1 Ie mimpoly irehe, ry Israele,

hoe t’Iehovà,

le mimpolia amako,

naho asitaho añ’atrefako eo

o raha tìva’oo, vaho ko mitroetroe,

2 naho ifanta’o ty hoe:

Amy te veloñe t’Iehovà!

ami’ty fahiti’e naho ty hatò’e

naho ty havañonañe,

le ie ty hifampitata’ o fifeheañeo

vaho hifampirengea’ iareo.

3 Fa hoe t’Iehovà am’ondati’ Iehodào

naho am’ Ierosalaime:

Trabatrabàho o moka’ areoo,

vaho ko mitongy amo fatikeo.

4 Misavara ho am’ Iehovà,

afaho ty ofoke añ’arofo’ areo ao,

ry ondati’ Iehodào naho mpimoneñe

e Ierosalaimeo, tsy mone

hionjom-beo hoe afo ty habosehako,

hisolebatse tsy mete vonoeñe,

ami’ty hatsivokara’ o sata’areoo.

5 Kaikaiho e Iehodà ao,

naho tseizo e Ierosalaime ao, ty hoe:

Popòho amy taney ao ty antsiva;

mifanontona,

antao himoake amo rova fatratseo!

6 Atroaro mb’e Tsione ty viloñe,

mipalira, ko mihenekeneke, fa minday

hekoheko boak’ avaratse añe iraho,

naho fandrotsahañe jabajaba.

7 Fa niakatse an-drongoñe ao ty liona,

fa nionjoñe i mpandrotsake fifeheañey,

fa niavotse an-toe’e ao

hampangoakoake ty tane’o,

ho harakarake avao o rova’oo,

tsy ho amam-pimoneñe.

8 Ie amy zay, misikina gony, miroveta,

vaho mangololoiha: Fa mboe

tsy nivike aman-tika ty haviñera’Iehovà.

9 Amy andro zay, hoe t’Iehovà,

te hilesa ty fahavania’ i mpanjakay

naho o roandriañeo;

ho latsa o mpisoroñeo vaho

ho veren-draha o mpitokio.

10 Aa le hoe iraho, Ry Talè, Iehovà,

akore te nifañahie’o ondaty retoa

naho Ierosalaime, amy ty hoe:

Hanintsiñe nahareo,

ie fa totofem-pibara ty fiaiñe!

11 Ie amy zay ho taroñeñe am’ondaty

retoa naho am’ Ierosalaime ty hoe:

Ho hirik’ ankaboa’ i liolio am-patrambeiy ty tioke mihoboboke

mb’amo anak’ ampela’ ondatikoo,

tsy t’ie hanonga ndra hañororoke—

12 tioke lombolombo izay ty homb’eo

boak’ amako;

fa hivolañako zaka henaneo.

13 Heheke! Mionjoñe hoe rahon-dre,

o sarete’eo hoe tangololahy;

masika ta ty vantio o soavala’eo—

feh’ohatse tika! fa mianto!

14 Ry Ierosalaime, sasao añ’arofo’o ao

o haloloañeo soa te ho rombaheñe,

pak’ombia te mbe himoneñe ama’o

ao o fikililia’o ratio?

15 Inao, mikoike boak’e Dane*Dan: Zaka; ty Mpizaka añe

ty fiarañanañañe; vaho mitsey hankàñe

ty boak’ am-bohi’ Efraime añe.

16 Talilio o fifeheañeo, henaneo!

ikoiho am’Ierosalaime;

hirike tsietoitane añe o mpañarikatokeo

hipoña-peo amo rova’ Iehodào.

17 Fa niarikoboña’ iareo manahake

o mpivoñon-tondao, amy t’ie niola

amako, hoe t’Iehovà.

18 O sata’oo naho o fitoloña’oo

ty naneseañe o raha zao;

hankàñe ama’o; akore ty hafai’e!

kanao mahatakatse ty arofo’o.

19 Ty añ’ovako, ty añ’ovako!

ty haloviloviako!

Hete! Ty troko! Ty troko!

Midebodebo amako ao;

izaho tsy mahafitsiñe;

amy te ihe, fiaiko, ty nahatsanoñe

i fipopòn’ antsivay, i kaik’ aliy.

20 Vinonje’ ty hekoheko ty hankàñe,

fonga nimongoreñe i taney;

rotsake ami’ty manao zao

o kibohokoo,

ami’ty tsi-maemae-laletse

o rindrin-kivohokoo.

21 Ampara’ te ombia ty mbe

hahatreavako i viloñey,

ty hahatsanoñako ty feo i antsivay?

22 Toe dereñe ondatikoo,

tsy mahafohiñe ahy;

ajaja minè, tsy mahilala.

Kante an-katsivokarañe,

ie tsy mahay manao soa.

23 Nenteako ty tane toy

t'ie nihoake tsy amam-bintañe,

vaho mb’ andikeramb’eo

fe nipo-kazavàñe ty ey.

24 Nenteako o vohitseo le nizoeko

te niezeñezeñe,

vaho fonga nivembèñe o haboañeo.

25 Nenteako le hehe t’ie tsy ama’ ondaty,

leo raike,

vaho hene niborofotse o voron-tiokeo.

26 Nenteako,

le ingo te paimpaiñe

i tane ni-kobokaray,

fonga narotsake añatrefa’ Iehovà o rovao,

aolo’ ty haviñera’e miforoforo.

27 Fa hoe t’Iehovà:

Ho koake iaby i taney

fe tsy ho fonga mongoreko.

28 Handala’ ty tane toy,

naho haieñe o likerañe eñeo;

ty amo volakoo;

naereñereko, le tsy hiheve,

vaho tsy hibalihako.

29 Songa mivoratsake ty lay

o rovao ami’ty fikoraha’ o mpiningi-

tsoavalao naho o mpitàm-paleo,

iziliha’ iareo ty matahetse;

anganiha’ iareo o vatovatoeñeo;

nengañe hoake iaby o rovao,

leo ondaty raike tsy mimoneñe ao.

30 Le ihe tinavañey,

Ino ty atao’o kanao

misiki-mena mañabasà,

naho miravake bange volamena,

vaho ampiboenare’o loko o maso’oo?

Tsy vente ty ihamina’o vatañe,

songa malaiñe azo o sipa’oo,

toe hañè-doza ama’o.

31 Fa nahatsanoñe hoe fikoiahan’ ampela mitsongo iraho,

ty fanaintaiña’ i misamake

i tañoloñolo’eiy,

ty fikoiaha’ ty ana’ i Tsione misehaseha,

mañiti-tañampolo manao ty hoe:

Hankàñe amako!

Mitoirañe añatrefa’ o mpamonoo

ty fiaiko!