91
Pathen Venbitna Noiya Um Ding.
1 Chungnung Pen cholngahna noi a um chan chun
Hatchungnung lhalim noi a choldona amu ding ahi.
2 Pakai chung changa hiche hi kaphong e:
Ama bou eiven bit ahin, ka hoidamna mun ahi;
Ama chu ka Pathen ahin, keiman ama ka tahsan e.
3 Ajeh chu aman thangkol jouse a kon'in na huhdoh intin
thina thei hivei hoa kon a na huhdoh ding ahi.
4 Aman alhavinga na lekhu ding ahi.
Alhalim noi a na hoidoh ding ahi.
Kitah tah a akihahselna ho chu na dinga galvon le ompho ahi.
5 Jan a mi sulung linglao ho kicha hih in,
sun lai a thalchang leng leho jong kichat dan.
6 Jan noiya donthah nantna hivei gimnei tah ho kichat dan,
sun laiya na delkhum hesohna jong kicha hih in.
7 Nasih langa sangkhat lhu henlang,
navel a sangsom thi jongleh,
hiche boina hon nangma natoh khah louding ahi.
8 Namit hah in lang ve jengin,
chule migilou te chunga gotna kipeh dan ven.
9 Nangin Pakai chu na panpi dinga na kisem le,
Pakai chu na huhdoh dinga nakigon ahi le,
10 setna imachan najo louding ahi;
natna hivei khat chan jong na inn ahin phah louding ahi.
11 Chutengleh Pathen'in na valena chan'a
na vengbit din avantil te thu pente.
12 Nakeng chu songa na kisuh khah louna dinga
vantil ten akhut uva nadop diu ahi.
13 Nangin keipi bahkai ho nasuh goi a;
gul hang ho chuleh gunei gul ho na lhonat gam ding ahi!
14 Pakaijin hitin ati, “Keima eingailu ho ka huhhing ding ahi.
Kamin a tahsanna nei ho chu ka hoidam ding ahi.
15 Ama hon eihin kou teng uleh, keiman ka donbut ding;
chuleh hahsatna ato teng uleh keiman kaumpi ding ahi.
Keiman amaho chu ka huhdoh a jabolna kachan sah ding ahi.
16 Keiman hinkho sotna kapeh ding
chuleh ka venbit jing diu ahi,” ati.
DRAFT COPY