1 Dan toh kitoh louva Pakai angsunga thilto anabol lhon jal'a, thina chang Aaron chapa teni thi nungin Pakaiyin Mose henga hiti hin aseipeh in ahi. 2 Pakaiyin Mose henga hiti hin asei tan, “Na sopipa Aaron chu gihgah tan, pondal kidalna Muntheng Chungnung ponsal sungnung a khu achamin lut louding, hichu ahilouleh thi jeng thei ahi. Ajeh chu hichea ngailut hepi touna chunga khu keima meiloma kilahji kahi.” ✡Heb 6:19 3 Aaron vang hiche munthenga hi lut theia, chonset thilto dinga bongchal gol khat leh kelngoi chal khat jaonaa ahin kai ding ahi. ✡Heb 9:7 4 Chule tupat ponnema kikhui sangkhol chol len chu aki ah ding, tupat ponnem a kikhui toka chol jong akichen a, chule tupat ponnem a kikhui chalchep konggah a chu akong akigah a, tupat a kikhong delkop jong akop ding, hichengse hi von lah a atheng ahin, hijeh chun thempu pan jong hiche von ho chu akivon theina dinga atahsa pumpi twiya kisil thengsel ding ahi. 5 Chule Israel chate khoppi apat chu kelchal nou nitah, pumgo thiltoa to dinga kelchal khat ma akimat ding ahi. 6 Aaron in jong atumbeh a ama dinga bongchal khat atodoh ding, hitia chu ama ding leh a insung mite dinga kithoidamna anei masat ding ahi. 7 Chule Aaron in jong kelchal teni chu akai ding, kikhop khomna ponbuh kotbul Pathen angsunga chu adinsah a, 8 Aman Pakaiya thilto dia khen ding pen leh Azazel gamthip noiya mipi chonset pomang dia todoh ding pen chu alhen khen ding ahi. 9 Chule Aaron in jong Pakaiya dia phun, achunga phunchan chuhna kelcha chu akai ding, chonset thiltoa atodoh ding ahi. 10 Hitobanga chu Azazel chan ding phun pha, achunga phunchan chuhna kelcha chu kithoidamna dinga ahing laiya todoh ding, hichu Azazel chan dinga gamlah a ahinga lha mang ding ahi. 11 Aaron in jong ama tah chonset thilto dinga bongchal chu atodoh ding, hiche bongchal chu ama chonset thilto dinga akitha ding ahi. 12 Chule Aaron in jong Pakai angsung maicham phunga pat, meiam kong khat dim hichu gimnamtui lhutna ding, chule hoitah a kisemsa gimnamtui khut dimni ahamdoh a, hichu pondal kikhai kal lama chu apohlut ding ahi. 13 Hitia chu Pakai angsunga meikong lah a gimnamtui chu alelhah ding, chule hettohsahna dinga kido ngailut hepi touna chu gimnamtui kilhutna meikhu chun atom sohhel ding ahi. Aman hiche thupeh hohi ajuileh, thilou ding ahi. 14 Chule bongchal thisan chu themkhat alah ding, akhut junga konna ngailut hepi touna mailah a chu athe lhah ding, sagi veijen athe khum ding ahi. 15 Hiche jouteng chule mipi dinga chonset thilto kelcha chu atha ding, athisan vang chu pondal sunglam'a achoilut a, hiche kelcha thisan chu bongchal thisan kibolna bang banga chu abol ding, ngailut hepi touna chungvum chule amaiya chu athin khum ding ahi. ✡Heb 9:12 16 Hitobanga chu Israel chate aboh a aumna jouseu leh chonset a aumna uva konna muntheng pen chu asuhtheng ding, hitobanga konna hi ngahmun lailung chu atheng louva umji ahitan, suhthengna abolji ding ahi. 17 Muntheng pen suhthengna dia Aaron asung lhah a ahung potdoh kit kahsea, kikhop khomna ponbuh sunga koima um thei louding ahi. Amavang ama le a insung mite chule miho dinga thensona anei ding, 18 Chule maicham phunga pumgo thilto abola suh thengna anei ding, hichea chu bongchal thisan phabep le kelcha thisan phabep alah a, maicham ninga selki hose chu anunat ding ahi. 19 Hiche thisan chu akhut junga akhoi ding, chuteng maicham chung vum lah a chu athin khum ding ahi. Hitia hi Israel te chonset jal'a maicham asema athenso ding ahi. 20 Aaron in muntheng pen le Ponbuh chule maicham asuhtheng jou tengleh, kelchal chu atodoh ding ahi. 21 Chuteng Aaron in akhut teni kelcha chunga chu angap ding, chonset thil ho ahin, gitlouna jouse, Israel chaten doumah aboldoh jouseu aphondoh ding, kelcha chunga buhlhah peh banga abola, chuteng son umtah mikhat chun gammang lah a adellut ding ahi. 22 Hiche kelcha chun achonsetna ho jouseu chu, chenna loubeh gammang lah khat a apohmang ding ahi. 23 Chujou teng muntheng sung alut masanga, thempu von a kivon chengse chu kikhop khomna ponbuh lut a Aaron in aga puilut ding, hiche mun'a chu ahin dalhah diu ahi. ✡Ezekiel 44:19 24 Chule muntheng khat a kisil lha ding, akivonna ngai banga kivon'a hichea chu ama tah chonsetna le mipi chonset thensona dinga, pumgo thilto chu anei ding ahi. 25 Chule chonset thoidamna dia sathao jouse chu, maicham phunga agovam ding ahi. 26 Chule gammang lah a kelcha delmang pa chu, ngahmun ahung lhun kah a avon jouse akisop lhah ding, ama jeng jong kisil lha ding ahi. 27 Chonset thoidamna dia kithat bongchal le kelcha teni thisan jong chonset abeina thei dinga muntheng pena kikoisa chu ngahmun polama govam ding, avun leh asa chule agil jaonaa aboncha govam ding ahi. ✡Heb 13:11 28 Hitia chu agouvam penpen in ngahmun asung lhah kah a, aponsil jouse asop lhah ding, chuteng ngahmun laiya chu sunglha bep ding ahi. 29 Chule hiche dan hi akhang akhanga najui diu, lha sagi, nisom alhin nikho teng Israel chate chule alah uva cheng gamchom mihon an angol diu, na atoh louhel diu ahi. ✡Thempu Dan 23:26-32; Minbu 29:7-11 30 Hou thulam dola thenna aneina dingun, hiche nikhoa chu achonset nau thoidamna nei ding ahi. 31 Hiche nikho hi nikho theng ahin, anngol ding natoh jong bol louva um ding ahi. Hitia chu dan jouse hi akhang akhanga chepi ding ahi. 32 Thempupa khela dantoh kitoh a thensona changsa, Thempu Chungnung in suhthengna kin anei ding, thempu von a kivon ding, 33 Pakai chenna ponbuh chule muntheng chungnung, maicham phung chule thempu ho jouse le mipi ho chu suhthengna abolpeh ding ahi. 34 Hitia chu dan hichengse hi akhang akhanga jui ding ahi. Israel chate achonset nauva konna suhthengna thei dia, hiche kithoidamna hi kumseh a khatvei bol ding, hichu Pakai thupeh bangin Mose’n jong aboltan ahi.