1 Fa sinokitse am-panokiram-by

ty hakeo’ Iehodà,

safira masioñe ty loha’e,

pinatetse an-takelan’arofo’ iareo,

naho ami’ty tsifan-kitreli’ iareo eo.

2 Ie tiahi’iereo o ana’ iareoo,

le ho tiahi’iareo ka ty kitreli’ iareo

naho o Asere’ iareo

añ’ila’ ze hatae antsetra an-kaboañe eio.

3 O ry vohiko an-kivoke ey,

hatoloko ho fikopake o fanaña’oo

naho ze fonga vara’o,

rekets’ o toem-pisoroña’o amo haboañe manitsike ty tane’oo.

4 Le ihe, toe o vata’oo,

ro hapitsok’ amy lova natoloko azoy;

vaho hampitoroñeko o rafelahi’o

an-tane tsy fohi’oo;

amy te namiaña’o afo

hilebaleba nainai’e ty an-doak’oroko ao,

5 Hoe ty nafè’ Iehovà:

Fatse t’indaty miato ama’ ondaty,

naho manao ty nofotse ho haozara’e,

vaho misitak’ am’ Iehovà ty arofo’e.

6 Ho hambañe ami’ty rongoñe

an-dratraratra añe,

tsy ho oni’e ty fitotsaha’ ty soa;

amy t’ie himoneñe am-paimpaiñe

an-diolio añe,

an-tane sira tsy amam-pimoneñe.

7 Haha t’indaty miato am’Iehovà;

naho Iehovà ro fiantofa’e.

8 Hanahake ty hatae namboleñe

añ’olon-drano eo re,

mamelatse o vaha’eo marine rano ao,

ie tsy ho tendre-tariñandroke,

fa handrevake o rave’eo;

naho tsy ho mahimahin-dre an-taom-paosa, vaho le lia’e tsy hijihetse o voa’eo.

9 Milikoatse ze he’e

ty famañahia’ o arofoo*Rzs 11:20, 17:20, Iir 7:24, 18:12, 23:17, ,

losotse ty hasilo’e—

ia ty mahafohiñe aze?

10 Izaho Iehovà ty mpitsikarak’ arofo,

mpitsò-troke,

mpanambe ondatio mira amo sata’eo,

tsahatse ty havokara’ o fitoloña’eo.

11 Hambañe amo hatrakatrake mamana

anake tsy natera’eo,

ty manontom-bara tsy an-kahiti’e;

hieng’ aze irezay añivo’ o andro’eo,

ie ho dagola ampara’e.

12 Ry fiambesan-engeñe

nonjoneñe tam-baloha’e añe,

ry toe’ay miavakeo,

13 ry fitamà’ Israeleo, ry Iehovà!

Hene ho salatse ze mieng’Azo;

ho sokireñe an-tane eo

ze mivik’ ama’o,

amy te naforintse’ iareo t’Iehovà,

loharano veloñey†Iir 2:13.

14 Afaho ry Iehovà le ho jangan-draho;

rombaho vaho ho rombake;

amy te Ihe ro fandrengeako.

15 Inao ty fatao’ iareo amako:

Aia ty tsara’ Iehovà,

ampombao mb’etoa henaneo.

16 Fa naho izaho, tsy nalisa hisitake

ami’ty maha-piarak’ahy ama’o;

tsy nirieko ka ty andron-kankàñe;

arofoana’o te nalange añatrefa’o eo

ze niakatse an-tsoñiko.

17 Ko mamangebahebak’ ahy,

amy te Ihe ro fipalirako

añ’andron-kankàñe.

18 Ee te ho salareñe o mampisoañe ahy,

fe ko ampisalaren-draho;

ee te hembereñe iereo,

fe ko ampisosoren-draho,

aseseo am’iereo ty andron-kekoheko,

vaho rotsaho an-drotsake roe.

19 Hoe t’Iehovà amako:

Akia, mijohaña an-dalambei’

o ana’ ondatio,

am-piziliha’ o mpanjaka’ Iehodào

naho am-piengà’ iareo eo,

naho amo lalambei’ Ierosalaimeo;

20 vaho isaontsio ty hoe:

Janjiño ty tsara’ Iehovà

ry mpanjaka’ Iehodà, naho

ry Iehodà iaby, naho

ry hene mpimone’ Ierosalaimeo,

ze fonga mimoak’ an-dalam-bey retoañe:

21 Hoe t’Iehovà: Mitaoa!

ko minday entañe ami’ty andro Sabotse,

naho ko mampizilike ndra inoñ’inoñe

amo lalambei’ Ierosalaimeo;

22 Ko añakaran-kilankañe ty anjomba’o ami’ty andro Sabata,

naho ko mitolon-draha,

vaho avaho ty andro Sabotse,

amy nandiliako aman-droae’areoy;

23 Ie tsy nañaoñe,

tsy nanokilan-dravembia,

te mone nampigam-pititia,

tsy hijanjiñe

tsy handrambe fanoroañe.

24 Ho tondroke ka te,

ie mahafitsendreñe ahy,

hoe t’Iehovà,

te tsy anjilihañ’ entañe amo lalam-bei’

ty rova toio ami’ty andro Sabotse,

fe hambenañe ho masiñe

ty andro Sabotse, tsy hitoloñañe;

25 Ie amy zay himoaham-panjaka

naho roandriañe o lalam-bei’ ty rova toio hiambesatse amy fiambesa’ i Davidey,

miningitse sarete naho soavala,

ie naho o roandria’eo,

naho ondati’ Iehodao,

naho o mpimone’ Ierosalaimeo;

vaho nainai’e ho fimoneñañe ty rova toy.

26 Hivovotse boak’amo rova’ Iehodào,

naho hirik’ am-paripari’ Ierosalaime,

naho boak’an-tane’ i Beniamine,

naho boak’an-tane petrake,

naho boak’am-bohibohitse,

vaho boak’ atimo añe,

songa minday enga ho lorañe,

naho soroñe naho enga mahakama,

naho tsotse vaho engam-pañandriañañe

mb’añ’anjomba’ Iehovà mb’eo.

27 Fe naho mañamatsamatsa ahy nahareo

tsy hampiavake o andro Sabatao,

ami’ty tsy fimoahañe amo lalam-bei’ Ierosalaimeo reke-kilankañe

ami’ty andro Sabotse;

le hamiañako afo o lalam-beio,

ze hamorototo o anjomba’ Ierosalaimeo, vaho tsy hakipeke.