Testamentu Foun ba Ema Hotu Salmu 105

105

Nai Maromak kaer metin Nia promesa ba Nia povu

1 Foo agradese ba NAI Maromak, haboot Nia naran ba;

foo konhese ba nasaun jentiu sira kona ba saida mak Nia halo tiha ona.

2 Hananu ba Nia, kanta hahii ba Nia;

foo sai buat furak hotu nebee Nia halo.

3 Tane aas Nia naran santu;

imi sira nebee mak buka NAI, haksolok ba.

4 Foti matan ba NAI Maromak, hateke ba Nia kbiit;

buka beibeik Nia oin.

5-6 Imi Maromak nia atan Abraão nia jerasaun sira,

Jacó nia oan sira, Maromak hili ona imi,

keta haluha buat furak nebee Nia halo tiha ona,

Nia milagre ho Nia desizaun nebee Nia hatuun nudar Juis.

7 Nia mak NAI ita nia Maromak;

Nia foo justisa ba iha mundu tomak.

8 Nia hanoin nafatin Nia promesa too tinan ba tinan;

buat nebee Nia promete ona, Nia kaer metin nafatin too jerasaun rihun ba rihun.

9 ✡Nee mak promesa nebee Nia halo ho Abraão,

juramentu nebee Nia halo ho Isac.

10 ✡Nia hametin juramentu nee ba Jacó nudar lei ida;

Nia promesa ba Israel nee vale tinan ba tinan.

11 Nia promete dehan, “Hau sei foo rai Kanaán ba o

hodi sai o nia riku-soin.”

12 Fo-foun bei-ala sira nee ema uitoan deit, uitoan teb-tebes;

sira sei oin foun hela iha rai Kanaán nee.

13 Iha tempu nebaa sira lao rai husi nasaun ba nasaun,

husi liurai ida nia reinu ba liurai seluk nia rain.

14 ✡Bele nunee mos Maromak la husik atu ema hanehan sira;

Nia defende sira hodi siak liurai sira dehan,

15 “Keta book ema nebee Hau hili;

keta halo aat Hau nia profeta sira.”

16 ✡Depois Maromak hamosu rai hamlaha

hodi halo aat tiha ai haan hotu-hotu iha rai Kanaán.

17 ✡Nia haruka ema ida baa uluk iha rai Ejitu;

nee mak José, ninia maun sira faan tiha nia nudar atan.

18 ✡Ema hakanek nia ain ho korenti besi;

sira tau besi kabuar ba iha nia kakorok,

19 too buat nebee nia foo sai akontese duni,

no NAI Maromak nia liafuan hatudu katak nia nee loos.

20 ✡Too ikus liurai haruka ema hasai José husi dadur laran;

ukun nain nasaun halo nia livre.

21 ✡Liurai foti nia sai nai ulun iha palasiu,

atu tau matan ba liurai nia riku-soin hotu,

22 atu manda liurai nia liman-ain sira tuir nia hakarak,

no hanorin matenek ba katuas lia nain sira.

23 ✡Hotu tiha Jacó tama ba iha rai Ejitu;

Israel hela iha ema Ham nia rain nudar estranjeiru.

24 ✡NAI Maromak halo Nia povu sai buras teb-tebes;

Nia halo sira forsa liu fali sira nia funu baluk sira.

25 Nia halo funu baluk sira nia laran fila atu odi Nia povu,

atu kombina malu hodi kontra Nia atan sira.

26 ✡Maromak haruka Nia atan Moisés

hamutuk ho ema ida nebee Nia hili, nee mak Arão.

27 Sira nain rua hatudu Maromak nia milagre iha Ham nia rain;

sira hatudu sai Nia sinal iha povu nia klaran.

28 ✡Maromak haruka nakukun taka metin rai

tanba Ejitu oan sira kontra tiha ona Nia liafuan.

29 ✡Nia halo sira nia bee nakfilak ba raan

hodi hamate tiha ikan hotu-hotu.

30 ✡Sira nia rai nakonu tiha ho manduku,

too tama iha ukun nain sira nia kuartu laran.

31 ✡Nia foo orden mak lalar barak mosu mai,

susuk nakonu tiha sira nia nasaun.

32 ✡Nia la hatuun udan ba sira nia rain, maibee hatuun fali udan jelu fatuk;

rai lakan taa ba-mai iha sira nia rain.

33 Nia baku tuun tiha sira nia ai uvas ho ai figeira;

ai huun iha sira nia rain tomak, Nia silu tohar tiha.

34 ✡Nia foo orden mak gafanhotu mosu mai,

barak teb-tebes, sura la bele.

35 Gafanhotu hirak nee haan ai horis hotu-hotu iha sira nia rain;

buat nebee moris iha rai leten, gafanhotu haan hotu kedas.

36 ✡Nia oho dasa tiha sira nia oan mane boot hotu iha rai nee;

sira nia oan mane primeiru mate mohu.

37 ✡Depois Maromak lori Israel oan sira sai husi rai Ejitu;

sira sai lori ho osan mutin ho osan mean;

husi Israel nia suku hotu, la iha ema ida mak lao sidi.

38 Bainhira sira hakat sai, ema Ejitu sira laran kamaan,

tanba sira tauk ona ema Israel.

39 ✡Maromak habelar kalohan hodi taka Nia povu,

no prepara ahi lakan atu foo naroman iha kalan.

40 ✡Sira husu naan, Nia haruka manu kiukae barak ba sira;

Nia hatuun paun husi lalehan, sira haan too bosu.

41 ✡Nia loke fatuk boot, bee haksoit sai,

suli iha rai fuik maran hanesan mota.

42 Tanba Nia hanoin nafatin Nia promesa santu

nebee uluk Nia foo ba Nia atan Abraão.

43 Nunee Maromak lori sai Nia povu ho haksolok;

povu nebee Nia hili, Nia halo sira livre ho haklalak ho kontenti.

44 ✡Nia foo tiha nasaun sira seluk nia rain ba sira;

buat nebee ema seluk halo too kosar metan suli, sira mak sai nain fali,

45 atu nunee sira kaer metin Nia ukun fuan,

no halo tuir Nia lei.

Hahii NAI Maromak!

✡105:9 Jénesis 12:7,17:8; Jénesis 26:3

✡105:10 Jénesis 28:13

✡105:14 Jénesis 20:3-7

✡105:16 Jénesis 41:53-57

✡105:17 Jénesis 37:28,45:5

✡105:18 Jénesis 39:20—40:23

✡105:20 Jénesis 41:14

✡105:21 Jénesis 41:39-41

✡105:23 Jénesis 46:6; Jénesis 47:11

✡105:24 Ézodu (Keluaran) 1:7-14

✡105:26 Ézodu (Keluaran) 3:1—4:17

✡105:28 Ézodu (Keluaran) 10:21-23

✡105:29 Ézodu (Keluaran) 7:17-21

✡105:30 Ézodu (Keluaran) 8:1-6

✡105:31 Ézodu (Keluaran) 8:20-24; Ézodu (Keluaran) 8:16,17

✡105:32 Ézodu (Keluaran) 9:22-25

✡105:34 Ézodu (Keluaran) 10:12-15

✡105:36 Ézodu (Keluaran) 12:29

✡105:37 Ézodu (Keluaran) 12:33-36

✡105:39 Ézodu (Keluaran) 13:21,22

✡105:40 Ézodu (Keluaran) 16:2-15

✡105:41 Ézodu (Keluaran) 17:1-7; Númerus (Bilangan) 20:2-13

✡105:44 Josué 11:16-23