5
Ty Andro’i Talè
Aa ty amo androo naho o sa-ao, ry longo, tsy paia’ areo ho sokireñe. Fa toe fohi’ areo t’ie ho tondroke manahake ty mpamaoke haleñe ty andro’ i Talè. Ie manao ty hoe, Fierañerañañe naho Fañanintsiñe! te mone hiambotrahan-karo­tsahañe, manahake ty fitsongoan-drakemba mivesatse, ie tsy hahabolititse. Fe tsy añ’ieñe ao nahareo ry longo, hivovoa’ i andro zay hoe malaso. F’ie songa an-kazavàñe naho ana’ ty atoandro, tsy mpiamo haleñeo ndra o fimoromoroñañeo. Aa ee t’ie tsy hirotse, manahake o ila’eo, fa hitao naho hilie-batañe. Mirotse haleñe o miro­tseo naho mamo haleñe o mpijikeo. Aa kanao mpiamo atoandroo, antao ho marea, hampi­tsetake ty fikalañan’ arañam-patokisañe naho fikokoañe vaho hisabaka i fitamàm-pandrombahañey* Ies 59:17.
Tsy tinendren’ Añahare ho an-kaviñerañe tika, fa t’ie ho rombaheñe añamy Talèntika Iesoà Norizañey, 10 ie nivilasy ho antikañe, le he mañente ke mirotse ro hitraofan-tika haveloñe. 11 Aa le mifañosiha, naho mifampiraoraòa, hambañe ami’ty fanoe’ areo avao.
Fañaveloañe Masiñe
12 Mihalaly ama’ areo zahay, ry longo, ty hiasia’ areo o mpifanehake ama’ areo naho mpifehe vaho mpanoro anahareoo amy Talè ao. 13 Le aonjono am-pikokoañe o fitoloña’ iareoo, vaho mifampilongoa. 14 Risihe’ay nahareo ry longo, hatahatào o mañarinjeñeo, ohoño o mimoremo­retseo, imbao o midazidazìtseo vaho hene ilofiho. 15 Asoao tsy hamalean-draty ty raty ndra ama’ ia ia, fe paiao nainai’e ty hañasoa ty ila’e naho ze fonga ondaty. 16 Mirebeha avao, 17 Mihalalia nainai’e, 18 kila andriañeñe; fa zay ty satrin’ Añahare ho anahareo am’ Iesoà Norizañey. 19 Ko akipeke ty Arofo. 20 Ko mavoeñe o fitokiañeo, 21 fa biribirio ze he’e; tambozoro ty soa. 22 Ifoneño ze atao haratiañe.
Figadoñañe
23 I Andrianañaharem-pañanintsiñey abey ro hañeneke ty fiavaha’areo, hañaro ty arofo naho ty fiaiñe vaho ty sandri’ areo ho fonitse tsy aman-kila amy fito­tsaha’ i Talèntika Iesoà Norizañeiy. 24 Migahiñe t’i mikanjy anahareo, Ie ro hañeneke zay.
25 Ry rahalahio, mihalalia ho anay. 26 Añontaneo an’ oroke miavake o longo iabio, 27 Afantoko ama’ areo amy Talè ty hamaky ty taratasy toy amo longo iabio. 28 Ho ama’ areo abey ty hasoa’ i Talèntika Iesoà Norizañey.

*5:8 Ies 59:17