1 Keiho a ahipoi, O Yahweh Pakai keiho a ahipoi, amavang loupina jouse hi namingailut na longlou jeh a chun nang ding jingbou ahi.

2 Chitin namtin hohin a Pathen'u Elohim hoi a umham tia aseidingu ham?

3 Ka Pathen'u Elohim hi vanho chunga aum in thil adeidan dana abolji ahi.

4 Amaho semthu doihon vang sana le dangka a kisem ngenchang bou ahiuvin mihem khut in asemthu jeng ahiuve.

5 Amahon kam anei un ahinla apaotheipon, chuleh mit anei un kho amuthei pouvin,

6 kol aneiyun ajathei pouvin, nahkui anei un anahthei pouvin,

7 khut anei un ima tohnan amangthei pouvin chuleh keng anei un achele theipouvin, lolhom anei un ahin thucheng ahungdoh theipon ahi.

8 Hitiachu doilim semthu hohi hiche tobang ahiuve, hicheho tahsan hojong hitobang machu ahiuve.

9 O Israel Yahweh Pakai chu tahsan un! Amachu napanhu na lum a pang ahi.

10 O thempuho Aaron ho Yahweh Pakai chu tahsan un! Amahi napanpia leh na lumdel a pang'a ahi.

11 Nangho Yahweh Pakai gingjing ho Yahweh Pakai chu tahsan un! Amachu napanpi le nalumdal ahi.

12 Yahweh Pakai in nahin geldoh jingin phatthei nabohjing ding ahi. Aman Israel mipite hi phatthei aboh ding ahi, chuleh thempuho le Aaron chilhah ho jong phatthei aboh ding ahi.

13 Mithupi hihenlang milham hijongleh Yahweh Pakai ging hochu Aman phatthei aboh ding ahi.

14 Yahweh Pakai in nangma nahin nachate ahin phattheina lhingset in napehen,

15 Van le lei sem a Yahweh Pakai chun phatthei naboh hen,

16 Vanhohi Yahweh Pakai a ahin, leiset vanghi mihemte apeh ahi.

17 Mithin Yahweh Pakai thangvah la asatheipoi, ajeh chu amaho chu lhan munthip gam a che ahiuve.

18 Ahinlah eihon tu le tonsot geija Yahweh Pakai ithangvah theiju ahi. Yahweh Pakai chu thangvah'in umhen!