2 Hapoke tsy ho valeañe hao

i entan-tsy fotofoto rezay,

hahazo to hao ondaty lifo-dañonañeo?

3 Hampijomohòn-ty lahilahy hao

ty fangaradadaha’o,

tsy hendaha’ ondaty hao

t’ie manivetive?

4 ami’ty nanoa’o ty hoe:

Ki’e o fañòhakoo,

naho malio-tahin-draho

am-pivazohoa’o.

5 Aa ehe te hitsara t’i Andrianañahare,

naho hanokake fivimby ama’o,

6 hitaroña’e hihitse miheotse! Toe aman’ ila roe ty hilala to.

Aa le mahafohina te apon’ Añahare

ty ila’ o hakeo’oo.

7 Mahafitsikarake o raha miheotse aman’ Añahareo v’iheo?

Mahafañitsokitsoke o efe’ efe’

i El-Sadai hao?

8 Sikal’ an-dindìñe eñe iereo?

—ino ty ho mete’o?

laleke ta i Tsikeokeokey

—ino ty ho fohi’o?

9 Lava te ami’ty tane toy ty andava’e,

mihenehene te amy riakey.

10 Ke miary re, ke mampigabeñe,

he manontoñe, ia ty hanebañe aze?

11 Toe arofoana’e ty votro;

naho vazoho’e ty hakeo,

ndra t’ie tsy mandohy.

12 Kanao hahilala ty dagola,

le mahaterak’ ondaty ty borìke-ly.

13 Avantaño arè ty arofo’o,

vaho avelaro ama’e o fità’oo,

14 apoho añe ze hakeo am-pità’o;

ko ado’o hitobok’ añ’akiba’o ao ty tahiñe,

15 Ie amy zao, hampiandrae’o laharañe tsy aman-kila;

hijohan-drehe tsy an-kahembañañe.

16 Ho haliño’o ty fisotria’o;

ho tiahi’o hoe rano fa nisaok’ añe.

17 Le hazava te amy tsipinde-menay

ty havelo’o;

naho manahake ty maraindray i haìe’ey.

18 Le hahatoky irehe kanao am-pitamàñe;

mijilojilova añ’ariari’o,

le màndrea an-kanintsiñe.

19 Ho nihity tsy an-kahembañañe

vaho maro ty hipay imba ama’o.

20 Fe ho tofake ty maso’ o lo-tserekeo;

le tsy aia ty hivoratsaha’e,

vaho ty fipetro’e avao ty hisalala’e.