1 Mijanjiña ty nitsarà’ Iehovà

ry ana’ Israeleo,

ry hene foko nakareko

an-tane’ i Mitsraimeo, ami’ty hoe: 2 Inahareo avao ty napotako amo kila

foko ty tane toio;

aa le fonga havaleko ama’ areo

o hakeo’ areoo. 3 Mahay miharo lia hao ty roe

naho tsy milahatse hey? 4 Hitroñe añ’ala ao hao ty liona

naho tsy aman-tsàtsa’e?

Hañaolo boak’ an-dakato’e ao hao

ty liona tora’e naho tsy nahatsepake? 5 Mete hikoropok’ am-pandri-bo

an-tane eo hao ty voroñe,

naho tsy ama’e ty fitake?

Hidraitse an-tane eo hao i bitsokey,

ie tsy aman-ko tsepaheñe? 6 Naho tiofeñe an-drova ao i antsivay,

tsy hangebahebake hao ondatio?

Ie hizò hankàñe ty rova,

tsy ho sata’ Iehovà hao? 7 Toe tsy hanao ndra inoñ’inoñe

t’Iehovà, Talè, naho tsy borahe’e

amo mpitoro’e mpitokio heike

o safiri’e mietakeo. 8 Fa nitroñe i lionay,

ia ty tsy ho hembañe?

Fa nitsara t’Iehovà, Talè,

ia ty tsy hitoky? 9 Tseizo amo anjomba’ i Asdodeo

naho amo anjomba an-tane’

Mitsraime añeo ty hoe:

mitontona am-bohi’ i Somerone eo,

naho mahaisaha ty fifandraparapahañe añivo’e ao vaho o forekekeñe ama’e aoo. 10 Fa tsy fohi’ iareo ty hanao ty hiti’e,

hoe t’Iehovà,

ie mañaja fikatramoañe, naho fampikamerañe añ’anjomba’ iareo ao. 11 Aa hoe t’Iehovà, Talè:

Hiarikatohe’ ty rafelahy i taney

naho harotsa’e o hafatrara’oo,

vaho ho kopahe’e o anjomba’oo. 12 Hoe t’i Iehovà:

Manahake ty añakara’ ty mpiarake

ami’ty montsilin-diona

ty tombo’e roe ndra ty silan-tsofi’e,

ty haneseañe o ana’ Israele

mimoneñe e Someroneo,

reketse ty indran-tihy

ndra ty tombom-pandreañe. 13 Mijanjiña, le asisio ty anjomba’ Iakobe,

hoe t’Iehovà, Talè Andrianañahare’ i màroy;

14 fa amy andro hañondrohako

o fiolà’ Israeleoy,

le ho valeako o kitreli’ i Beteleo*Betele: Anjomba mandrifondrifoñe,

naho ho kitsifañe i tsifan-kitrely rey

vaho hipok’ an-tane eo. 15 Hatraoko lafa i anjomban’asaray

naho i anjomban’asotriy,

hikoromake ka o anjomba aman-tsifao;

toe hirotsake o anjomba jabajabao,

hoe t’Iehovà.