1 O razan-tsaontsi’ i Selomò ana’ i Davide, mpanjaka’ Israeleo :

2 Haharendrehañe ty hihitse

naho ty anatse;

hahafohinañe o saontsy minday hilàlao,

3 hañanarañe filieram-batañe,

havañonañe, zaka-to, naho tsy firihiañe,

4 haringatañe amy trentrañey,

hampahihitse naho hampahilala

o tora’eo;

5 hijanjiña’e ty mahihitse hanompea’e hilala,

le ho verèñe an-kihitse ty maharendreke,

6 hahavaky o hatòm-bolañeo,

naho o fandrazañañeo,

ty enta’ o mahihitseo vaho

o razan-tsaontsi’eo.

7 Ty fañeveñañ’am’ Iehovà ro fifotoran-kilala*Rzs 9:10, Sab 111:10,

fe malain-kihitse naho anatse ty gege.

8 O anake, tsendreño, ty fameren-drae’o,

naho ko ado’o ty fañòhan-drene’o;

9 Ie firavahañe soa an-doha’o eo

vaho hareañe am-bozo’o eo.

10 O anake, ihe edrè’ o tsivokatseo, ko miantoke.

11 Ie manao ty hoe :

Antao hindre ama’ay;

antao hivoñon-dio,

hiambotrak’ am’ondaty mahitio tsy aman-tali’ey;

12 hagodran-tika veloñe iareo

manahake i kiboriy, ty vata’e iaby,

hambañe amo mivariñe an-kòak’ aoo;

13 Hahaisake ze atao vara soa,

hañatsafan-draha kinopake

amo akiban-tikañeo;

14 Mipiteha ama’ay arè, sindre hitraok’ an-koroñe raike.—

15 O anake, tsy iharoan-dia iereo,

kalaño ty tombo’o

tsy ho ami’ty lala’ iareo;

16 fa milay mb’an-katsivokaram-b’eo

o tombo’ iareo

malisa hampiori-dioo.

17 Toe tsy vente’e ty amohàm-pandrike†Heb: andamahan-karato

ambane’ ty masom-boroñe eo !

18 fe o liom-bata’eo ty iampira’ iareo,

ty fiai’iareo avao ty amandroña’iareo.

19 Izay ty sata’ o mpitavam-bara

am-patiti’eo,

asinta’e ty fiai’ i mitañ’ aze’ey.

20 Mikok’ an-dalambey eo t’i Hihitse;

poñafe’e an-tameañe ey i fiarañanaña’ey.

21 Mikaik’ ami’ty fangovovoha’ondatio,

mametse saontsy

an-dalam-pizilihañ’an-drova eo:

22 Pak’ombia ry seretseo ty mbe

ho tea’o ty firoerano’o?

naho mbe hifale ami’ty famokafoka’e o mpanivetiveo,

vaho mbe halain-kilala o gegeo?

23 Mibaliha ty amy fañendahakoy,

Hadoako ama’ areo ty añ’ovako ao; hampahafohineko anahareo o entakoo.

24 Amy te nikoike iraho, f’ie nifoneñe;

nahitiko ty tañako,

fe leo raike tsy nañaoñe,

25 fonga nifarie’ areo o fañerekoo,

vaho niambohoa’ areo o endakoo,

26 Aa le izaho ka ty hiankahake

ami’ty hankà’areo,

vaho ho kizaheko t’ie mianifañe,

27 ie vovoa’ ty havoro­mbeloñe

hoe te tiobey,

naho iambovoa’ ty hankàñe

manahake te talio,

ie iambotraha’ ty haloviloviañe

naho ty halonjerañe,

28 Hikaik’ ahy amy zao iereo

fe hamoeako

hitsoek’ ahy fa tsy hahaoniñe.

29 Amy t’ie nalain-kilala, tsy nijoboñe

ty fañeveñañe am’ Iehovà,

30 nitambolitritrie’ iereo ty fañerèko,

vaho tsinambolitio’ iereo o fitrevokoo,

31 Aa le hagedra’ iareo

ty voka’ o sata’ iareoo,

naho ho etsa-kilily,

32 Ie mañoho-doza amo tren­trañeo

t’ie miamboho, naho

mandrotsake o dagolao t’ie midada.

33 Fe ho soa fimoneñe

ty mitsendreñe ahiko

vaho hiaiñ’añ’oleñañe,

tsy ho hemban-kankàñe.