12
Foo imi nia aan tomak ba Nai Maromak
1 Maun-alin sira, Maromak hatudu ona Nia laran luak ba ita. Nee duni hau husu atu foo imi nia aan tomak ba Nia hanesan sakrifisiu ida nebee sei moris, sakrifisiu ida nebee moos i halo haksolok Maromak nia laran. Liu husi hahalok nee mak imi adora Maromak ho lo-loos. 2 La bele halo tuir ema iha mundu nee nia hahalok. Maibee husik Maromak halo foun imi nia hanoin hodi muda imi nia laran. Nunee imi bele hatene lo-loos Maromak nia hakarak ba imi. Maromak nia hakarak nee buat ida nebee diak, loos i halo Nia laran haksolok.
3 Tanba Maromak hatudu Nia laran diak mai hau too Nia hili hau sai apostolu, hau foo hanoin ba imi ida-ida: La bele foti aan. Diak liu kompriende kbiit nebee mak Maromak foo tiha ona ba imi ida-idak tanba imi nia fiar, atu nunee imi bele hatene imi nia aan.
4 Hau foo ezemplu ida husi ema nia isin lolon. Isin lolon ida iha parte oi-oin, i parte ida-idak nia knaar la hanesan. 5 Nunee mos ita sarani sira. Ita barak, maibee tanba ita laran ida ho Kristu, ita hamutuk hanesan isin lolon ida deit.✡1 Korintu 12:12 6 Maromak foo kbiit ba ita ida-ida, tuir Nia laran diak. Kbiit nebee ita simu nee la hanesan. Ema nebee mak simu kbiit atu foo tutan Maromak nia lia menon, nia tenki koalia tuir liafuan nebee mak nia fiar katak Maromak foo tiha ona ba nia. 7 Ema nebee simu kbiit atu serbi ema seluk, nia tenki serbi duni. Ema nebee mak simu kbiit atu hanorin, nia tenki hanorin. 8 Ema nebee mak simu kbiit atu hametin ema nia laran, nia tenki halo nunee. Ema nebee mak simu kbiit atu foo tulun ba ema seluk ho buat nebee mak nia iha, nia tenki foo ho laran. Ema nebee simu kbiit atu sai responsavel, nia tenki sai responsavel nebee badinas. Ema nebee mak simu kbiit atu ajuda ema seluk nebee susar, nia tenki ajuda ho laran haksolok.✡1 Korintu 12:4-11
Halo diak ba malu
9 Hatudu imi nia domin lo-loos ba ema seluk, la bele finji. Hakribi buat nebee aat, kaer metin buat nebee mak diak. 10 Hadomi malu hanesan maun-alin. Haraik aan hodi hatudu respeitu ba malu. 11 La bele baruk, maibee foo aan serbi Nai Jesus nafatin ho laran tomak. 12 Imi tenki haksolok tanba imi laran metin ba Maromak. Aguenta ho pasiensia iha susar laran. Halo orasaun beibeik. 13 Uza buat nebee imi iha hodi ajuda maluk sarani sira nebee presiza. Simu ema seluk iha imi nia uma ho laran tomak.
14 Se iha ema ruma halo terus imi, husu atu Maromak foo bensaun ba sira. Tenki husu bensaun, la bele husu atu Nia foo malisan.✡Mateus 5:44; Lucas 6:28 15 Se iha ema ruma laran kontenti, kontenti hamutuk ho sira ba. I se iha ema ruma tanis tanba tristi, tanis hamutuk ho sira ba. 16 Imi tenki moris neon ida, laran ida. La bele halo aan, maibee hamaluk ema kiik. Keta foti aan dehan, o mesak mak hatene.✡Provérbiu (Amsal) 3:7
17 Se ema ruma halo buat aat ba imi, la bele halo aat fali ba ema nee. Hakaas aan halo buat nebee ema seluk mos konsidera diak. 18 Esforsu aan halo o nia parte atu moris dame malu ho ema hotu-hotu.
19 Maluk doben sira, la bele halo aat ba ema nebee mak halo aat imi. Husik atu Maromak foo kastigu sira. Tanba iha Livru Sagradu hakerek ona,
“Nai Maromak dehan,
‘Hau mak iha direitu atu foo kastigu ema,
ema nebee mak halo aat imi, Hau mak foo kastigu.’ ”✡Deuteronómiu (Ulangan) 32:35
20 Maibee imi tenki moris tuir liafuan nebee dehan,
“Se o nia inimigu hamlaha, foo hahaan ba nia.
Se nia hamrook, foo nia hemu.
Se o halo nunee, nia sei moe.”*Iha nee Paulo hakerek dehan, “o sei tau ahi klaak iha nia ulun leten.” Tuir matenek nain kona ba Biblia, liafuan nee dehan, o halo nia senti moe. ✡Salmus (Mazmur) 140:10; Provérbiu (Amsal) 25:21-22
21 Entaun keta husik buat aat manaan imi. Maibee halo beibeik buat diak, atu nunee imi bele halakon buat aat.
✡12:14 Mateus 5:44; Lucas 6:28
✡12:16 Provérbiu (Amsal) 3:7
✡12:19 Deuteronómiu (Ulangan) 32:35
*12:20 Iha nee Paulo hakerek dehan, “o sei tau ahi klaak iha nia ulun leten.” Tuir matenek nain kona ba Biblia, liafuan nee dehan, o halo nia senti moe.
✡12:20 Salmus (Mazmur) 140:10; Provérbiu (Amsal) 25:21-22