Mpañoke
1
1 Ty taro’ i Mpañokey,
ana’ i Davide, mpanjaka e Ierosalaime ao.
2 Hakafoahan-kafoake, hoe i Mpañokey,
Hakafoahan-kafoake! Fonga kafoake!
3 Ino ty tombo’e ho a ondatio
amo fifanehafa’e ambane’ i àndroy?
4 Mihelañe ty tariratse raike,
mbore limbezen-tariratse,
fe nainai’e eo ty tane toy.
5 Manjirike ka i àndroy,
mitsofotse i àndroy,
mihiririñe mb’am-panjiriha’e añe.
6 Mitioke mañatimo,
le mibalike mañavaratse;
mikariokariok’ avao i tiokey,
vaho mimpoly amo fiaria’eo.
7 Songa mivariñe mb’an-driake mb’eo
o sakao fe tsy atseke i riakey;
mb’amy fikararaha’ o torahañeoy,
le mb’eo avao ty fikararaha’ iareo.
8 Hene mahamamake,
tsy lefe’ ondaty volañeñe,
tsy mahaetsa-pihaino t’ie vazoho,
mbore tsy mahaenen-dravembia
te ijanjiñañe.
9 Mbe ho avy indraike i fa añey,
naho mbe hanoeñe avao ze fa nanoeñe,
vaho tsy ambane’ i àndroy
ty atao vao.
10 Eo hao ty mete hanoeñe ty hoe,
Heheke! vao itoy? Ie fa teo avao,
haehae taolon-tikañe añe.
11 Tsy tiahy o raha taoloo,
naho o raha hifetsakeo,
vaho tsy hahatiahy irezay
o hanonjohio.
12 Zaho, i mpañokey, le fa mpanjaka Israele e Ierosalaime ao, 13 le nimanean-troko ty hañotsohotso naho hikodebe an-kihitse ze hene fitoloñañe ambanen-dikerañe atoa; toe tolon-draha mahamokotse ty natolon’ Añahare am’ondatio hifanehafa’e. 14 Nitreako iaby ze fitoloñañe ambane’ i àndroy; le hehe t’ie fonga kafoake vaho fañeañan-tioke.
15 Tsy mete ahity ty mengoke,
vaho tsy lefe iaheñe ty tsy eo.
16 Hoe raho am-batako: Ingo fa natontoko mandikoatse ze hene mpifehe’ Ierosalaime taolo ahy ty fahaoniñañe ra’elahy; vaho nandifotse ty troko ty hihitse naho hilala. 17 Le nampitoloñeko ty troko hahaoniña’e hihitse naho hahafohiñe ty hadagolà naho ty hagegeañe. Nirendreko t’ie fañeañan-tioke ka.
18 Amy te minday hasosoram-bey
ty hihitse maro,
vaho mampitombo haoreañe
ty fitomboan-kilala.
DRAFT VERSION