Surat ba ema
Ebreu
1
Maromak nia Oan Jesus boot liu profeta sira hotu
1 Uluk, Maromak uza dalan oi-oin hodi koalia fila-fila ba ita nia bei-ala sira liu husi Nia profeta. 2 Maibee ohin loron, mundu besik remata ona, Maromak koalia ba ita liu husi Nia Oan rasik. Hori uluk liu Maromak foo fiar ba Nia Oan mak halo lalehan ho rai, i Maromak promete katak aban-bainrua Nia Oan mak sei simu buat sira nee hotu. 3 Maromak nia Oan hanesan lo-loos Maromak, Nia hatudu sai Maromak nia kbiit ho naroman lalehan nian, i Nia liafuan iha kbiit boot. Hodi Nia liafuan nee Nia tane nafatin buat hotu-hotu iha lalehan ho rai. Nia loke tiha ona dalan para Maromak bele hamoos ema nia sala. Hotu tiha Nia sae ba lalehan hodi tuur iha Maromak Aas Liu nia sorin loos.
Maromak nia Oan boot liu anju sira
4 Nunee Maromak foti Nia Oan aas liu Nia anju sira hotu. I fatin nebee mak Nia foo ba Nia Oan mos aas liu anju sira nia fatin. 5 Maromak hatete ba Nia Oan nunee:
“O nee Hau nia Oan.
Ohin loron Hau deklara katak Hau nee O nia Aman.”✡Salmus (Mazmur) 2:7
Nia mos foo sai dehan,
“Hau nee Nia Aman,
Nia, Hau nia Oan.”✡2 Samuel 7:14; 1 Krónikas (Tawarikh) 17:13
Maromak nunka koalia nunee kona ba anju sira.
6 Bainhira Maromak haruka Nia Oan mane mesak mai moris iha mundu, Nia dehan,
“Hau nia anju sira hotu tenki adora Nia.”✡Deuteronómiu (Ulangan) 32:43; Lucas 2:13-14
7 Maibee kona ba anju sira, Maromak dehan,
“Hau nia anju sira Hau nia atan.
Hau haruka sira hanesan anin i hanesan ahi lakan.”✡Salmus (Mazmur) 104:4
8 Maibee ba Nia Oan, Maromak dehan,
“O nee Maromak, O sei ukun tinan ba tinan.
O sempre ukun O nia reinu ho lo-loos.
9 O haksolok bainhira ema halo buat diak,
i hakribi hahalok aat.
Tanba nee Hau, O nia Maromak, foti O aas liu O nia maluk sira,
i kose mina ba O nia ulun hodi halo O nia laran haksolok.”✡Salmus (Mazmur) 45:7-8
10 Maromak mos dehan ba Nia Oan nunee:
“Nai, hori uluk liu O halo mundu nee,
lalehan nee O nia liman fatin.
11 Buat sira nee hotu aban-bainrua sei lakon, maibee O iha nafatin.
Buat sira nee sei sai bosan hanesan faru tuan.
12 O sei lulun hanesan faru,
i sei troka fali hanesan ema troka faru foun.
Maibee O nunka muda,
O nia moris sei la remata.”✡Salmus (Mazmur) 102:26-28
13 Maromak koalia tan nunee ba Nia Oan:
“Mai tuur iha Hau nia sorin loos
too Hau halo O nia inimigu sira taka rabat iha O nia ain okos.”✡Salmus (Mazmur) 110:1
Maibee Maromak nunka koalia nunee ba Nia anju sira.
14 Entaun anju sira nee see? Sira nee espiritu nebee serbi Maromak. I Nia haruka sira mai tulun ema nebee mak atu hetan salvasaun.