23
1 Zao ty figadoñam-petse’ i Davide,
Hoe t’i Davide ana’ Iesý;
inao ty saontsi’ indaty naonjoñe añ’aboy,
i norizan’Andrianañahare’ Iakobey,
i mpibeko mami’ Israeley.
2 Nitsara añamako ty Arofo’ Iehovà,
tan-delako i lañona’ey.
3 Nitaroñe t’i Andrianañahare’ Israele; nitsara amako t’i Maoza’ Israeley;
Tsi-mete tsy mahity ty hifelek’ ondatio
hifehe am-pañeveñañe aman’ Añahare,
4 le manahake ty hazavàñe maraindray
te manjirik’andro,
handro tsy aman-drahoñe,
ahetse maindoñ’indoñe boak’ an-tane
ty amy tariñandrokey naho i orañey.
5 Tsy izay hao ty anjombako aman’ Añahare,
t’ie nanao fañina amako tsy ho modo?
Hene milahatse naho mijadoñe
ty fandrombahañe ahy naho ze fitamàko iaby?
Tsy hampitiria’e tsampa’e hao?
6 Fe o lo-tserekeo,
le hambañe ami’ty anoeñe o fatikeo,
ie aveve añe, fa tsy lefe rambesem-pitàñe,
7 naho tsy minday vy reke-tara-defoñe
t’indaty hipaok’ aze;
vaho forototoeñe an-toe’e eo.
8 Zao o tahinam-panalolahy nimpiamy Davideo: Iosefe-basebete nte-Takemone, mpifelek’ o mpifeheo natao Adino nte-Ezný, ie nanjamañe valon-jato te indraike. 9 Nanonjohy aze t’i Eleatsare ana’ i Dodo ana’ t’i nte-Akoke, ty raik’ amo fanalolahy telo’ i Davideo; ie niatreatre o nte-Pilisty nifanontoñe hialio naho fa nienga iaby o ana’ Israeleo. 10 Niongake re nanjevoñe nte-Pilisty am-para’ te nimokotse ty sira’e, naho nipitek’ amy fibaray ty fità’e; vaho nañeneke fandreketañe jabajaba t’Iehovà amy andro zay; aa kanao nibalike nañorik’ aze ondatio, le t’ie hikopak’ avao. 11 Nanonjohy aze t’i Samà ana’i Agè nte-Karare. Ie nifandrimboñe an-tane lifotse mahalay ey o nte-Pilistio, naho fa nitriban-day amo nte-Pilistio ondatio, 12 t’ie nijohañe añivo’ i tetekey, nitañ’ aze vaho nandafa o nte-Pilistio; ie nihenefe’ Iehovà ty fandreketam-bey. 13 Telo amo mpiaolo telo-poloo ty nizotso mb’eo vaho nivotrak’ amy Davide an-tsam-pitatahañe an-dakato’ i Adolame ao; ie nitobe ambavatane’ o nte-Refao o nte-Pilistio. 14 Tam-pipalirañe ao t’i Davide naho e Betlekheme añe o nte-Pilistio henane zay. 15 Nisalala ami’ty hoe t’i Davide, Ehe t’ie ho nanjotsoan-drano boak’ am-bovo’ i Betlekheme marine i lalambeiy! 16 Aa le niboroboñafe’ i fanalolahy rey ty valobohòn-te Pilisty naho nitari-drano amy vovom-Betlekheme, marine i lalambeiy; nendese’ iereo vaho nazotso’ iereo amy Davide, f’ie tsy nete nikama, te mone nadoa’e am’ Iehovà. 17 Fa hoe re, Ee te ho lavitse ahy, ry Iehovà, ty hanao zao. Hinomeko hao ty lio’ ondaty namoe ay amy liaio? aa le tsy nete nikama aze. Izay ty nisata’ i fanalolahy telo rey. 18 Miaolo i telo rey t’i Abisay rahalahi’ Ioabe, ana’ i Tseroia. Ie ty nañonjon-defoñe ami’ty telon-jato naho nanjamañe ie iaby, vaho nandrambe tahinañe amy telo rey. 19 Tsy ie hao ty nanan-kasy amy telo rey? aa le nanoeñe mpifehe’ iareo, fe tsy nitaka’e i telo valoha’e rey. 20 Teo ka t’i Benaià ana’ Iehoiadà, ana’ty fanalolahy nte-Kab’tsele; ie ka ty nanao raha nanjofake: zinevo’e ty ana-dahi’ roe’ i Ariele nte-Moabe; nizotso mb’ an-kadaha ao ka re namono liona an-tsam-panala. 21 Vinono’e ka t’i nte-Mitsraime, ondaty manjofake. Nitan-defoñe am-pità’e i nte-Mitsraimey, f’ie nizotso mb’ ama’e ao ninday kobaiñe, napotsoa’e am-pità’ i nte-Mitsraimey i lefo’ey, vaho zinevo’e amy lefo’ey. 22 Sata’ i Benaià ana’ Iehoiadà i hoe zay vaho nahazoa’e tahinañe amy fanalolahy telo rey. 23 Ie ty nanan-kasy amy telo-polo rey, fe tsy nahatakatse i telo valoha’e rey. Nampifehè’ i Davide aze o mpigari’eo. 24 Mpiamy telo-polo rey t’i Asaele rahalahi’ Ioabe, i Elkanane ana’ i Dodo nte Betlekheme, 25 i Samà nte-Karode, i Elikà nte-Karode, 26 i Keletse nte-Paltý, Irà ana’ Ikese nte-Tekoà, 27 i Abiezere nte Anetote, i Mebonay nte-Kosà, 28 i Tsalmone Akoake, i Maharay nte-Netofà, 29 I Kelebe Banà, nte-Netofà, Itaiy ana’ i Ribay nte-Gibà boak’ amo ana’ i Beniamineo, 30 I Benaià amo Piratoneo, i Hidaý boak’an-toraha’ i Gase, 31 i Abialebone nte-Bete-Arabà, i Azmavete nte Barekorime, 32 i Eliabà nte Sa-albine, tamo ana’ Iasene, Iehonatane, 33 i Samà nte-Hararý, i Akiame ana’ i Sarare nte-Hararý, 34 i Elifelete ana’ i Akasbaý, ana’ i nte-Maakày, i Eliame ana’ i Akitofele nte-Gilone, 35 i Ketsrò nte-Karmele, i Paaray nte-Arabe, 36 Igale ana’ i Natane nte-Tsobà, i Baný ana’ i nte-Gade, 37 i Tseleke nte-Amone, i Nakarahý nte-Be-erote mpindai-pikala’ Ioabe ana’ i Tseroià, 38 Irà nte-Ietere, i Garebe nte Ietere, 39 i Orià nte-Kete: ie i telo-polo-fito’ amby rey.
DRAFT VERSION