3
Kriteria ba responsavel sarani sira
1 Ema nebee hakarak sai responsavel ba sarani sira, nia hakarak halo servisu ida nebee iha folin. Liafuan nee loos duni. 2 Responsavel sarani nian tenki ema nebee naran diak, nia tenki moris ho feen ida deit, nia tenki hatene aan, domina aan, hahalok diak, simu bainaka iha uma ho laran haksolok, i hatene hanorin. 3 Responsavel sarani nian la bele lanu-teen, i laos ema nebee gosta baku malu, maibee tenki laran diak i gosta dame. Nia la bele matan fuan naklosu ba osan. 4 Nia tenki hatene eduka nia familia, i hanorin nia oan sira para rona nia ho respeitu. 5 Tanba se nia la hatene eduka nia familia uma laran, oinsaa mak nia bele tau matan ba Maromak nia povu?
6 La bele foti ema nebee foin fiar ba Jesus hodi sai responsavel ba sarani sira. Keta halo be nia foti aan dehan nia mak diak liu, nunee nia bele hetan kastigu hanesan kastigu nebee Maromak uluk foo ba Satanás. 7 Responsavel tenki naran diak iha komunidade nia leet. Se lae ema iha komunidade bele hatete aat nia, too ikus nia bele monu ba Satanás nia lasu. ✡Tito 1:6-9
Kriteria ba ema nebee kaer knaar ajuda Maromak nia povu
8 Nunee mos ho ema nebee kaer knaar ajuda Maromak nia povu. Nia tenki ema nebee naran diak, la bele bosok-teen, la bele hemu tua barak liu, i la bele matan fuan naklosu ba osan. 9 Nia tenki kaer metin lia loos nebee Maromak hatudu mai ita, i tenki laran moos. 10 Bainhira atu foti ema ida kaer knaar ajuda Maromak nia povu, haree di-diak lai nia moris oinsaa. Se ema nee moris loos foin bele foti nia.
11 Nunee mos nia feen*Liafuan Gregu iha nee bele dehan “nia feen”. Bele mos “feto”. Iha ema balu dehan, iha nee Paulo koalia kona ba feto nebee kaer knaar ajuda Maromak nia povu. Maibee se nunee, lian Gregu baibain uza liafuan seluk. (Haree Roma 16:1.) tenki hahalok diak para ema respeita. Nia tenki hatene aan, la bele konta ema nia vida, i ema bele konfia nia iha buat hotu-hotu.
12 Ema nebee kaer knaar ajuda Maromak nia povu tenki moris ho feen ida deit. I nia tenki hatene eduka nia oan sira ho nia ema uma laran. 13 Se nia serbi sarani sira ho diak, ema sei respeita loos nia, nunee nia sei brani liu tan koalia kona ba nia fiar ba Kristu Jesus.
Fiar nebee loos
14 Hau hein katak la kleur tan hau sei baa vizita o. Maski nunee hau hakerek buat sira nee ba o. 15 Nunee se hau demora karik, o sei hatene, Maromak nia familia tenki hahalok oinsaa. Maromak nee mak Maromak Moris. Nia familia mak Nia povu, i Nia povu hanesan alsesu ho uma riin nebee suporta lia loos.
16 Maromak foo sai ona segredu nebee mak lori ita moris tuir Nia hakarak. Segredu nee furak teb-tebes, la iha ema ida bele nega. Segredu nee foo sai kona ba Jesus nunee:
Nia fila Aan sai Ema.
Espiritu Santu hatudu katak, Nia moris loos duni.
Anju sira haree Nia.
Maromak foti sae tiha Nia ba iha fatin aas iha naroman lalehan nian.
Ema foo sai kona ba Nia too iha nasaun hotu-hotu;
ema iha mundu tomak fiar ba Nia.