105
Pathen Melchihna Kidang Umna Ding Angeh
1 Pakai kom a kipathu sei in aloupina samphong’un. Vannoi leiset mihemte jousen ipi abol ham heuhen, 2 Aheng a la a sauvin; henge avahchoila saovin. Athilbol kidangho hi mijouse seipeh’un, 3 Amintheng hi domsang’un, nangho Pakai chibai bohte jouse kipah’un, 4 Pakai athahatna chu kholchil in phattin’in amachu hol’un, 5 datmo um tahtah atohdoh ho chuleh thilkidang abolho, athupeh eipeh hou, 6 nangho asoh Abraham chate ho, Jacob chilhah ho alhendoh sate ho, geldoh’un. 7 Amahi Pakai Ipathen’u ahin, Ama thudih nahi gamsung jousea akimudoh sohkeijn 8 Amahi akitepna itihchan hijongleh dingjing ahin, khang sangkhat dinga ana kipehdoh na, 9 Abraham toh anasem kitepna chuleh Isaac kom a ana kihahselna, ✡Semtilbu 12:7; 17:8; Semtilbu 26:3 10 Aman Jacob kom ah daan khat apen anasuhdet in, chuleh Israel mipite dinga beithei lou kitepna ana sem in: ✡Semtilbu 28:13 11 “Keiman Canaan gam kapehding nahi, nang dinga jatchombeh’a kapeh natouphadiu gamchu ahi” anati. 12 Aman hichehi hon lhomcha ahipet’uva, Canaan gam'a kholjin hon lhomcha ahipet uva anasei ahi. 13 Amaho namkhat a kon a namkhat, lenggam khatna kona lenggam khat a akholjin pet’uva asei ahi. 14 Aman koimacha anasuh genthei sahpon ahi. Aman amaho huhnan namdang lengho chu anagih’in ahi. ✡Semtilbu 20:3-7 15 Kami lhentum hochu tongkha hih’un, chuleh kathemgao hojong tongkha hih’un,” anati. 16 Aman nehle chah hochu akhahtan’in Canaan gamah kel analhahsah’in ahi, ✡Semtilbu 41:53-57 17 hiti chun amaho masanga Egypt gammachun mikhat anasol masan ahi, amaho soh a anajoh Joseph chu ahi. ✡Semtilbu 37:28; 45:5 18 Amachu akengphang tenia thihkhao avouvin, angongchang’a thihkol a-opeh uve. ✡Semtilbu 39:20—40:23 19 Amang lolhinna dinga thil ahung sodoh tokah’in Pakaiyin Joseph chu ahina tahbeh hetdohna dingin ana patepmin ahi. 20 Hichejou chun Pharaoh’in amachu agakousah’in alhadohtai; Gamsung vaipopan songkul kotchu ahonpeh tai. ✡Semtilbu 41:14 21 Joseph chu lengpa insunga thil jouse chunga vaihom dingin apansahtan ahi. Hiti chun lengpa thil ho jouse chungah vaipon ahung pangtai. ✡Semtilbu 41:39-41 22 Hiti chun aman adei bang tah in lengpa noi a vaihom pipuho chu avaihop in chule lengpa thumop lea pang ho chu ahil ji tai. 23 Hijouchun Israel chu Egypt gam alhungtan, Jacob chu Ham gamsunga chun gamchommi hinan anachengtan ahi. ✡Semtilbu 46:6; Semtilbu 47:11 24 Pakai in Israel mipite chu hapun’in apunsahtan hiti chun agalmite diuvin kichat aumleu tauvin ahi. ✡Potdohbu 1:7-14 25 Hichun Egypt techu Israelte vetda dingin atildoh tan hijeh chun Pakai mite dounan tohgon aneitauvin ahi. 26 Ahin Pathennin asoh Mose chu ahinsol’in aman ana lhendoh Aaron chutoh asolthan ahi. ✡Potdohbu 3:1—4:17 27 Amanin Egypt mite dounan melchihna kidangtah chuleh datmo um tahtah Ham gamsunga anatongdoh lhonnin ahi. 28 Pakai in Egypt chu mu anathimsah tan ahi. Ajeh chu amahon Pakai thupeh Israelte soldoh dingchu ananom pouvin ahi. ✡Potdohbu 10:21-23 29 Aman twi thisan anasosah’in, ngaho dingin thina thei gu ahitan ahi. ✡Potdohbu 7:17-21 30 Uphoh honjong agamsung’u alonvuh jengin lengpa lupna dansang jenga jong alhailut jengun ahi. ✡Potdohbu 8:1-6 31 Pakai in thu aseileh thousiho Egypt mite chunga ahung chu’uvin, Egypt gam pumpi thousi vaibong’in alo jengin ahi. ✡Potdohbu 8:20-24; Potdohbu 8:16,17 32 Aman go khel in gel anajuhsah’in, keh in agamsung’u anasepchap jengin ahi. ✡Potdohbu 9:22-25 33 Aman alengpithei uleh atheichang ujong asuhmangpeh’in athingphung houjong asatchap jengin ahi. 34 Aman thu aseileh khaokhote ahung kitollutnun khaokho noute jong simsenlou ahung kitollut tauvin ahi. ✡Potdohbu 10:12-15 35 Amahon gamsunga ado eng jouse anechai jengun, loulai a anche louhing jouse jong achaidoh jengun ahi. 36 Hiche jouchun Aman Egypt te insung jousea chapa tahpen ho aban thapeh’in ahi. Hiti chun akitaipipen ule akipanapen hou asuhbei peh’in ahi. ✡Potdohbu 12:29 37 Pakai in amite chu sana le dangka dimset pum in Egypt’a kon in ahin puidoh’in, Israel phung holah’a khat chajong akipallhua aumpouvin ahi. ✡Potdohbu 12:33-36 38 Egypt miten nana kichat behseh jeh’un apotdoh uchu ana kipapilheh jengun ahi. 39 Pakai in sunleh meilom akhu khum sah’in janleh meikong in asalvah peh’in ahi. ✡Potdohbu 13:21,22 40 Amahon sa athum uleh vamim alhalutpeh’in a-oivana diuvin van changlhah mama chu anapen ahi. ✡Potdohbu 16:2-15 41 Aman songpi chu ahomsah’in twi ahung kiphidoh sah’in gamchai lah’a vadung bangin alondonsah’un ahi. ✡Potdohbu 17:1-7; Minbu 20:2-13 42 Ajeh chu Aman asohpa Abraham kom a akitepna atheng chu ageldoh’in, 43 hijeh chun amite Egypt’a kon in amilhendoh chu kipah tah’in ahin puidoh’in ahi. 44 Aman gamsung mite Pathen helou chitin namtinte chenna chu alahpeh’in ama mite hochu apen, hiti chun amahon mi tusa changlhah hochu aki-at’un ahi. ✡Joshua 11:16-23 45 Hitiho jouse anachelhah sahchu amahon adaan thupeh leh athuhil ho dungjui a achon nadiu adeijeh ahi. Pakai chu thangvah’in umhen!
✡105:9 Semtilbu 12:7; 17:8; Semtilbu 26:3
✡105:23 Semtilbu 46:6; Semtilbu 47:11
✡105:31 Potdohbu 8:20-24; Potdohbu 8:16,17
✡105:41 Potdohbu 17:1-7; Minbu 20:2-13
DRAFT COPY