1 O Yahweh Pakai, kahinkho hi nang kapetai.

2 Nang katahsan e Elohim ka Pathen! Nei jumso hihbeh in, chule kalel na a hin ka melmate kichoisang sah hihbeh in.

3 Nangma tahsan koimachan jumna ato loudiu ahi, amavang mijoulhep gojing honvang jumna ato diu ahi.

4 O Yahweh Pakai lamdih chu neihil in; kajuiding lampi chu neiko peh in.

5 Nathutah chu neihil in hichea chun neipui in ajeh chu nangmahi eihuh hinga Elohim ka Pathen chu nahi. Nilhum kei keijin nanga hin kinepna kanei jinge.

6 O Yahweh Pakai gol lui a patna neihin puinao nami khoto nale na mingailutna longlou hingeldoh in.

7 Ka khangdon lai a kachonset gitlou naho neigeldoh peh hih inlang nami ngailutna longlouva neipuina johchu galdoh in, ajeh chu nangma milungset them nahi, O Yahweh Pakai.

8 Yahweh Pakaihi apha ahin adih jengbou abol'e, aman lamdihlou vache ho jeng jong lamdih akopeh jinge.

9 Aman mi kineosah hochu lamdih a apuijin, ama dei lampi chu ahil jinge.

10 Yahweh Pakai kitepna nitjing holeh ama deipeh dungjuija chonho chu ami ngailutna longlou leh akitahna in apuihoi jinge.

11 Namin loupina dingin O Yahweh Pakai, ka chonsetna simjoulou neingai dam in.

12 Yahweh Pakai ging ho chu koi ho hiuvam? Amaho che nading lampi chu Yahweh Pakai in avetsah ding ahi.

13 Amaho chu khangtou untin achateovin jong gamsung alodingu ahi.

14 Yahweh Pakai hi ama gingjing tedinga golphapen ahin, Aman hitobang miho chu akitepna ahiljing e.

15 Kamit tenin Yahweh Pakaichu avejingin, aman kagalmite thangkol a kon in eihuhdoh jinging e.

16 Neihin ang-ngatnin lang neikho ton, ajeh chu keima kachangseh a lungthom haotah a um a kahi.

17 Kaboi na ho akhoh se cheh un. Oh hichehoa konhin neihuhdoh in.

18 Kalung gimnahi neihet pehin chuleh kahah satna hohi neivet peh inlang kachonset naho ngaidam in.

19 Ven galmi ijat mong kanei hitam chule ama hohin ichan geija eihotnu hitam!

20 Neivengbit in! amaho akona hin kahinkho huhdoh in! nangma a kisel kahi neijumso hihbeh in.

21 Kitah nale thenna in eivengbit hen ajeh chu nanga hin kakinepna aum jinge.

22 Vo Elohim Pathen Israelte hi aboi najouseu va kon in lhatdoh tan.