10
1 Vahe nandrevake t’Israele,
niregorego o voa’eo,
ie nitombo o famokara’eo,
le nampitomboe’e ka o kitreli’eo;
mira ami’ty havokara’ i tane’ey
ty nampisomontie’e o samposampo’eo.
2 Fa mizara ty arofo’ iareo;
fa hivave hakeo iereo;
ho hatsafe’e o kitreli’ iareoo,
ho rotsahe’e o samposampo’eo.
3 Hanao ty hoe iereo te aniany,
Tsy amam-panjàka zahay,
ami’ty tsy fañeveña’ay am’ Iehovà;
fa ho nanao inoñe ho antika
ty mpanjaka?
4 Mivolambolañe avao iereo,
manao fanta vìlañe naho mifañìna;
aa le hitiry hoe lombiry
am-bavahalin-tete’ iareo ty zaka.
5 Mihondrahondra o mpimone’
i Someroneo ty amo bania’ i Bet’aveneo;
handala i baniay ondatio,
naho o mpisoroñe
nañonjoñe azeo, ty amy enge’ey,
fa niakatse añe izay.
6 Ie hasese mb’e Asore añe
ho ravoravo am’ Iarebe mpanjaka;
ho salareñe t’i Efraime,
vaho ho meñatse t’Israele
ty amo fañòha’eo.
7 I Somerone: fa naitoañe i mpanjaka’ey,
manahake ty vore
mihafoñ’ ambone rano eo.
8 Ho rotsaheñe o kitreli’ i Aveneo,
ty hakeo’ Israele;
hitiry amo kitreli’e iabio ty fatike
naho ty hisatse,
le hanoeñe ty hoe o vohitseo,
Lembefo zahay;
naho o haboañeo,
Mitraboha ama’ay.
9 Ry Israele, fa nandilatse
hirik’añ’andro’ i Gibà irehe;
nijihetse ey avao iereo;
Tsy nahafivohotse ondaty mirengevoke e Gibà ao i hotakotakey.
10 Ho liloveko an-tsatriko;
vaho hifanontoñe haname iareo
o kilakila’ ondatio,
le ho rohizeñe ty amy
hakeo roe zay iereo.
11 Kiloa finolake t’i Efraime,
tea’e ty mandisañe;
le nampiariako ambone’ i hàto’e fanjàkay
ty ana-joka, hitariha’ i Efraime,
hitan-dasarý t’Iehodà, vaho
ho bonabonahe’ Iakobe o boko’eo.
12 Mitongisa havantañañe,
mitataha fiferenaiñañe;
bonabonaho o moka’ areoo;
fa tondroke ty fipaiañe Iehovà,
ampara’ t’ie totsake eo
hampidoañe havañonañe ama’ areo.
13 Navae’ areo ty halò-tsereke,
nitatahe’ areo ty hakeo,
ho kamae’ areo ty vokam-pandañirañe,
amy te niatoa’o o sata’oo,
naho ty hatsifotofoto’ o fanalolahi’oo.
14 Aa le hitroatse añivo’ ondati’oo
ty fifandragaragàñe;
fonga ho rotsake o rova fatratseo,
manahake ty nandrotsaha’
i Salmane*Salmane: mampilongo; fonitse; tambe i Bet’arbele†Bet’arbele: Filonadonan’Andrianañahare,
tañ’andro’ i hotakotakey;
dinemoke rekets’ an-drene’e o ana’eo.
15 Hambañe amy zay ty hanoa’ i Betele o halò-tsere’ areoo;
ho vata’e aitoañe ty mpanjaka’ Israele
te maraindray.
DRAFT VERSION