1 Hijohañe am-pijilovako eo iraho,

hijadoñe am-pitalakesañ’ abo ey,

hañilo mb’alafe’e mb’eo

handrèndreke ze ho tsarae’e amako,

naho ze hatoiko t’ie hiveroke.

2 Nanoiñe ahy t’Iehovà ami’ty hoe:

Sokiro i aroñaroñey,

bakabakafo an-takelake,

hahavakia’ondaty milay.

3 Ho amy andro namantañañ’ azey i tokiy,

i figadoñañey ro enta’e,

le tsy handañitse

ndra t’ie tambatse, liñiso,

toe ho tondroke le tsy hihenekeneke.

4 Heheke ty miebotsebots’ an-troke,

tsy vañoñe ty ama’e ao;

fe veloñe amy fatokisa’ey ty vantañe.

5 Mbore fañahie’ ty divay ty mpirengevoke

tsy ho tamàñe añ’akiba’e ao,

fa ampienare’e hoe i Tsikeokeokey

ty fañiria’e, manahake o vilasio

t’ie tsy mb’ia tsy etsake,

fa atonto’e ama’e ze hene fifeheañe,

ampitoabore’e ama’e ze kila ondaty.

6 Aa vaho tsy songa handrambe

razan-drehake ama’e irezay,

handrabioñe aze an-titse,

ami’ty hoe: Hankàñe

amy nanontoñe ty tsy azey!

akore ty hatrela’ ty nilogologoa’e tsoake!

7 Tsy hitroatse amy zao hao

o mipay avak’ ama’oo?

tsy ho tsekake hao o mampi­nevenevetse azo?

ihe ho fikopaha’e.

8 Aa kanao nikopahe’o o kilakila’ondatio,

le ho volose’ o sehanga’ ondatio ka irehe;

ty amo lio’ ondatio,

naho i heloke nanoañe amy taney,

naho amy rovaiy,

vaho amo hene mpimoneñeo.

9 Hekoheko amy mpikatramo vara

ho a i anjomba’eiy,

hañonjona’e ambone ey i kiboho’ey,

hivotsora’e ami’ty haozara’ o ratio!

10 fa nikinia’o hasalarañe ty akiba’o

hañitoa’o t’indaty maro,

vaho amam-kakeo am-bata’o.

11 Hikoike boak’an-drindriñe ao ty vato,

hanoiñe aze i tsotsòke boak’ an-katae aoy:

12 Hankàñe! ty mpamboatse rova an-dio,

ie mañoren-tanàñe an-tahiñe.

13 Inao! tsy Iehovà’ i Màroy

ty amokora’ ondaty ho ami’ty afo,

naho ty amozaha’ o fifeheañeo

ho an-kakoahañe.

14 Toe ho lifotse ty fahafohinañe

ty enge’ Iehovà ty tane toy,

manahake ty fañampoan-drano i riakey*Ies 11:9.

15 Hankàñe ami’ty mampigenoke i rañe’ey,

ie izonjoña’e i zonjòñey, hampijik’ aze am-bòreke, hisamba’e i heña’ey!

16 Àtsan-kasalaran-drehe fa tsy engeñe, minoma ka, ho zoeñe t’ie tsy sinavatse,

hitoliha’ ty fitovim-pitàn-kavana’ Iehovà,

ho losore’ ty hameñarañe ty enge’o.

17 Hanaroñ’ azo ty fijoiañe i Libanone,

naho ty fanjamanañe biby

nampalý iareo;

ty ami’ty lio’ ondatio naho

ty fampiantoañe i taney, i rovay,

vaho o mpimoneñe ao iabio.

18 Ino ty tombo’ i sare-sokitsey,

ie tsinene ty nanao aze, sare nitranaheñe naho mpañoke vande;

t’ie iatoa’ i mpandranjy azey

hanoe’e samposampo moañe?

19 Hekoheko ami’ty manao ty hoe

ami’ty hatae: Mañentea!

naho amy vato moañey: Miongaha!

Mahafanoro hao izay?

Hehe t’ie nohoñem-bolamena naho

volafoty, fe tsy aman-kofòke.

20 Añ’anjomba’e masiñe ao t’Iehovà;

mianjìña añatrefa’e eo ry an-tane-bey atoy.