7
Nai Maromak tau marka ba Nia ema 144.000
1 Hotu tiha, hau haree anju haat hamriik hela iha mundu nia lidun haat hodi satan netik anin para la bele huu ba rai maran ho tasi. Ai huun ida mos anin la kona.✡Jeremias 49:36; Daniel 7:2; Zacarias 6:5 2 Anju haat nee simu ona kbiit atu estraga rai ho tasi. Depois hau haree anju ida seluk mai husi lorosae lori hela karimbu husi Maromak Moris. Anju nee koalia ho lian makaas ba anju haat nee 3 dehan, “Hein lai! Ami sei tau marka iha ita nia Maromak nia atan sira nia reen toos lai. Marka hotu mak imi foin bele estraga rai maran ho tasi ho mos ai huun sira hotu.”✡Ezequiel 9:4, 6
4 Depois hau rona dehan, ema nebee simu marka nee, hamutuk rihun atus ida haat-nulu resin haat.*144.000 = 12 x 12 x 1000. Numeru 12 kodigu ida nebee dehan “kompletu”. Nunee 144.000 hanesan kodigu ida nebee dehan “kompletu liu”, la iha ida mak falta. Sira husi suku Israel hotu mak hanesan tuir mai nee:
5 Husi suku Judá, ema rihun sanulu resin rua.
Suku Ruben, ema rihun sanulu resin rua.
Suku Gade, ema rihun sanulu resin rua.
6 Suku Asér, ema rihun sanulu resin rua.
Suku Naftali, ema rihun sanulu resin rua.
Suku Manassés, ema rihun sanulu resin rua.
7 Suku Simeão, ema rihun sanulu resin rua.
Suku Levi, ema rihun sanulu resin rua.
Suku Isakar, ema rihun sanulu resin rua.
8 Suku Zebulón, ema rihun sanulu resin rua.
Suku José, ema rihun sanulu resin rua.
I suku Benjamim, ema rihun sanulu resin rua.
Ema barak loos hatais batina mutin
9 Hotu tiha, hau haree ema barak loos, too sura la bele. Ema sira nee husi nasaun, suku, povu ho lian hotu-hotu iha mundu. Sira hotu hatais batina mutin, hamriik iha kadeira ukun nia oin ho Bibi Oan nia oin. Sira kaer ramus 10 hodi haklalak dehan, “Ita nia Maromak tuur iha kadeira ukun. Nia ho Bibi Oan mak salva ita.”
11 Anju hotu-hotu hamriik haleu kadeira ukun nee ho katuas lia nain sira ho mos animal moris haat. Sira hotu hakneak i hakruuk too rai iha kadeira ukun nia oin hodi adora Maromak 12 dehan,
“Amen, loos duni!
Ami hahii Maromak, ami foti aas Ita Boot nia naran,
ami agradese Ita Boot, ami respeita Ita Boot.
Ita Boot nia matenek klean liu,
Ita Boot mak kbiit Nain,
Ita Boot forsa teb-tebes.
Ita Boot deit mak ami adora too tinan ba tinan. Amen!”
13 Depois katuas lia nain sira nee ida mai husu hau dehan, “Sira nebee hatais batina mutin nee, see? Sira mai husi nebee?”
14 Hau hataan, “Hau la hatene senhor. Ita Boot mak hatene.”
Katuas nee hatete mai hau,
“Sira nee uluk hetan terus boot tanba sira nia fiar.
Sira fase tiha ona sira nia batina ho Bibi Oan nia raan,
nee mak sira nia batina sai mutin.✡Daniel 12:1; Mateus 24:21; Marcos 13:19
15 Tanba nee, sira hamriik iha Maromak nia kadeira ukun nia oin
hodi serbi Nia loron-kalan iha Nia uma kreda boot.
I Nia nebee tuur iha kadeira ukun nee sei hamahon sira.
16 Sira sei la hamlaha tan,
i sei la hamrook tan.
Loro manas sei la halo terus tan sira,
i rai manas sei la halo sira senti atu mutuk.✡Isaias 49:10
17 Tanba Bibi Oan nebee mak hamriik iha klaran besik kadeira ukun nee
mak sei sai sira nia Bibi Atan.
Nia sei lori sira ba bee matan
hodi foo hemu bee nebee foo moris rohan-laek.
I Maromak sei hamaran sira nia matan been.”✡Salmus (Mazmur) 23:1-2; Ezequiel 34:23; Isaias 49:10; Isaias 25:8
✡7:1 Jeremias 49:36; Daniel 7:2; Zacarias 6:5
✡7:3 Ezequiel 9:4, 6
*7:4 144.000 = 12 x 12 x 1000. Numeru 12 kodigu ida nebee dehan “kompletu”. Nunee 144.000 hanesan kodigu ida nebee dehan “kompletu liu”, la iha ida mak falta.
✡7:14 Daniel 12:1; Mateus 24:21; Marcos 13:19
✡7:16 Isaias 49:10
✡7:17 Salmus (Mazmur) 23:1-2; Ezequiel 34:23; Isaias 49:10; Isaias 25:8