32
Janjiño ry tane toy o entam-bavakoo.
2 Ee te himiamia manahake ty fiavi’ i orañey o tarokoo,
le hitsopatsopake hoe zono o rehakoo, hambañe ami’ty fimitemiteha’e amo ahetseo naho ty finiziniziha’e amo rongoñeo.
3 Fa ho tseizeko ty tahina’ Iehovà,
onjono ty hara’elahi’
i Andrianañaharen-tikañey.
4 I Lamilamiy: Fiaintane o fitoloña’eo,
hene marentane o lala’eo:
Andrianañahare migahiñe tsy aman-tahy,
vañoñe naho vantañe.
5 Fa nanoa’iareo hamengohañe,
toe tsy ana’e ty amy hila’ iareo,
ty tariratse vìlañe naho mengoke tia.
6 Zay hao ty añavaha’ areo am’ Iehovà ry dagola, ry ondaty tsi-mahilalao? tsy ie hao ty Rae’o nivily azo?
Tsy ie hao ty nitsene azo,
vaho nañoreñ’ azo?
7 Tiahio o andro haehaeo;
haraharao o taon-tariratse tsi-efao,
añontaneo aman-drae’o hanoroa’e,
naho aman-androanavi’o hitaroña’iareo.
8 Ie zinara’ i Andindimoneñey amo rofokoo ty lova’ iareo;
naho naparaita’e o ana’ i Dameo,
le nefetsefere’e
ty ami’ty ia’ o ana’ Israeleo.
9 Fa anjara’ Iehovà ondati’eo;
Iakobe ro anjara’ lova’e.
10 Nifanendrek’ama’e an-diolio añe re,
am-babangoañe mangoañe mangolalaik’ ao;
nohoñe’e naho niatrak’aze,
nambena’e hoe t’ie saintem-pihaino’e* Zek 2:8.
11 Hoe vantio mitsobore ty traño’e,
mihefahefa ambone’ o ana’eo,
akopakopa’e o ela’eo,
vaho rambese’e añ’ela’eo,
12 Iehovà avao ty niaolo aze,
ie tsy ama‘ndrahare ila’e.
13 Nampijoñe’e ambonen-kaboa’
ty tane toy,
le nihinana’e ty voka’ o tetekeo;
nampininihe’e tantele an-tevañe ao,
naho menake am-bato-paik’ ao;
14 Habobon’añombe naho rononon’ose,
ty safom-bik’ añondry,
le ty kobatron- dia-rain-tirim-Basaneo,
o ose-lahio reketse
ty safom-boam-bare-bolè;
aman-diom-baloboke
ty ninoma’o divay mamore.
15 Fe niha-vondrake t’Iesorone† Iesorone: Tahina rai’ Israely
le nikambia; niha-vondrake rehe,
niha-mateve, vaho nisometsètse;
napo’e t’i Andrianañahare nitsene aze,
namoea’e i Lamilamim-pandrombahañ’azey.
16 Nitrabihe’ iareo, hamarahia’e
o ‘ndrahare ila’eo,
nanikisiky aze an-draha tiva.
17 Nisoroña’ iereo amo kokolampao,
amo ndrahare tsi’ieo
‘ndrahare tsy nifohi’ iareo,
‘ndrahare vaho niboak’ aniany
tsy nampañeveñe an-droae’ areo.
18 Namoea’o ty Lamilamy nampiareñe azo,
nandikofa’o t’i Andrianañahare niolakolak’ am-pitsongoañe azo.
19 Ie nivazohoe’ Iehovà, le niambohoa’e,
ami’ty fanigiha’ o ana-dahi’eo
naho o anak’ampela’eo.
20 Le hoe re: Haetako am’ iereo ty tareheko,
ho treako ty fimodoa’ iareo,
fa tariratse mengoke, ajaja tsy atokisañe.
21 Nampamarahy ahiko iereo,
amo ‘ndrahare tsie’eo;
sigi’ iareo amo samposampon-drahao ty habosehako
aa le hampamarahieko ondati-tsie iereo;
hampisigiheko foko mengoke.
22 Afo misolebotse ty an-doakoroko ao,
mamorototo pak’ an-tsikeokeom-paha-sive ao,
ampangotomomohe’e ty tane toy
naho o vorohota’eo,
ampirehete’e o faham-bohitseo.
23 Hañoboñako hekoheko,
Ho kapaiheko am’ iereo o ana-palekoo.
24 Ho sihe’ ty halimpoañe iereo,
habotse’ ty lel-afo;
naho ty harotsahañe mafaitse.
Hiraheko ama’e ty famotsim-biby,
ty vorehe’ o milaly an-debokeo.
25 Hampandala ty fibara o alafe’eo,
firevendreveñañe ty añate ao
songa zamane’e ty ajalahy
naho ty tomoenono, ty anak’ajaja,
vaho ty androanavy ama-maroi-foty.
