1 I Paoly, mpirohi’ Iesoà Norizañey, naho i Timoty rahalahintika: Ho a i Filemona rañetse naho mpifanehake ama’ay, 2 naho i Apiae rahavaventika, naho i Arkipo lahin-defon-tika, vaho i Fivory añ’ anjomba’oy: 3 Hasoa naho ­fañanintsiñe ama’areo boak’ aman’ Añahare Raentika naho i Talè Iesoà Norizañey.

4 Mañandriañe an’Andria­nañahare nainai’e naho manoñoñe azo amo filolofakoo­— 5 amy te tsinanoko ty fato­kisa’o amy Talè Iesoà naho ty fi­kokoa’o o noro’e iabio — 6 soa te hamokatse ho ami’ ty faha­rendrehañe ze hasoa ama’o amy Norizañey ty fi­taro­ña’o am-patokisañe. 7 Toe mahafale naho mañohò ahy ty fikokoa’o, amy nampanintsiñe’o ty arofo’ o noro’eoy, ry rahalahy.

8 Ie amy zao, ndra hoe mirearea amy Norizañey iraho handily azo hanao ze mañeva, 9 fe o fikokoañeo ty ihalaliako, izaho Paoly migain-kantetse naho mpirohi’ Iesoà Norizañey henaneo, 10 ie idrakadrakafako i Onesimosy anako nampiareñeko, izaho an-tsilisily, 11 ie tsy nahasoa azo te taolo, fa mahasoa azo naho ahy henaneo. 12 Ahitriko mb’eo am-bata’e re, ty troko ‘nio, 13 ie ho nitanako atoa hitoroñe ahy ty ama’o amo rohy toañe ty amy talili-soay, 14 f’ie tsy ho nanao inoñ’ inoñe naho tsy niera ama’o hey soa tsy ho nazitse ty hasoa ho nanoe’o an-tsatri’o. 15 Va’e izay ty nifampirià’e ama’o betebeteke handrambesa’o aze indraike ho pak’ añ’afeafe’e añe, 16 tsy ho ondevo ka, fa lombolombo’ ty ondevo, toe rahalahy ìsoke, men­tsake amako, fa somandrake ama’o an-tsandriñe naho amy Talè ao.

17 Aa naho atao’o rañe’o iraho, le ampihovao re manahake te izaho. 18 Fe naho eo ty nandilara’e azo ndra anaña’o songo ndra fire-fire, le ampisongò amako. 19 Izaho Paoly ty manoratse toy an-tañako. Izaho ty hañavake—tsy hataoko ty hoe te nisongoe’o amako ty fiai’o. 20 Eka, ry rahalahy, hasoao iraho amy Talè ao; ampanintsiño amy Norizañey ty troko. 21 Ihe atokisako te hiantoke, ty anokirako, amy te apotako te ho likoare’o i asakoy.

22 Tovo’e, añalankaño trañon’ ambahiny hitobohako, fa o halali’ areoo ty itamako te hatolots’ ama’areo. 23 Mañontane azo t’i Epafra, mpindre-pirohy amako am’ Iesoà Norizañey, 24 naho i Marka, i Aristarko, i Demasy, i Lioke, mpifanehake amako.

25 Ty hasoa’ i Talè Iesoà Norizañey amo arofo’ areoo. Amena.