1 Mañarikatoke ahy an-dañitse

t’i Efraime, naho am-pamañahiañe

ty anjomba’ Israele;

Fa mbe mifehe aman’Añahare t’Iehoda,

naho migahiñe amo raha miavakeo.

2 Mandrazan-tioke t’i Efraime,

mañeañe tiok’atiñanañe;

ampitoabore’e vande naho joy

lomoñandro,

mbore milahatse amy Asore,

mbore mañondrañe menake amy Mitsraime.

3 Manan-kabò am’ Iehodà ka t’Iehovà,

o sata’eo ro hitiliha’ Iakobe;

o fitoloña’eo ro hañondroha’e aze.

4 Rinambe’e an-tomi’e an-koviñe ao

i zoke’ey,

le nifanehak’ aman’ Añahare an-kaozara’e;

5 Eka nigore’e i anjeliy vaho nahatañe*Fot 32:28;

nirovetse re naho nitoreova’e;

i nioni’e e Betele†Betele: Anjomban’Añahare añey,

le ao ty nitsara’e aman-tika.

6 Eka, Iehovà, Andrianañahare’ i màroy; Iehovà ty tahina’e.

7 Aa le mimpolia mb’aman’Añahare’o;

tambozoro ty fatarihañe naho ty hatò,

vaho itamao nainai’e t’i Andrianañahare’o.

8 I mpampibalibalikey,

balantsim-­pamañahiañe ty am-pità’e ao; tea’e ty mikatramo.

9 Hoe t’i Efraime,

Toe fa mpañaleale iraho,

nahatrea vara maro;

tsy eo ty haharendreke tahiñe amako,

ndra hakeo amo fitoloñakoo.

10 Izaho Iehovà Andrianañahare’o

boak’ an-tane’ i Mitsraime añe;

mbe hampimoneñeko an-kibohotse irehe

manahak’ amo andro namantañañeo.

11 Nisaontsieko o mpitokio,

nampitomboeko aroñaroñe,

vaho nandrazañe am-pitàm-pitoky.

12 Aman-tahiñe hao t’i Gilade?

toe hakoahañe,

ie nañenga bania e Gilgale ao;

eka, votrim-bato

am-bavahali’ o hatsakeo o kitreli’eo.

13 F’ie nilay mb’an-tete’ i Arame‡Arame: haabo; soa; mpamañahy; fatse añe t’Iakobe,

nitoroñe ho a i tañamjomba’ey,

eka nimpiarake ty amy vali’ey.

14 Mpitoky ty nañendesa’ Iehovà t’Israele boake Mitsraime ao,

vaho mpitoky ty nañarovañ’ aze; 15 nikai-jaka añ’afero t’i Efraime;

aa le hapoke ama’e ty lio’e;

vaho hondrohe’ i Talè’e ama’e ty inje’e.