1 Hiche lekhathot hi Sardis khopi sunga um houbunga thupo henga hitin sun in. Hiche hi Pathen Lhagao sagi neiya chule ahsi sagi neipa thulhut chu ahi. “Keiman na thilbol jouse, chule ahinga minchena jouse naneiye ti kahei-hinla nangma athi nahi.” 2 “Khangdoh in! Amoh them aumden ho suhat in, ajeh chu amoh them umdenho jeng jong hi athikon cha ahi tauve. Ijeh ham itileh na chonna ho hi Pathen mitmun thutah to akigamlat lheh jenge. 3 Nangman najahsa, chule na tahsan masah achun umdenin. Kisih in chule kaheng lama hung kihei kit in. Nangma na khahdoh kit louva ahileh keima phulou helouvin na ginchat loupet tah le gucha tobanga kahung ding ahi.✡Matt 24:43,44; Lk 12:39,40; Rev 16:15 4 Chuti jongleh, Sardis houbung a aponsil'u gitlouna a kisubohlou mi phabep aum uve. Amaho chu kilomtah ahijeh uva keima toh ponbang kisila vahle ding ahiuve. 5 Jona nei jouse chu ponbang kisila vahle cheh ding ahiuve. Keiman amin uchu Hinna Lekhabua kanoimang louhel ding, chusanga keiman amin uchu Kapa angsunga le Vantil te masanga keiya ahiuve tia ka phondoh ding ahi.✡Potdohbu 32:32,33; Labu 69:28; Rev 20:12; Matt 10:32; Lk 12:8 6 Koi hileh Houbung ho henga Lhagao thusei angaina ding nakol neija chule hetkhenna neichan chun ngaihen.”

7 Hiche lekhathot hi Philadelphia houbunga um thupo henga hitin sun in: Hiche thu hi athenga le adih ah, akhut a David kot-heh choiya Aman ahon le koiman khah theilou chule akha chu koima chan hong theilou pa a kon ahi.✡Isa 22:22; Job 12:14 8 Keiman na thilbol jouse kahei, chule keiman nangma dingin kot kahongin koiman akha thei louding ahi. Nangma thalhom tah nahi, achuti vang'in ka thusei na ngaiyin chule nei seilep poi. 9 Ven, Satan kikhopna a jaoho–jousei Juda mi kahi tia ahivanga hilou ho chu ada acham louva amaho chu ahung uva chule na kengphang bul'a kakun sah ding ahiuve. Ama hon nangma kangailut nahi ti hetsahna aphondoh thei dingu ahi.✡Isa 49:23; 60:14; Isa 43:4 10 Ajeh chu nangman kathupeh ho thohhat tah a najui ahijeh in, vannoi pumpi a patepna khoh chungnung hiche vannoiya hiho dinga hung ding patepna akonna kahoidoh ding nahi. 11 Keima ka hungloi ding ahi. Koima chan nalal lukhuh chu na lahpeh louna dingin kolchah jingin. 12 Jona neiho jouse chu ka Pathen Hou-In'a khombul a kapansah ding ahi, chule ama hon hichu adalhah tahlou dingu ahi. Chule keiman achung uva ka Pathen min kajih ding chule amaho ka Pathen khopi mite hi ding ahiuve–Jerusalem thah, van'a ka Pathen a konna hung kumlha mun'a chu. Chule keiman achung uva ka minthah kasut ding ahi.✡Rev 21:2; Isa 62:2; 65:15 13 Koi hileh Houbung ho henga Lhagao thusei angaina ding nakol neiya chule hetkhenna neichan chun ngaihen.

14 Hiche lekhathot hi Laodicea khopi sunga um houbunga thupo henga hitin sun in. Hiche thu hi Amen kitipa–tahsan umtah le hettohsahna dihtah, Pathen thilsem thah a hungkon ahi.✡Thuchihbu 8:22 15 Nangman thil nabol jouse chu kahei, hiti chun nangma sa jong nasapon, vot jong navot poi. Keiman nangma khat joh sang nahi ding chu kadeipeh nahi. 16 Hinlah nangma twilum tobang bep nahin, sa jong salou, vot jong votlou nahijeh a kakama konna kaphidoh dingkon nahi. 17 Nangman kahaove, kadei chan kaneiyin, imacha ka ngaicha poi nati. Ahinla nangma adapen, khoto umtah, vaicha tah, mitcho chule sagohkeo nahi chu nakihet poi. 18 Hiti chu ahijeh in keiman nangma kathumop nom chu keiya kon'in sana kichoh in–meiya kilha thengsel sana chu kichoh in. Chutengleh nangma nahao ding ahitai. Chujongleh keiya kon'in ponsil bangleh kichoh in chutengleh sagoh keova naumna chu jahcha tapon natin, chule mamit a dinga mitlou jong chu kho namun'a hi ding ahi. 19 Keiman kangailut chan kasuhdih jia chule kathunun ji ahi. Hiti chun gunchun chule nalunggel dih louva kon'in hung kihei kit in.✡Thuchihbu 3:12; Heb 12:6 20 Ven! Keima kot a ka dingin chule kot kakiuve. Nangman ka aw najah a chule kot nahon'a ahile keima hunglut ingting chule loi le gol hina a an kaneh khompi ding nahi. 21 Jona neiho chu koikoi hileh keiman jona kaneiya ka-Pa Laltouna a katoukhom banga hi amaho jong chu kalaltouna a katou khompi ding ahi. 22 “Koi hileh Houbung ho henga Lhagao thusei angaina ding nakol neiya chule hetkhenna neichan chun ngaihen.”