1 א Akore te nikomavo o volamenao,

hete! niova o volamena ki’eo!

Hene nadoandoañe aolo’ ze lalan-drova eo o vato soao.

2 ב Mañeva volamena hiringiri’e

mira amo lanja’eo

o ajaja’ sarots’ i Tsioneo;

akore t’ie oharañe am-balàñe-tane

henaneo,

asam-pitàm-panao valàñe-tane!

3 ג Ndra o fanalokeo ro manolotse nono, hampinono o ana’eo,

fe ampisoañeñe manahake

o voron-tsatrañe am-patrañ’añeo

ondatikoo henane zao.

4 ד Mipitek’ an-dañilañi’e

ty lela’ o anak’ajajao

amy harandrano’ey;

mangata-kaneñe o ajajao,

fe tsy amam-panisa.

5 ה Mikoromak’ an-dalañeo

o nitakataka raha mafirio;

mitam­bozòtse votren-davenoke

o nibeizeñe an-tsikiñe malo-mavoo,

6 ו Fa lombolombo’ ty nandilovañe

i Sedome ty nandafañe ondatikoo,

ie aniany te narotsake,

ie fitàn-draike tsy zinonjoñ’ ama’e.

7 ז Nikotritriake hoe fanala o roandria’eo,

foty te aman-dronono;

nilikoatse o safira

pinilak’ amo vonga’eoo,

ty filoeloem-binta’ iareo.

8 Mainten-geroke hoe molale

o tareheo henaneo;

tsy fohiñe an-dalañey iereo,

fa niforejeje amo taola’eo ty holi’ iareo,

mipipìke hoe hatae maike.

9 ט Falefale i tinombom-pibaray

te amo trinofan-kasalikoañeo,

ie mitike avao ty fiai’ iretoañe,

ie tsy taka-tsindroheñe o tondao.

10 י O fitan-drakemba mpitretre’eo

fa nahandro o ana’eo;

ninjare filintse’e,

ami’ty famongorañe

o anak’ ampela’ ondatikoo.

11 כ Nihenefa’ Iehovà i fifombo’ey;

fa nadoa’e i haviñera’e miforoforoy,

vaho namiañe afo e Tsione ao

ze namorototo o mananta’eo.

12 ל Tsy nahafiantoke

o mpifehe’ ty tane toio,

ndra o mpimone’ ty voatse toio,

t’ie hahafimoak’ an-dalambei’

Ierosalaime ao,

ty rafelahy ndra ty sadia-vahe.

13 מ Ie iaby izay

le ty amo hakeom-pitoki’eo

naho o tahim-pisoro’eo,

ie nampiorihe’ iareo lio-màliñe.

14 נ Ie nirererere hoe goa

an-dalan-drova ao;

tsy teo ty nahavany hitsapa o siki’eo

ami’ty hativa’e.

15 ס Soike! Veta!

ty nitazataza’ ondatio am’ iareo;

Soike! Añe! ko mitsapa!

aa le gike naho mpirererere iereo;

le hoe ty natao’ o kilakila’ ndatio:

Tsy hitobok’ atoy ka iereo.

16 פ Nampivarakaihe’ ty haviñera’ Iehovà,

tsy ho haoñe’e ka;

tsy niasia’ iareo o mpisoroñeo,

tsy nisohe’ iareo o androanavio.

17 ע Fa milesa o fihaino’aio,

mitolom-pijilojilo imba tsy vente’e;

nitalake avao zahay

nitama fifeheañe tsy maharombake;

18 צ Ie nitinoñe o lia’aio,

zahay tsy naha-jelanjelañe amo lala’aio;

mitotoke ty figadoña’ay,

voa-iake o andro’aio,

vaho an-titotse ty fimodoa’ay.

19 ק Nasika te amo tsimalahoo

o nihofik’ ama’aio;

linafa’ iareo am-bohitsey,

vinandro’ iareo an-dratraratra ao.

20 ר O kofòn’ai’aio, o noriza’Iehovào

le fa tinavañe an-kobo’ iareo ao—

ie nataon-tika ty hoe: Ambanen’alo’e ao

ty himoneñan-tika

añivo’ o kilakila’ ndatioy.

21 ש Mirebeha, mifalea

ry anak’ampela Edome,

ihe mimoneñe an-tane Oze ao;

fe hiary ama’o ka i fitoviy;

ho jike irehe vaho hañalo-batañe, hiboridañe.

22 ת Fa heneke ty ­hijebañañe o hakeo’oo, ry anak’ampela’ i Tsiòneo,

tsy hasese’e mb’an-drohy añe ka;

fe ho lilove’e o tahi’oo

ry anak’ampela Edomeo,

fonga habora’e o hakeo’oo.