1 Le hoe t’Iehovà amako:

Ndra te nijohañe añatrefako eo

t’i Mosè naho i Samoele,

tsy ho nitolike mb’am’ondaty retoa ty troko

soiho añe iereo tsy ho treako, aseseo añe.

2 Ie amy zao, naho isaontsia’ iareo,

ty hoe: Homb’aia zahay?

le hanoa’o ty hoe: Hoe t’Iehovà:

O havetrakeo mb’am-pivetrahañe,

O ho amy fibaraio, mb’amy fibaray,

O hampisalikoeñeo le mb’amy mosarey,

O ho an-drohio, le mb’am-pandrohizañ’ añe.

3 Efatse ty hafantoko am’ iareo:

hoe t’Iehovà

hanjevoñe ty fibara naho

hirepake ty amboa naho

hampibotseke naho hamongotse o voron-dikerañeo naho

o bibi’ ty tane toio.

4 Le hanoeko fangebahebahañe

amy ze fifehea’ ty tane toio,

ty amy Menasè*Menasè: i nandikofañey; bey haliño, ana’ Iekizkia†Iekizkia: ty haozara’ Iehovà

mpanjaka’ Iehodà,

o nanoe’e e Ierosalaimeo.

5 Ia ty hiferenaiñ’ azo ry Ierosalaime?

Ia ty handal’ azo?

Ia ty hivike hañontane ty fanintsiña’o?

6 Fa nifarie’o iraho, hoe t’Iehovà,

toe nidisa-voly;

izay ty añitiako ama’o ty tañako,

handrotsahako;

mahamokotse ahy ty miheve.

7 Itsongako an-tsikelo

an-dalambei’ i taney;

ampandalàko anake,

vaho ho mongoreko ondatikoo

amy te tsy ambohoa’e o sata’eo.

8 Ho maro te amo fasen-driakeo

o ramavoi’iareoo aoloko eo;

afetsako am’iereo, ami’ty renen’ ajalahy

ty mpampianto an-tsipinde mena;

hivovò ama’e ty fihepakepahañe

naho ty firevendreveñañe.

9 Miforejeje ty nisamake fito;

midegañe ty fiai’e;

fa nimotake i andro’ey

t’ie mb’e nandia-loha,

meñatse re naho salatse;

vaho haseseko ami’ty fibara ty sehanga’e

añatrefa’ o rafelahi’ iareoo,

hoe t’Iehovà.

10 Feh’ohatse amako ry reneko,

te nahatoly ahy h’ondaty trabiheñe,

mpampitrobo i tane iabiy!

tsy nampisongo iraho, tsy misongo;

fe fonga mamàtse ahy.

11 Hoe t’Iehovà:

havotsoko ho an-kasoa irehe;

hampihalalieko ama’o

ty rafelahy an-tsan-kankàñe naho añ’andron-kasotriañe.

12 Mahafolake ty viñe boak’ avaratse hao

ty viñe naho ty torisìke?

13 Hatoloko ho fikopahañe

tsy amam-bili’e ty vara naho fanaña’o,

pak’ añ’efe’o iaby ty amo hene’ tahi’oo.

14 Le hampaneseko o rafelahi’oo

mb’ an-tane tsy fohi’o;

fa niviañeñe an-doak-oroko ao ty afo hisolebats’ ama’o.

15 Ihe ry Iehovà ro maharofoanañe,

tiahio iraho vaho aereñereo,

vaho valeo o mpanao sarerak’ ahio;

ko asese’o mb’eo ty amy fiferenaiña’oy; mahaoniña te Ihe ro nahafeahako inje.

16 Nitendreke o tsara’oo vaho nihaneko;

le nahafale ahiko

toe naharebeke ty troko o tsara’oo;

amy te nitokaveñe ami’ty tahina’o,

ry Iehovà Andrianañahare’ i màroy.

17 Tsy nitobohako i fivorim-pitohàkey,

tsy nirañaraña an-kobaiñe,

fa mitobok’ am-bangiñe ao ty amy fità’oy; ie nilifore’o hatorifihañe.

18 Akore te silofeñe nainai’e o rarekoo,

ie tsy mitsaitsaike o ferekoo,

tsy mete ho melañe?

Hanao torahañe mamitak’ amako

hao irehe, hoe rano misike?

19 Aa le hoe t’Iehovà:

Naho himpoly irehe,

le ampibaliheko indraike,

hijohaña’o añatrefako eo;

aa naho akare’o ami’ty kafoake ty vente’e,

le ho sorotàko;

adono hitoliha’ iareo, fa ko itoliha’o.

20 Le hanoeko kijoly torisìke

am’ondaty retoa;

hialy ama’o iereo, fa tsy hahagioke,

Ho ama’o iraho handrombak’ azo

naho hañaha azo, hoe t’Iehovà.

21 Havotsoko am-pità’ o lo-tserekeo,

naho ho jebañeko an-dela-pità’

ty mampangebahebake.