pakaijin Mose mangchan apu apateu thupeh anapeh ho chu, Israel mite hin anit uham anitlou uham ti hetna dinga hiche mipite ho hi ana dalhah ahi.

5 Hiti chun Israel tehi Canaan mite, Hit mite, Amor mite, Periz mite, Hiv mite chuleh Jebus mite lah a cheng ahiuvin, 6 chuleh amaho toh akicheng touvin, Israel chapa ten amaho chanu te ho akichenpi uvin, chule Israel chanu te chu amaho chapa te toh kicheng dingin ana peuvin ahi. Hiti chun Israel ten amaho pathen ho chu ajenle tauve.

7 Israel ten Pakai mitmun thilse jeng ana bol tauvin, ama hon a Pakai, a Pathen uchu asumil tauvin, chule ama hon Baal leh Asherah milim semthu ho chu jenle in ana pang tauvin ahi. 8 Hijeh chun Pakai chu Israel dounan alunghang lheh jeng tan, hijeh chun Aram-naharaim lengpa Cushan-rishathaim khut ah ana pedohtan, chuin Israel ten kumget sungin Cushan-rishathaim sohna ana tongun ahi.

9 Hinlah Israel mite chu Pakai kom'a panpi ngaichan ana kap tauvin ahileh, Pakaijin amaho huhdoh dingin mikhat ana tungdoh in, ama chu Caleb naopa Kenaz chapa Othniel ahi. 10 Pakai Lhagao chu achunga ahung chun hiti chun ama Israel te thutan vaihom’in ahung pangtan, chuin Othniel chu Aram lengpa Cushan-rishathaim chunga galbol din ahung kipan tan ahileh Pakaijin gal ana josah tan ahi. 11 Hijeh chun kum somli gamsunga chamna ana um in, chujouvin Kenaz chapa Othniel chu ana thitan ahi.

12 Avelin Israel ten Pakai mitmun thilse jeng ana bolkit tauvin ahileh, hitobanga athilse bol jeh uhin Pakaijin Moab lengpa Eglon chu Israel te chungah ana vaihom sahtan ahi. 13 Eglon’in Ammon mite leh Amalek mite chu ana kiloikhompin, hiti chun ana kon'un Israel te chu anajou tauvin Lusu khopi tia kihe Jericho khopi chu ana toupha tauvin ahi. 14 Hiti chun Israel ten Moab lengpa Eglon noiya kum som le get sungin sohna ana tong’un ahi.

15 Ahinlah Israel te chu panpi ngaichat nan Pakai kom'a ana kapjah jeng tauvin ahileh, Pakaijin amaho huhdoh dingin mikhat ahin tungdoh kit in, ama min chu Gera chapa Ehud ahi. Benjamin phunga konna khut-veicha pa chu anahi. Israel ten Moab lengpa Eglon kom'a kai apeh diu chu Ehud agathah sah un ahi. 16 Hiti chun Ehud in tongkhat a sao, alangtoa hem chemkhat ajetlam mal’ah ajeplut in pon akhu khum’in ahi. 17 Aman mithao tah Eglon kom'a chun kai peh ding sum chu ahin pon ahungin ahi.

18 Athilpeh chu apehchai phat in Ehud chu ache khompi cheng chutoh inlang che dingin ahung kipatdoh tauvin ahi. 19 Hinlah Ehud chu Gilgal kom'a song milim kisem kom ahunglhun phat in ahung kileheijin, Eglon kom'a chun ahungin, “Keiman thuguh seiding khat kaneiye” ati.

Hijeh chun lengpan ama lhachaho kom'a chun, “Thipbeh un” atin, amaho chu a indan sunga kon chun asoldoh tan ahi.

20 Ehud chu a inchung dan a dap heova achangseh a tou Eglon kom'a chun achelut in Eglon kom'a chun, “Keiman Pathen a kon'in nang dinga thuthot khat kahinpoi ati.” Hitia chu Eglon lengpa chu atouna a konna adindoh chun, 21 Ehud in avei langin amal jetlam'a aje achem chu asatdoh in, lengpa oi achun aphut luttan ahi. 22 Chem chu alutthuh jeh in lengpa a-oi thao lah a chun achem kungjong chu alhum heltan ahi. Hijeh chun Ehud in chem chu anung loidoh tapon, chule amaha a kon chun lengpa eh jong ahungdoh leu tan ahi. 23 Hiche jou chun Ehud in hiche indan kot ho chu akam sohkeiyin kanglong aheh khum in, ehbuh langa achomlhan ajamdoh tai.

24 Ehud achedoh jouphat chun lengpa lhacha ho chu ahung kinung leuvin ahileh, inchung dan kot jouse chu ana kikam sohkei chu agamu tauvin, ama hon insung dan a chu eh athah hi dingin agelun ahi. 25 Hijeh chun chomkhat set angah un, ahinlah phat sotthim tah anga vangun lengpa chu ahungdoh deh tapon, hichun atija uvin akot-heh chu agala tauvin ahileh, ama hon kot chu ahon phat un, apupau chu athisa lhonga kijam aga mudoh tauvin ahi.

26 Lhacha ho chu ageisangle kah uchun Ehud chu ajamdoh in song milim kisem lam chu ahopa in Seirah lam'ah ajamdoh tan ahi. 27 Ama Ephraim thinglhang gam alhun phat in Ehud chun gal konna ding sumkon amut tan, hichun Israel mi honkhat chu thinglhanga kon'in apuisuh in

28 “Neijuiyun,” ati, “Ajeh chu nagal miho Moab mite chunga hi Pakaijin galjona napeh u ahitai,” ati. Hijeh chun ama hon ajuiyun, Moab a konna Jordan vadung galkaina palmun jouse chu atoupha uvin koimacha agal kaisah pouvin ahi.

29 Sma hon Moab mite chu akisatpi uvin amaho lah a ahat pen ho leh galsat themcheh ho khatcha jong sohcha louhel in, mihem 10,000 athat un ahi. 30 Hiti chun Israel ten Moab te chu ana jouvun gamsunga chun kum somget jen chamna ana um'in ahi.

31 Ehud nungin Anath chapa Shamgar chun Israel te ana huhdoh in, aman bongchal khagu mangcha in khatvei chu Phillistine te mi 600 ana that in ahi.