Mose Lekhabu Thumna
THEMPU DAN
Thempu dan sung thu umdan
Israel mite chu kum jakhat lam soh ahinau hephalou khop in ana um uvin, Pathen'in amaho leh amaho akivaipoh uva anam sung’u akhan lhitsah diu chu adeisah ahi. Pathen'in Israel mite chu gamthip noiya apuilen hicheng hi thu apeuvin; adih a hinkho amanna diu, adamtheina diu, insung kingailutna, athenga sumkol veina chule adang phabep apen ahi. Thempu Dan hi tulai phat toh kikal chondan bangin aumin, ahinlah hiche hi Pathen toh kiguijopna dihtah ahi. Ajeh chu Pathen athen banga thenna hinkho athupi dan gelpuma sim sim ding, chule hiche lekhabu hin Pathen adia thil dih ho ahilchen in, Pathen angsunga kineosah leh Ama toh kinaina naneibe ding ahi. Ajeh chu Pathen'in hiti hin aseiye: “Keima ka then bangin nangho jong theng un ati,” (19:2).
Pathen'in chonse ihinauva konna chamlhat ihi diu adeisah in, chule mimal hinkhoa Pathen toh kiguijop ding hi kicheh tah a na mudoh ding ahi. Pathen lam kat a, Ama jenga hin ding mong ahi, tijong na hetna kibelap ding ahi.
Lekhabu jihpa, akijih kum chule akijih lona
Thempu Dan hi Mose’n 1440 BC vel'a anajih ahi.
Pathen'in Israel mite chu akiloi khomnau leh ahou dan ho uva konna, kihilthemna anei theina diu chu adeisah ahi. Pathen leh amaho jouse kah a cham leh lungmon aum ding chu ahi.
Mose’n Israel mite chu Egypt gam'a kon'in gamthip lah a apuilut in, kenglama achejing laiyun Mt. Sinai mun'a Pathen houna dingin Houbuh khat atungdoh uvin ahi. Hiche lai dinmun hin ama hon midanga kon kilamhilna; thungaina, kimanchahna lampi hoa amacham uvin ache thei pouve. Ama hon Gamtepna mun jotna dia thupeh anga jing lai un, Pathen'in hiche Thempu Dan akon kimu, kilamhilna ho jouse hi ana peh ahin, hichea konna hi Israel nampi kibulphuna leh kikhanlhitna um ding ahi.
1
Pumgo thilto maicham
1 Pakaiyin Mose chu Houbuh a kon'in akouvin, ajah a hiti hin aseipeh tai. 2 Hiche thupeh chengse hi Israel te hengah seipeh in. Nang hon Pathen henga pumgo thilto nabol tengu leh, bong hon ahilouleh kelcha hon chule kelngoi hon lah a konna nato jeng thei diu ahi. 3 Nangman gancha nato ding chu pumgo thilto ding gancha akul sunga pat hi ding, nolnabei thilto hi ding hichu Pathen'in asan theina dinga Houbuh kotphunga todoh ding ahi. 4 Hiche gancha pumgo thilto chu aluchunga nakhut ngamlhan, chuteng kithoidamna dia hiche thilto chu Pakaiya dia santhei dol hi ding ahi. 5 Chutengleh Pakai Pathen masanga bongchal nou natha ding chule Aaron chapate leh thempu hon gancha thisan chu Houbuh maiya maicham akimvel jousea athe khum diu ahi. 6 Chutengleh gancha chu avun nalip ding abong bonga nasat chen ding ahi. 7 Hitia chu Aaron chapa te thempu hon maicham chunga mei atikong diu, meikong chunga chu thing alom loma akoi diu ahi. 8 Ama hon maicham kitonaa sa kisem ho chu, aluchang leh athao ho chu maicham chung meikou lah a chu aban bana akoi diu ahi. 9 Amavang sasung jouse leh akeng ho jouse amasapen a twiya soplhah ngimsel ding, hiche teng chule thempu pan pumgo thilto maicham chung meiya ahalvam ding, hichu Pakai, Pathen adia namtui tah thilto hi ding ahi. 10 Nangman pumgo thilto dinga gancha hon lah akon napeh teng, kelngoi ahilouleh kelcha hi ding; amavang hichu achal hitei ding chule nolna beihel hi ding ahi. 11 Chuteng gancha chu maicham chunglama natha ding, Pakai angsunga Aaron thempu leh achapate hon, gancha thisan chu maicham phung aningli chunga achap kimvel soh diu ahi. 12 Hiche teng chule thempu pan gancha maicham chu atum tum, alhang lhanga asat khen ding, aluchang leh athao jouse pumgo thilto maicham mei konga ahalvam ding ahi. 13 Ahinla sasung jouse chule akeng jouse chu amasa tah a twiya asop theng ding ahi. Hiche teng chule thempu pan pumgo maicham pumpia maicham phung meiya ahalvam soh ding, hichu thil manlutah kipe, Pakaiya dia gimnamtui kihalvam ahi. 14 Nangman Pakaiya pumgo maicham’a vacha napeh le, nalhen kah ding vakhu ahilou le vapal napeh ding ahi. 15 Hiche teng chule thempu pan vapal leh vakhu ham chu maicham phunga akoi ding, chuteng aluchang chu maicham phung chunga atan lhah ding, thempupan amasapen a hiche thisan jouse chu maicham aning gol jousea achap khum ding ahi. 16 Chule thempu pan achang-oi le amul jouse apaimang ding, niso lam maicham phung meivam lah a ase lhah ding ahi. 17 Chuteng thempu pan vapal lhaving tenia amat a abojal ding; asat tel louhel ding chule maicham chunga meiya ahalvam ding, hichu pumgo maicham, gimnamtui Pakai adia kikatdoh ahi.
DRAFT COPY