9
Paulo laran susar tanba ema Israel barak lakohi fiar ba Jesus
1 Agora hau hakarak hatoo hau nia laran tristi ba imi. Nudar Kristu nia ema, hau koalia lo-loos ba imi, hau la bosok. Espiritu Santu mos hametin hau nia laran katak, buat nebee mak hau atu koalia nee loos. 2 Loron-kalan hau tristi teb-tebes, hau nia laran dodok, 3 tanba hau nia maluk Israel sira nebee lakohi simu Kristu.*Povu Israel nee mak povu Judeu. Se karik Maromak bele kastigu hau iha sira nia fatin hodi soe hau dook husi Kristu para sira bele hetan salvasaun, hau prontu simu. 4 Afinal ema Israel sira nee simu ona bensaun boot. Maromak hili ona sira sai Nia oan, Nia hatudu Nia naroman lalehan nian ba sira, Nia halo promesa oi-oin ho sira i foo Nia lei ba sira. Nia hanorin sira oinsaa atu adora Nia, i promete buat barak ba sira.✡Ézodu (Keluaran) 4:21, 14:22 5 Sira nia bei-ala sira naran boot. Tuir raan, Kristu nebee Maromak promete hori uluk atu haruka mai nee mos husi sira nia jerasaun. Maibee Kristu nee mos Maromak, Nia boot liu buat hotu-hotu. Mai ita hahii Nia too tinan ba tinan. Amen.✡Jénesis (Kejadian) 32:22-32
Nai Maromak hili ema tuir Nia hakarak rasik
6 Maski ema Israel barak seidauk simu Kristu, maibee keta hanoin dehan, Maromak la halo tuir Nia promesa. Tanba laos ema Israel hotu mak sai Maromak nia povu. 7 I laos ita nia bei-ala Abraão nia jerasaun hotu mak Maromak hili. Tanba Maromak dehan tiha ona ba Abraão, “Liu husi Isac mak o sei hetan jerasaun nebee Hau promete ona.”✡Jénesis (Kejadian) 21:12 8 Nee dehan katak, Maromak laos hili Abraão nia jerasaun tuir raan para sai Nia oan. Maibee Nia so hili deit jerasaun nebee mak Nia promete tiha ona atu foo. 9 Nia promesa mak nee: “Tinan oin Hau fila fali mai, o nia kaben Sara iha ona oan mane ida.”✡Jénesis (Kejadian) 18:10
10 Nunee mos ho ita nia bei-ala Isac ho nia kaben Rebeca, sira hetan oan mane kaduak. 11-12 Molok labarik sira nee moris, sira seidauk halo buat diak ka buat aat, maibee Maromak hatete ona ba Rebeca, “Maun sei serbi ba nia alin.” ✡Jénesis (Kejadian) 25:23 Nee hatudu katak, bainhira Maromak hili ema ida, Nia la haree ba ema nee nia hahalok, maibee Nia hili tuir Nia planu rasik. 13 Iha Livru Sagradu, Maromak dehan kona ba oan kaduak nee, “Hau hadomi Jacó, maibee Esaú lae.”✡Malakias 1:2-3
14 Nunee, ita atu dehan saida? Maromak tesi lia la loos ka? Laos nunee! 15 Uluk Maromak foo hatene ba Moisés dehan,
“Hau sei hatudu domin ba ema nebee mak Hau rasik hakarak hadomi.
I Hau sei hatudu Hau nia laran diak ba ema nebee mak Hau rasik hili.”✡Ézodu (Keluaran) 33:19
16 Nunee, Maromak nia domin la haree ba ita ema nia hakarak ka ita nia esforsu rasik, maibee Maromak hadomi tanba deit Nia laran luak. 17 Iha Livru Sagradu, Maromak dehan ba liurai Ejitu nunee: “Hau foti o sai liurai, tanba Hau hakarak uza o hodi hatudu Hau nia kbiit atu Hau nia naran sai boot iha mundu tomak.”✡Ézodu (Keluaran) 9:16 18 Nunee, se Maromak hakarak hatudu Nia domin ba ema ida, Nia halo deit. I se Nia hakarak halo ema ida nia fuan toos, Nia halo deit.✡Deuteronómiu (Ulangan) 7:7-9
Nai Maromak hirus ema balu i hadomi ema seluk, tuir Nia hakarak
19 Karik imi ida protesta mai hau dehan, “Se Maromak hakarak halo ita nunee, nusaa mak Nia foo sala nafatin mai ita? Ita atu kontra Nia hakarak la bele.” 20 Maibee o nee see fali mak brani koalia hasoru Maromak hanesan nee? O nee ema deit! Hanoin took, kuandu ema halo sanan rai, sanan nee la bele husu fali ba ema nee, “Nusaa mak o halo hau hanesan nee?”✡Isaias 29:16, 45:9 21 Ema nebee halo sanan rai, nia iha direitu atu halo sanan tuir nia hakarak. Husi rai mean kabuar ida, nia bele halo sanan rai oi-oin, balu diak nian, balu hodi uza ba foer fatin deit.
