1 Yahweh Pakai chu aphatna jeh'in thangvah'un! Ami ngailutna dihtah chu tanglouvin aum jinge.

2 Israel pumpin avel in seikit hen. Ami ngailutna dihtah chu tanglouvin aum jinge.

3 Aaron chilhah ho leh thempuhon avel in seikitnu hen. Ami ngailutna dihtah chu tanglouvin aum jinge.

4 Yahweh Pakai ging jousen seikit uhen agailut thutah chun tonsot in athoh jing e.

5 Kagenthei pet in Yahweh Pakai kom'ah kataovin ahileh Yahweh Pakaiyin kataona asangin eilhadoh tai.

6 Yahweh Pakai keilanga apanleh ipi kakichat ding ham? kon I-eilothei dingham?

7 Yahweh Pakai keilanga apanleh Aman eipapin tin, eidou ho chu kajosa tobanga kavetding ahi.

8 Mihem a kingai sangin, Yahweh Pakai kiselna a nei aphajoi.

9 Leng chapate a kingai sangin, Yahweh Pakai a kisel aphajoi.

10 Eidouva chidang namdang ten eiumkimvel jongleh keiman amaho chu Yahweh Pakai thahatna jalla kasuhmang ding ahi.

11 ama hon eiumkimvellun eidelkhummun ahi, ahinla ken amaho chu Yahweh Pakai hanta jallin kasumang gamtan ahi.

12 ama hon khoi bangin eiumkimvellun eitommun, meikong a-al leng lungngin eileo tobangin eibolseuvin ahinla keiman Yahweh Pakai thahatna jallin amaho chu kasumangtan ahi.

13 Kagal miten tha tei ding eigouvin ahin Yahweh Pakaiyin eihuhdoh tai.

14 Yahweh Pakai hi kathahatna leh kala ahin Aman galjona eipetan ahi.

15 Kipana le galjona lahi michonphate ponbuh sungah akisan, Yahweh Pakai thahatna banjet in thil loupitah atongdohtan ahi!

16 Yahweh Pakai thahatna banjetchun thil loupitah atongdohtan ahi.

17 Keima thilou ding kahin, Yahweh Pakaiyin eibolpeh thilho phongdoh dinga kahinjoh ding ahi.

18 Yahweh Pakaiyin nasatah'in eijepmin, ahinlah eithisah pon ahi.

19 Mikitah ho lutna kot chu neihondoh peh'in keima lut ing ting Yahweh Pakai chu thangvahna kapehding ahi.

20 Hiche kelkot ho hi Yahweh Pakai kom lhuntheina ahin michonpha hojong hicheahi lutji ahiuve.

21 Kataona neisanpeh jehleh galjona neipeh jeh'in nangma ka thangvah e!

22 Insahon adeimova apaimangu inning'a songpi khomdet pennin apangtai.

23 Hiche hi Yahweh Pakai natoh ahin mitvet dinga thilkidangtah ahi.

24 Hiche nikho hi Yahweh Pakaiyin asem ahin, eihon kipahtah leh thanomtah'a imandiu ahi.

25 O Yahweh Pakai lungsettah'in neihuhdoh'un, O Yahweh Pakai lungset tah'in neilolhin sahtei teijun.

26 Yahweh Pakai minna hungpa chu anunnomme. Yahweh Pakai Hou-Inna konin nangho phatthei kahinboh'un ahi.

27 Yahweh Pakai chu Pathen Pathen, ichung uva hi vahjinga um a ahi. Kilhaina sa chu khaovin khitninlang maicham ki ho chutoh khitbeh'in

28 Nangma ka Pathen Pathen nahin keiman kavahchoi ding nahi! Nangma ka Pathen Pathen nahin keiman kachoisang ding ahi.

29 Yahweh Pakai chu aphatna ho jeh'in thangvah'un! Ajeh chu ami ngailutna dihtah chu tonsot a um jing ahi.