1 Honka’e ry longo, mihalalia ho anay te hiboele masika ty tsara’ i Talè, naho ho rengeñe manahake te ama’ areo añe, 2 vaho t’ie ho votsorañe am’ondaty lo-tsereke naho tsivokatseo amy te tsy songa mpiato. 3 Fe migahiñe t’i Talè, ie ty hañoreñe naho hikalañe anahareo amy ratiy. 4 Atokisa’ay amy Talè ao t’ie fa manao mbore hanoeñe o fandilia’aio. 5 Aa ehe te ho tehafe’ i Talè mb’ amy fikokoan’ Añaharey naho mb’amy figahiña’ i Norizañey ty arofo’ areo.

6 Ie amy zao ry longo, lilie’ay ami’ty tahina’ i Talèntika Iesoà Norizañey, t’ie hisitake amy ze longo mañavelo an-kelokeloke, tsy amy fañòhañe rinambe’e ama’aiy. 7 Fa fohi’ areo soa ty fitsikombeañ’ anay, ie tsy nikopiso, 8 mbore tsy nikama ty mahakama’ ondaty tsy vinili’ay fe nitromake naho nifanehake handro an-kaleñe, tsy hampivavea’ay, 9 tsy t’ie tsy nanandily, fe nanolo-batañe hitsikombea’ areo. 10 Ie mbe tama’ areo le nililie’ay ami’ty hoe: Ehe tsy hikama ty tsy mete mitoloñe. 11 Fa tsinano’ay te ama’ areo ty tsy mahalie-batañe, tsy mitoloñe, fa mirañadrañake avao. 12 Le hoe ty lilie’ay naho osihe’ay amy Talèntika Iesoà Norizañey o manao zaio: soa re te hitoloñe am-pianjiñañe naho hikama o azeo. 13 Ie amy zao ry longo, ko milesa am-panoan-tsoa. 14 Aa naho eo ty tsy mañaoñe o enta’ay ami’ty taratasy toio, le rendreho vaho ko itraofañe, hisalara’e, 15 f’ie ko anoe’ areo rafelahy, fa torò amy t’ie longo.

16 I Talèm-pierañerañañey abey ro hampanintsiñe anahareo nainai’e amy ze sata-soa iaby. Ho ama’ areo abey t’i Talè. 17 Ingo ty fañontanean-tañako, izaho Paoly, ty viloko amo taratasiko iabio, zao o sokikoo.

18 Ty hasoa’ i Talèn-tika Iesoà Norizañey ho ama’ areo iaby.

Amena.