26 Nataoko ho nampimodoeko,
vaho ho najiheko am’ondatio
ty faniahiañe iareo.
27 Fe nimahimahiñeko
ty fiforoforon-drafelahi’e,
hera ho hafa hente o malaiñe iareoo,
kera hanao ty hoe:
Ty fità’ay ro abo, fa tsy:
Iehovà ty nanao ie iaby zao.
28 Fifeheañe po-anatse iereo,
toe ondaty po-faharendrehañe.
29 Ee t’ie ho nahihitse,
soa te ho naharendreke,
le ho nitsikarahe’iareo ty figadoña’e.
30 Akore ty hañinjafa’ ty raike ty arivo, ty hampivoratsahe’ ty roe ty aman’ale’e, naho tsy naleta’ i Lamilami’ iareoy, naho tsy Iehovà ty nanese iereo?
31 Toe tsy i Lamilami’aiy ty vato’ iareo,
ndra o rafelahi’aio ro mahatsikarake zay.
32 Boak’ am-bahe’ i Sedome ty vahe’ iareo,
boak’an-tete’ i Amorà ao;
valòbok’ afero ty valòbo’ iareo, mafaitse ty angaroza’ iareo;
33 vorem-pañaneñe ty divai’ iareo
ty voren-kankàm-pandrefeala.
34 Tsy mihaja amako ao hao zao?
he mihily an-korojiko ao?
35 Ahiko o vale-fateo naho ty avake;
mbe hibolatitse o fandia’ iareoo,
fa antitotse ty andron-kankà’ iareo,
vaho malisa ty fihelaña’ o hifetsak’ am’iereoo.
36 Iehovà ty hizaka ondati’eo
le hiferenaiña’e o mpitoro’eo
ie vazoho’e te ritse ty haozara’e
naho tsy aman-tsehanga’e,
ke ty mirohy he ty midada;
37 Le hanao ty hoe re:
Aia o ndrahare’ iareoo,
i vato niatoa’ iareoy?
38 Ia ty nilintseñe ty safom-pisoroña’ iareo,
naho nigenoke ty divain-enga rano’e?
angao hitroatse iereo hañolora’e anahareo.
Apoho re ho fitsoloha’ iareo.
39 Inao te zaho, zaho avao ro ie,
tsy ama’ ndrahare hatovoñ’ahy:
zaho ty mamono, zaho ty mameloñe;
mandratse raho le mañamelañe;
tsy eo ty mahasintoñe ty an-tañako.
40 Aonjoko mb’andikerañe ey ty tañako
manao ty hoe, veloñe nainai’e raho.
41 Ie sioñeko i fibarako mipelatsey,
naho mandrambe zaka ty tañako;
le ho valeako o rafelahikoo,
vaho hondroheko o malaiñ’ Ahikoo.
42 Ho mamoeko an-dio o ana-palekoo,
le hamotseke nofotse ty fibarako;
ty lio’ o zinamañeo naho o an-drohio;
boak’ an-doha miogogo’
o mpiaolo’ i rafelahiio.
43 Ipoñafo sabo ondati’eo, ry kilakila ondaty,
fa ho valea’e fate ty lio’ o mpitoro’eo,
le havaha’e an-keloke o rafelahi’eo,
vaho ho jebañe’e ty tane ondati’eo.
44 Nimb’eo amy zao t’i Mosè vaho hene nisaontsie’e an-tsabo an-dravembia’ ondatio i tsara zay, ie naho Iehosoa ana’ i None. 45 Aa ie nagado’ i Mosè i hene fitaroña’e am’ Israele rezay, 46 le hoe re am’ iereo: Fonga faharo añ’ arofo’ areo ao ze tsara taroñeko androany, le ampañambeno o amori’ areoo o hene enta’ ty Hake toio, hañorike ze hene tsara amy Hake ao. 47 Ko atao’ areo ho tsara kafoake ama’ areo, amy t’ie o havelo’ areoo, le ama’e ty hahalava andro anahareo amy tane añaveloa’ areo ampitsahañe Iardeney hitavana’ areoy.
48 Le hoe ty nitsara’ Iehovà amy Mosè amy andro zay. 49 Mañambonea mb’am-bohitse Avarime mb’eo pak’ am-bohi-Nebo an-tane’ i Moabe tandrife Ieriko añe; le isaho ty tane’ Kanàne atoloko amo ana’ Israeleo ho fanañañe; 50 le mihomaha amy vohitse itroara’oy, hitontona’o am’ondati’oo, hambañe ami’ty nivetraha’ i Aharone, rahalahi’o e Hore añe vaho nifanontoñe am’ondati’eo; 51 amy t’ie nandilatse amako añivo’ o ana’ Israeleo an-drano’ i Meribà-Kadese eo, an-dratraratra’ i Zine añe; zaho tsy navahe’o añivo’ o ana’ Israeleo. 52 Ho talake’o eñe i taney, fe tsy homba’o o tane atoloko amo ana’ Israeleoo.
DRAFT VERSION