13
1 Hoe t’Iehovà amako: Akia, mikaloa sokotry lande, le sadiaño, vaho ko alo’o an-drano. 2 Aa le nivily sokotry iraho ty amy tsara’ Iehovày, vaho nadiako. 3 Nomb’ amako fañindroe’e ty tsara’ Iehovà nanao ty hoe: 4 Endeso i sokotry vinili’oy, o an-toha’oo, le miongaha, akia mb’e Perate*Perate: Saka mampiraorao añe vaho akafiro an-tseran-damilamy ao. 5 Aa le nimb’ eo iraho nañetak’ aze e Perate ao amy nandilia’ Iehovày.
6 Ie añe ty andro maro, le hoe t’Iehovà amako, Miongaha, akia mb’e Perate mb’eo vaho rambeso i sokotry nililiako haetak’aoy. 7 Aa le nimb’e Perate mb’eo iraho vaho hinaliko naho rinambeko amy nañetahakoy i sokotriy; naheoko t’ie nianto, tsy vara ka. 8 Le niheo amako ty tsara’ Iehovà nanao ty hoe:
9 Hoe t’Iehovà:
Hambañe amy zay ty hamongorako
ty fiebora’ Iehodà, naho
ty firengevoha’ Ierosalaime,
10 ondaty lo-tsereke retoañe,
o mifoneñe tsy hijanjiñe o volakoo,
o manjotik’ ami’ty fanjeharan’arofo’eo,
naho mañorike ndrahare ila’e hitoroña’e naho hitalahoa’e;
aa le hifandrae ami’ty sokotry toy iereo,
ie tsy vente’e.
11 Fa hambañe ami’ty fidiañañe
ty sokotry an-toha’ondaty,
ty nampidiañako amako
ty anjomba’ Israele iaby,
naho ze hene anjomba’ Iehodà,
hoe t’Iehovà,
soa te ho amako iereo, h’ondaty
naho tahinañe, naho engeñe,
vaho volonahetse;
f’ie mihiritsiritse avao.
12 Atovoño am’ iereo o tsara zao: Hoe t’Iehovà Andrianañahare’ Israele: Songa ho peañen-divay o zonjoñeo. Le ie manao ty hoe iereo: Aa tsy apota’ay hao te sindre hatsafen-divay o zonjoñeo? 13 Le hanoa’o ty hoe: Hoe t’Iehovà:
Ingo ho liporeko hamamoañe ze hene
mpimone’ ty tane toy: o mpanjaka
miambesatse am-piambesa’ i Davideo†Davide: Ikokoañe,
naho o mpisoroñeo, naho o mpitokio,
vaho o mpimone’ Israele iabio.
14 Ho ifampidosieko iereo,
o roaeo amo ana’eo, hoe’ t’Iehovà;
tsy hiheveako, tsy ho tretrezeko,
tsy ho ferenaiñeko;
te mone ho rotsaheko.
15 Mijanjiña naho manolora ravembia,
ko mibohaboha; fa nitsara t’Iehovà.
16 Toloro engeñe t’Iehovà
Andrianañahare’ areo,
aolo’ ty firoña’e ho maieñe,
aolo te mitsikapy an-tongoa-vohitse eo
o fandia’ areoo,
le ie mipay hazavàñe nahareo
ro hafote’e ho talinjon-kavilasy,
ie hampimoromoroñe’e.
17 Fe naho tsy mañaoñe nahareo,
le hiharovetse añ’etake ty troko
ty amy firengevohañe zay;
higanaganaham-pangololoihañe
o masokoo,
vaho hikararake o rano-masokoo,
amy te nasese an-drohy añe i lia-rai’ Iehovày.
18 Taroño amy mpanjakay naho amy
mpanjaka-ampelay ty hoe:
Mitoboha ambane,
fa nazetse o sabakan’enge’ areo fanjakao.
19 Migabeñe o rova atimoo,
vaho tsy eo ty hanokake iareo;
songa nasese am-pandrohizañe t’Iehodà;
sindre nendeseñ’ añe an-drohy.
20 Ampiandrao o fihaino’oo,
isaho o mb’etoy boak’ avaratse eio;
aia i lia-raike natolots’ azoy,
i lia-rai’o fanjakay?
21 Ino ty hatao’o naho tendre’e
ho ambone’ lohà’o o nirañe’o taoloo;
o naò’oo?
Tsy hamihiñe azo hao ty fikoretañe
hoe fitsongoan’ ampela?
22 Aa naho atao’o an-tro’o ao ty hoe:
Ino ty nifetsaha’ iretoañe amako?
Ty habei’ hakeo’o ty nañaloañe i siki’oy,
naho ty maha tsi-an-kana o tomi’oo.
23 Mahay mañova ty holi’e hao
ty nte-Kose‡Kose: hamainten-gero’e,
ndra i hapepoa’ey ty fosa?
Aa naho mete izay, le ho lefe’areo
mpanao ratio ka ty hanao soa.
24 Aa le hampiboeleko iereo
manahake ty karafo ampihelaña’
i tion-dratraratray.
25 Toe toli’o toy, ty nañaranako ama’o, hoe t’Iehovà;
amy te nihaliñe’o iraho,
vaho niatoa’o ty remborake.
26 Aa le hatsingako ambone’ lahara’o eo
o siki’oo hampiboake ty fimeñara’o.
27 Fa nitreako o hativa’oo:
ty fañarapiloa’o,
ty fitrem-pitsinginiora’o,
ty haleoran-katsimirira’o,
amo tamboho an-kivoke eio,
nitreako o hativà’oo.
Hankàñe ama’o, ry Ierosalaime,
ampara’ te ombia t’ie mbe haleotse?
DRAFT VERSION