78
Israel Te Thusim.
Asaph labol.
1 O kamite ho, ka thuhil hi ngaiyun.
Ka thusei ahin nakol'u hin sungun,
2 ajeh chu keiman thulem a na henga thu kasei ding ahi.
Keiman achesa thilsoh ho a kon'a kahil ding nahi—
3 eihon thusim ijahsa hou leh ihetsa hou,
ipu ipate uva kon'a thusim hung kisei lhapeh ho ahi.
4 Eihon hiche thutah ho hi icha inao teu i-impeh lou diu;
Pakai natoh loupi tah-tah ho hi,
athaneina le akidanna ho hi
ikhangthah hou iseipeh diu ahi.
5 Ajeh chu Aman Jocob kom'a dan anapeh a;
Israel kom'a thuhil ho anapeh ahi.
Aman ipu ipateu
atu achateu ahil diuva thupeh anapeh ahin,
6 hitia chu ahunglhung ding khangthah ten ahetna diu leh—
ahung pengloulai chapang ho dinga—
chuleh aman amaho chapang te ahilsonna diuva ahi.
7 Hitia chu khangthah ahunglhun channa Pathen a kinepna thah anei sahna diu,
anatoh kidang thil loupi ho chu asuhmil louna diu
chuleh athupeh ho anit jingna diuva ahil jing diu ahi.
8 Hiteng chuleh ipi iputeu tobang talou a—
lungtahna, kiphinna, chule kitah louna,
Pathen a alungthim'u pehnom louna aneilou diu ahitai.
9 Ephraim galsat hon, thalchang akipoh vangun,
akinung heiyun galmun a kon'in ajam tauve.
10 Ama hon Pathen toh akitep nau ajui tapouvin
ama thuhil dinpi ding anom tapouvin ahi.
11 Pathen'in ipi abolpeh uham—
thil kidang tah-tah anabol ho chu,
12 Egypt gamsung le Zoan phaicham a
napu napa teu dinga thil kidang ho ana boldoh ahi.
13 Ajeh chu Aman twikhanglen ana hom khenin,
twi chu bang bangin akikhen in amaho anapui galkaiyun ahi!
14 Sun leh meilhang in ana puijin,
jan leh meikong in ana puijin ahi.
15 Aman gamthip gam'a songpia kon'in
adon diu twi, ana putdoh sah in ahi.
16 Aman songpia konna twi chu,
vadung bangin ana londoh sah in ahi!
17 Ahijeng vangin neldi gam achun ama hon chonset anabol'un,
Hatchungnung Pen dounan ana kiphin'un ahi.
18 Ama hon alungsung uchu lungtahna nei pumin Pathen ana patep un,
neh ding ana thumun ahi.
19 Ama hon Pathen Ama tah dounan thu ana seiyun,
“Pathen'in gamthip gam'ah an eipejou pouve,” atiuve.
20 “Henge, song chu ajep in twi chu aputdoh nai,
ahinla amite changlhah le sa eipejou pouve,” atiuve.
21 Pathen'in hiche hi ajahdoh phat in alunghang lheh jengin ahi.
Jacob dounan alung hanna mei akoudoh jengin ahi.
Heng'e, Israel douna alung hanna ahung koudoh jenge,
22 ajeh chu ama hon Pathen atahsan pouvin
ahilouleh amaho akhoukhah diuvin jong ana tahsan pouvin ahi.
23 Pathen'in chungleng vanthamjol thu apen;
vankot jouse jong ahongdoh e.
24 Aman aneh dingun van a kon'in manna gojuh in ahin juhlhah sah in;
van changlhah chu ahin pen ahi.
25 Ama hon vantil bu chu aneuve!
Pathen'in alungna chimsetnun apen ahi.
26 Aman solam hui chu ahin nunsah in
Athahat nan lhanglang hui jong anunsah in ahi.
27 Aman aneh dingun sa chu vutdi jat ahin juhlhah sah in—
vacha ho chu twikhanglen panga neldi jat ahi!
28 Aman vacha ho chu aponbuh sungu leh
avel uvah ahin lenlhah sah in ahi.
29 Ama hon oivaset in aneuvin ahi.
Angaichat dungjui tah un apen ahi.
30 Hinla ama hon angaichat dungjuiya anehva masangun,
akamsung uva sa aumpet jeng jong chun,
31 Pathen lung hanna achung uvah ahunglhung tan ahileh,
Aman alah uva ahat pen-pen ho chu athat tan ahi.
Israel khangthah anasapen ho chu athat gamtan ahi.
32 Ahijeng vangin mipi ho chun chonset aboljom jingun ahi.
Thil kidang ijat abol vangin, atahsan deh pouvin ahi.
33 Hiti chun ahinkhou chu lhuh gamna ahitan,
akum khou chu kichat nan adimtai.
34 Pathen'in amaho ahin thapat phatnun,
ama hon ajona langin Ama chu ahin hol tauvin ahi.
Kisihna ahin nei tauvin Pathen ahin hol tauvin ahi.
35 Hiti chun Pathen chu asongpiu ahi
chuleh Pathen Hatchungnung Pen chu ahuhhing pau ahi ahin geldoh tauvin ahi.