22 Maromak mos iha direitu nunee. Nia hakarak hatudu sai Nia kbiit boot hodi fakar Nia hirus ba ema nebee mak Nia atu kastigu, sira nee mak merese atu Nia harahun. Maski Nia atu kastigu sira, maibee Nia sei aguenta hela ho pasiensia. 23 Nia pasiensia lai ho sira nunee para hatudu ba ema hotu-hotu katak, Nia laran diak teb-tebes ba ita nebee mak Nia hadomi. Ita nee mak Nia prepara antes tiha ona atu aban-bainrua Nia sei foti aas ita. 24 Nia bolu ita nanis ona atu sai Nia ema. Nia laos bolu deit ema Judeu, maibee Nia bolu mos ema nebee laos Judeu. 25 Uluk profeta Oseias hakerek Maromak nia liafuan kona ba ema nebee mak laos Judeu nunee:
“Ema nebee uluk laos Hau nia povu,
Hau sei bolu ‘Hau nia povu.’
Ema nebee uluk Hau la hadomi,
Hau sei dehan, ‘Hau hadomi imi.’ ”✡Oseias (Hosea) 2:23
26 Nia mos hakerek nunee:
“Iha fatin nebee mak uluk Maromak dehan ba sira, ‘Imi laos Hau nia povu’,
iha fatin nee duni mak Maromak Moris sei bolu sira ‘Hau nia oan’.”✡Oseias (Hosea) 1:10
27 Maibee kona ba ema Israel, profeta Isaias halerik nunee:
“Ema Israel sira barak teb-tebes hanesan rai henek iha tasi ibun,
maibee uitoan deit mak sei hetan salvasaun.
28 Tanba too nia tempu, Nai Maromak sei hamonu kedas Nia kastigu mai mundu.
Nia sei la demora.”✡Isaias 10:22-23
29 Profeta Isaias mos foo hatene nanis ona kona ba ema Israel dehan,
“Se uluk Nai Maromak Kbiit Nain la husik ita nia povu balu moris karik,
entaun ita mate mohu ona hanesan ema iha sidade Sodoma ho Gomora.”✡Isaias 1:9
Ema Israel la konsege diak malu ho Nai Maromak tanba la fiar ba Nai Jesus
30 Nunee ita atu dehan saida? Ema nebee laos Judeu, sira uluk la hakaas aan atu diak malu ho Maromak. Too ikus Nia simu sira tanba sira fiar ba Jesus Kristu. 31 Maibee ema Israel hakaas aan moris tuir lei atu sira bele diak malu ho Maromak, i la konsege. 32 Nusaa mak sira la konsege? Tanba sira buka diak malu fali ho Nia liu husi sira nia hahalok rasik, laos liu husi fiar. Nee hanesan sira sidi ba fatuk. 33 Fatuk nee mak Jesus Kristu. Iha Livru Sagradu, Maromak koalia kona ba Jesus Kristu nunee:
“Haree ba! Hau tau hela fatuk ida
iha foho Siaun.
Fatuk nee halo ema sidi,
i halo sira monu.
Maibee see mak fiar ba Nia,
sira nia fiar la saugati.”✡Isaias 28:16
*9:3 Povu Israel nee mak povu Judeu.
✡9:4 Ézodu (Keluaran) 4:21, 14:22
✡9:5 Jénesis (Kejadian) 32:22-32
✡9:7 Jénesis (Kejadian) 21:12
✡9:9 Jénesis (Kejadian) 18:10
✡9:11-12 Jénesis (Kejadian) 25:23
✡9:13 Malakias 1:2-3
✡9:15 Ézodu (Keluaran) 33:19
✡9:17 Ézodu (Keluaran) 9:16
✡9:18 Deuteronómiu (Ulangan) 7:7-9
✡9:20 Isaias 29:16, 45:9
✡9:25 Oseias (Hosea) 2:23
✡9:26 Oseias (Hosea) 1:10
✡9:28 Isaias 10:22-23
✡9:29 Isaias 1:9
✡9:33 Isaias 28:16