Paulo nia surat
ba sarani sira iha
Kolose
1
Paulo hahuu nia surat
1 Surat nee husi hau, Paulo hamutuk ho ita nia maluk sarani Timóteo. Maromak foti hau sai Kristu Jesus nia apostolu.
2 Ami haruka surat nee ba maluk sarani sira iha sidade Kolose. Imi Maromak nia povu, i tuir Kristu ho laran tomak.
Ami harohan ba ita nia Aman Maromak para hatudu Nia laran diak ba imi, i foo pas ho hakmatek ba imi.
Paulo halo orasaun ba sarani sira iha Kolose
3 Bainhira ami halo orasaun ba imi, ami sempre agradese ba Maromak, ita nia Nai Jesus Kristu nia Aman. 4 Ami agradese ba Nia tanba ami rona dehan, imi fiar ba Kristu Jesus i hadomi Maromak nia povu hotu. 5 Imi nia fiar ho imi nia domin nee buras tanba imi hein ho laran metin atu simu bensaun nebee mak Maromak prepara tiha ona ba imi iha lalehan. Imi rona kona ba bensaun nee bainhira imi rona Liafuan Diak kona ba Jesus. Liafuan nee mak loos, 6 i buras ba beibeik hodi muda ema nia moris iha fatin bar-barak. Nunee mos muda imi nia moris, komesa husi loron primeiru imi rona Liafuan Diak nee hodi kompriende lo-loos Maromak nia laran diak. 7 Imi aprende Liafuan Diak nee husi ita nia maluk doben Epafras. Nia Kristu nia atan hanesan mos ami, i nia badinas halao Kristu nia servisu iha imi nia leet.✡Kolose 4:12; Filemón 23 8 Nia mak konta mai ami katak, imi hadomi malu tuir domin nebee mak Maromak nia Espiritu foo ba imi.
9 Tanba nee, hahuu husi loron primeiru ami rona kona ba imi, ami halo orasaun beibeik ba imi. Ami husu ba Maromak atu imi bele hetan matenek hodi kompriende buat barak, tuir Espiritu Santu hanorin imi, atu nunee imi bele hatene lo-loos Nia hakarak. 10 Ho nunee, imi nia moris sei foti aas Nai Jesus nia naran, i sempre halo haksolok Nia laran. Imi mos sei halo diak beibeik ba ema, i konhese Maromak diak liu tan.
11 Ami harohan atu Maromak Kbiit Nain foo kbiit ba imi, para imi bele iha forsa hodi aguenta ho pasiensia iha terus laran. 12-13 Ami harohan atu imi foo agradese beibeik ba Aman Maromak ho laran haksolok. Nia mak loke dalan para imi bele simu bensaun nebee mak Nia prepara tiha ona ba Nia povu iha lalehan. Nia hasai tiha ona ita husi forsa nakukun hodi halo ita moris iha naroman laran. I Nia foti Nia Oan doben Jesus Kristu sai ita nia Liurai. 14 Jesus Kristu selu kotu ona ita nia tusan hodi foo liberdade mai ita. Nee dehan katak ita nia sala hamoos tiha ona.✡Éfezu 1:7
Kristu boot liu buat hotu-hotu
15 Kristu hanesan lo-loos Maromak.
Ita ema la bele haree Maromak,
maibee Kristu hatudu mai ita, Maromak nee oinsaa.
Kristu mak boot liu
hodi ukun buat hotu-hotu nebee Maromak halo.
16 Tanba Maromak foo fiar ba Nia
para halo lalehan ho rai ho buat hotu-hotu iha laran,
buat nebee ita ema bele haree,
ho mos buat nebee ita la bele haree.
Nia halo nai ulun sira, liurai boot sira,
autoridade sira ho espiritu bo-boot sira nebee kaer ukun.
Maromak halo buat hotu-hotu para foo ba Kristu,
i Nia foo fiar ba Kristu mak halao servisu nee.
17 Kristu iha nanis tiha ona, molok buat hotu-hotu iha,
i buat hotu-hotu lao nafatin tuir nia dalan tanba Nia mak tau matan.
18 Kristu mak ema sarani sira nia Ulun,
i sarani sira hanesan Nia isin lolon.
Kristu mak moris nia huun.
Nia mak Ema primeiru nebee Maromak halo moris fali husi mate,
para Nia mak boot liu hotu-hotu.✡Éfezu 1:22-23
19 Buat hotu-hotu nebee iha Maromak nia Aan,
iha mos iha Kristu,
tanba Maromak hakarak hanesan nee.
20 Liu husi Kristu nia mate,
Maromak dame malu ho buat hotu-hotu
Maromak diak malu fali ho buat hotu-hotu iha lalehan ho iha rai
liu husi Kristu nia raan fakar too mate iha krus.✡Éfezu 2:16
21 Uluk imi moris dook husi Maromak. Imi hanoin buat aat iha imi nia ulun, i imi nia hahalok mos aat, halo imi sai Nia inimigu. 22 Maibee, tanba Kristu sai ema hodi foo Aan ba mate, agora Maromak halo imi dame malu ona ho Nia. Kristu mate para bele lori imi baa aprezenta iha Maromak nia oin ho laran moos, la iha noda ida, i la iha ema ida bele hatudu liman ba imi. 23 Naran katak imi hamriik metin hodi fiar nafatin. Keta nakdoko, maibee laran metin nafatin katak Maromak halo tuir duni buat nebee Nia promete ona iha Nia Liafuan Diak. Liafuan Diak nee, ema foo sai ona iha nebee-nebee deit iha mundu nee. I hau, Paulo, mos simu knaar para foo sai Liafuan nee.
Paulo servisu makaas ba Maromak nia povu
24 Agora dadauk hau terus hela ba imi. Maibee terus nee halo hau nia laran haksolok. Hanesan Kristu terus, nunee mos hau simu terus nebee mak hau tenki hasoru, atu bele ajuda Kristu nia povu, tanba Nia povu hanesan Nia isin lolon. 25 Maromak foti ona hau para serbi imi hodi foo sai Nia planu tomak ba imi. 26 Hori uluk liu, Maromak nia planu nee sei taka hela ba ita ema. Maibee agora, Maromak loke ona Nia planu ba Nia povu. 27 Nia desidi atu hatudu ba sira katak, Nia planu ba imi nebee laos Judeu furak i boot teb-tebes. Nia planu mak nee: Kristu hela iha imi nia laran. Tanba nee mak imi laran metin katak, aban-bainrua Nia sei halo buat furak teb-tebes ba imi iha lalehan.
28 Ami sempre foo hatene ba ema iha nebee-nebee deit kona ba Kristu. Ho matenek hotu nebee Maromak foo, ami hanorin sira i foo hanoin ba sira. Ami halo nunee atu aban-bainrua ami aprezenta sira ba Maromak, sira nee ema nebee abut metin ona iha Kristu. 29 Ho objetivu nee mak hau servisu mate aan ho forsa tomak nebee Kristu foo mai hau. I Nia forsa nee makaas teb-tebes.