36 Ahijeng vangin hichu kamnal a anaseijiu ahibouvin;
alei u mangchan jou ana seiyun ahi.
37 Alungsungu chu Pathen a ana petheng pouvin ahi.
Pathen toh ana kitepna uva jong ana dingdet pouvin ahi.
38 Hinla lungsetna dim Pathen chun achonset nau ana ngaidam'un
amaho chu ana sumang deh pouvin ahi.
Phat atamjon alung hanna ana tuhtang in
hiche bang chun ima ana tongdoh pon ahi!
39 Tahsa mihem bep ahiuve ti ahe jingin,
hui anun leh haikhat kahbou ahin ahung kiletapoi ti ageldoh in ahi.
40 Oh, gamthip noiya chu ichan’a Ama adou uva
chule gamgo lah a chu alungthim anat sah uhitam.
41 Avel-vel'in Pathen thohhatna chu apatep jiuvin
chule Israel dia Atheng Pa chu asulunghang jiuvin ahi.
42 Ama hon athahatna in agalmi houva kon'a
ana huhdoh u chu ageldoh jou tapouve.
43 Egypt gam sunga thil kidang ijat abol uhitam,
chuleh Zoan phaicham a athil kidang bol ho chu ageldoh tapouvin ahi.
44 Vadungho thisan asosah in,
vadung twi chu koiman adon thei tapoi.
45 Pathen'in amaho lah a thousi vaibong alansah a
chule uphoh te alansah a agam ujong asuhset peh chu ahepha tapouve.
46 Aman achang jouseu khongbai anehgam sah in;
alousoh jouseu jong khaokhopi anehgam sah e.
47 Alengpithei jouseu gel avohlhah sah sohkei in
chule atheipi phung jouseu jong daibang athagam sah in ahi.
48 Agancha jouseu gel lah a dalhah in aumsah in,
akelngoi hou jong keh alhah lihsah sohtai.
49 Achung uva nasatah in alung hangin—
alung dammona a lunghanna,
mi sumang vantil hon tamtah
alhah khum tan ahi.
50 Aman alung hanna achung uvah achuh sah tan;
Egypt mite hinkho ana hinghoi pon
amangthah gamtan ahi,
51 Egypt insunga achapa tahpen cheh athat in,
Egypt gamsung pumpia khangdong te pahcha amolsah tai.
52 Hinla Aman amite chu kelngoi hon bangin apuiyin,
gamthip noiya bitkei in apui galkai tan ahi.
53 Aman mongtah in apuilen hijeh chun ama hon kichatna anei pouve;
chujongleh twikhanglen in agalteu alhoh mangpeh gamtai.
54 Amaho chu Pathen'in agam theng abanjetna atundoh,
molsang vum achun ahin puilut e.
55 Amaho masangah namtin vaipi adelmang peh sohkeijin,
abonchauvin achan dingu gam ahoppeh cheh e.
Israel phung namtin abonchauvin ama-ama ponbuh cheh a achen sah tai.
56 Ahijeng vangin ama hon Hatchungnung Pathen dounan thil abol jingui.
Athupeh ho khatcha anitpeh pouvin ahi.
57 Apu apa teu bangin avahmang-uvin jou jengin na atong uvin ahi.
Amaho chu thalpi janglou bangin akitah pouvin ahi.
58 Ama hon pathen dang ho doiphung aphutdoh un;
Pathen alunghan sah uvin, chuleh semthu pathen ahou jeh un Pathen athangthip sah tauvin ahi.
59 Pathen'in ajahdoh phat in hatah in alunghangin,
Israel chu pumpai in apaimang tan ahi.
60 Pathen'in Shiloh achenna mun adalhan,
mihem te lah a aumna ponbuh chu adalha tai.
61 Aman aloupina le athaneina hetna
Kitepna Thingkhong chu gal miho khut a apedoh tan ahi.
62 Ama amite chunga alunghan jeh in agal miteu athasah gamtan ahi.
63 Gollhangho gal'ah athigam tauvin,
nungah hon kichenna la asah masangun athigam tauvin ahi.
64 Thempu te athat gam tauvin,
ameithai houvin alhasetpi thei tapouvin ahi.
65 Ajonan Pakai chu a-ihmua ahung khangdoh bangin ahung thoudoh in,
mihatpa hung kiltildoh bangin ahung kitildoh in ahi.
66 Gal miho chu anungno in
a-itih a ding jumna atosah tan ahi.
67 Ahinla Joseph chilhah ho chu apaidoh in;
chuleh Ephraim phung chu alheng tapon ahi.
68 Aman akhel'in Judah
leh angailut Zion Mol chu alhengin,
69 Hichea chun vanho san banga sang,
leiset banga chah a-itih a um jing dingin Hou-In khat atungdoh tan ahi.
70 Aman asohpa David chu akelngoi chinna a kon'in,
ana koudoh in ana lheng tan ahi.
71 Aman kelngoipi le anou achin laijin akoudoh in
amite Israel Jacob chilhah ho chu—
kelngoi chin'a ching dingin ana pansah tan ahi.
72 David in amaho chu lungtheng tah leh chingthei tah in
ana lamkaiyin ahi.
DRAFT COPY