1 Amako t’i Arofo’ i Talè, Iehovà;

ie noriza’ Iehovà hinday talily soa amo mpirèkeo;

nirahe’e hamolonkoñe ty jagobo,

hitaroñe fidadàñe amo am-balabeio, naho fañahañe amo mirohio;

2 hitsey ty taom-pañisoha’ Iehovà

naho ty androm-pañondrohan’Añahare, hañohòa’e o mihontokeo,

3 hamahana’e ze mirovetse e Tsione ao,

hampisabakae’e voñe

halimbe ty lavenoke,

tavon-kaehake hasolo ty fandalàñe,

saravim-bolonahetse

halimbe ty hamonjèrañe.

Hatao kilen-kavañonañe,

ty fambolèa’ Iehovà hisengea’iareo ty volonahe’e.

4 Le hamboare’ iareo o tanàn-taoloo,

hatroa’ iareo o nangoakoake haehaeo,

vaho ho vaoe’ iareo o rova niantoeñeo,

o nibangý fa tariratse maro izay.

5 Hiavotse hamahañe o lia-rai’oo

o ambahinio,

le ho mpiava’o naho mpañeteke

o vahe’oo ty renetane.

6 Fe hatao mpisoro’ Iehovà nahareo,

hatao ondatio ty hoe:

Mpiatrak’ an’Andrianañahare’ay;

ho kamae’ areo ty vara’ o fifeheañeo,

vaho ho sengè’ areo ty volonahe’ iareo.

7 Kanao ni-roe ty hasalara’ areo,

naho nirebeha’ iareo ty hoe:

Anjara’ iareo ty fivoteboteñañe,

le hanañe roe an-tane’ iareo ao,

vaho ho nainai’e am’ iareo ao

ty hafaleañe.

8 Fa mpitea ty hatò izaho Iehovà;

hejeko ty kametse naho ty lilatse;

hondrohako ami’ty hahiti’e iereo,

naho hanoako fañina tsy modo.

9 Ho fohiñe amo kilakila ondatio

o tarira’ iareoo,

naho am’ondatio o taminga’ iareoo;

hapota’ ze mahaoniñe

t’ie ty tiry nitahie’ Iehovà.

10 Handia taroba am’ Iehovà iraho,

hirebek’ aman’ Añahareko ty troko;

amy te siniki’e sikim-pandrombahañe,

Nasaro’e sarimbom-pandrebahañe,

le sinabaka’e hoe fañombeam-pañenga i sabaka’ey,

vaho nihaminañe hoe enga-vao amo bange’eo.

11 Toe hambañe ami’ty fampitiria’

i taney o hatae’eo naho

ty fampiporotsaha’ ty goloboñe

o nitongiseñe ama’eo;

ty hampipitsiha’ i Talè, Iehovà

fandrebahañe naho engeñe añatrefa’

ze kilakila’ondaty.