2 Tsatsiho o entakoo;

ehe t’ie ro hamere anahareo.

3 Iheveo hey hivolañe,

ie fa nivolañe, le mañinjea.

4 Aa naho izaho,

ondaty hao ty itoreovako?

Ino ty tsy hahatsimboetse ahy?

5 Isaho iraho vaho ilatsao:

akapefo am-pitàñe ty falie.

6 Ie mahatiahy iraho, le embetse;

fitititihañe ty mangazoñe ty vatako.

7 Akore te mbe veloñe o tsereheñeo,

miha-bey,

vaho mitombo an-kaozarañe* Sab 73:3,17, Iir 12:1-2?

8 Mitrao-pimoneñe am’iareo,

am-pahaisaha’ iareo o ana’eo,

añatrefam-pihaino’ iareo

o tarira’eo.

9 Soa-aro tsy an-kahembañañe

o akiba’eo;

tsy am’ iereo ty kobain’Añahare.

10 Mitongoñe o añombelahi’eo fa tsy milesa;

miterake o añombe vave’eo fa tsy mandoly.

11 Ampidadà’ iereo

hoe lia raike o ana’eo;

mitrekatreka o keleia’eo.

12 Kantsáñe naho marovany

ty arahe’ iareo takasy,

vaho mifale ami’ty feon-tsoly.

13 Gadoñe’ iereo am-pibodobodoañe o andro’eo vaho mizotso mb’an-kibory ao am-pierañerañañe.

14 Ie nanao ty hoe aman’ Añahare:

Adono zahay!

Tsy fañiria’ay ty hahafohiñe o sata’oo.

15 Ia ze o El-Sadai zao, hitoroña’ay?

Ino ty ho tombo’e ho anay

te ihalalia’ay?

16 Heheke, tsy am-pità’ iareo ty hasoa, lavits’ahy

ty famerea’ o lo-tserekeo.

17 Im-pire hao te akipeke

ty failo’ o tsivokatseo?

Im-pire t’ie ivovoa’ ty hankàñe?

Ie anjarà’e ty tivontivoñe

ty amy haviñera’ey.

18 Boka-maike miatre-tioke iereo,

hoe kafo’e aboelen-tio-bey?

19 [Hoe nahareo:] Ahajan’ Añahare

ho amo ana’eo o tahi’eo.

Ehe te hañondroke ama’e

t’i Andrianañahare, hahafohina’e.

20 Apoho ho oni-pihaino’e ty firotsaha’e, hitohofa’e ty haviñera’ i El-Sadai.

21 Haoñe’e hao i hasavereña’e

hanonjohy azey,

apota’e hao te voaiake o vola’eo?

22 Ia ty hañoke hilala aman’Añahare

kanao Ie ro mizaka o an-dikerañeo?

23 Mihomak’ ami’ty haañoña’e ty raike,

ie miaiñañoleñañe am-panintsiñañe.

24 Pea ronono o korobo’eo,

lendeñe o betron-taola’eo.

25 Mivetrake ka ty aman-kafairan-troke,

le lia’e tsy nitsopeke raha mafiry.

26 Songa mandre andebok’ ao,

sindre saroñan-oletse.

27 Eka, fantako ty fikitroha’ areo,

ty fikililia’ areo hañaraty ahy.

28 Fa hoe nahareo:

Aia ty anjomba’ i roandriañey?

Aia ty kivoho, ty fimoneña’ o lo-tserekeo?

29 Mboe tsy nañontanea’ areo hao

o mpañaveloo,

tsy apota’ areo hao o talili’ iareoo?

30 te arovañe ho an-tsan-kankàñe

i tsereheñey, ho kozozoteñe mb’eo añ’androm-piforoforoañe.

31 Ia ty hiatreatre aze ty amo lala’eo,

ia ty hañondrok’ ama’e o nanoe’eo?

32 Ie takoneñe mb’an-kibory mb’eo,

vaho ambenañe i lona’ey.

33 Mamy ama’e o vongan-tane

am-bavataneo;

vaho fonga hañorik’ aze ondatio,

ie mitozantozañe ka ty niaolo.

34 Aia arè ty añohòa’ areo

amañ’entan-kòake,

le o hatoi’ areoo,

manao hakalitahañe avao.