Efesosy
1
I Paoly, Firàhe’ Iesoà Norizañey ty amy satrin’ Añahare. Ho amo noro’e Efesosy añe naho migahiñe am’ Iesoà Norizañeio.
Hasoa ama’ areo naho Fañanintsiñe boak’ aman’ Añahare Raentika naho Iesoà Talè Norizañey.
Jinobon-dRae
Andriañeñe t’i Andrianañahare naho Rae’ i Talèntika Iesoà Norizañey, i mitahy antika amy Norizañey amy ze hene falalàn’ arofo andin­dìñe ao, ie nijoboñe’e ho ama’e taolo’ o mananta’ ty voatse toio, am-pikokoañe ho masiñe tsy aman-kakeo añatrefa’e* Te I 2:13, ie nisafiry haehae ho antika te ho beize’e ho ana’e añam’ Iesoà Norizañey, ty amy hasoam-pisafiria’ey. Ho fandrengeañe ty volonahem-patarihañe nañisoha’e antika amy Ikokoañey.
Jineba’ i Anakey
Ama’e ty fañeferañe antika amy lio’ey, ty fañahan-kakeo ty amy hasoam-pañisoha’e nampitoabore’e aman-tika an-kaliforan-kihitse naho faharofoanañe, ie nampahafohine’e i safiry nisatrie’e añ’etake ao, 10 ze ho henefe’e an-tsà añoñe: ty fanontonañe amy Norizañey ze he’e andi­ndìñe añe naho an-tane atoy. 11 Ie ka ty nahazoan-tika lova—itika nijoboñeñe haehae ami’ty fandrefea’ i mañeneke ze he’e ami’ty ereñeren-tsatrin’ arofo’ey, 12 soa te ho fandrengeañe i asi’ey tika nitamà i Norizañey valoha’e.
Pinate’i Arofoy
13 Ama’e ao ka nahareo ie jinanji’ areo ty tsaran-katò, i talili-soa nandrombahañe anahareoy, ie niatoa’ areo ro vinoli-fitomboke amy Arofo Masiñe nampitamaeñey; 14 i natolotse ho tsoa’ i lovantikañeiy ampara’ ty fijebañañe o azeo, ho ami’ty fandrengeañe mañeva i asi’ey.
Fañandriañañe naho Halaly
15 Aa zaho ka, ie tsinanoko ty fatokisañe Iesoà Talè ama’ areo, naho ty fikokoa’ areo o noro’e iabio, 16 le tsy adoko ty fañandriañañe ty ama’ areo, ie toñonako an-kalàliko 17 te ho toloran’ Añaharen-Talèntika Iesoà Norizañey, i Raem-bolonahetsey, ty Arofon-kihihitse naho famentabentarañe hahafohinañe aze, 18 naho te ho hazavaeñe o fihainon’ arofo’ areoo Lke 24:45, hahafohina’ areo i fampitamàñe nikanjiañe anahareoy, naho ty vara aman’ enge’ i lova’e amo noro’eoy, 19 vaho ty hajabahinan-kaozara’e amantika mpiato, ty amy fitoloña’ i haozaran-kafatrara’e 20 nifanehafa’e amy Norizañeiy, ie vinaño’e an-kavilasy vaho nampiambesare’e am-pitàn-kavana’e andindìñe ao, 21 ambone andikera’ ze hene lily naho haozarañe naho fifeheañe vaho ze kila tahinañe toñoneñe, tsy ami’ty sa toy avao, fa amy ho aviy ka. 22 Mbore napo’e ambanem-pandia’e ao ze he’e Sab 8:6, vaho natolo’e aze ty ho lohà’ ze halifora’e amo Fivorio — 23 i fañòva’ey, ty hahenefa’ i mañatseke ze he’e an-kalifora’ey.

*1:4 Te I 2:13

1:18 Lke 24:45

1:22 Sab 8:6