1 Tiva am’ Iehovà ty fandanjàñe vìlañe,

fe no’e ty vato to.

2 Ie avy ty firengeañe,

pok’eo ka ty hasalarañe;

fe mpiamo mpirekeo ty hihitse.

3 Miaolo o vantañeo ty havañona’e,

fe mampianto i lahiaga

ty fikelokeloha’e.

4 Tsy vente’e añ’andron-kankàñe ty vara,

fe mamotsotse an-kavilasy

ty havantañañe.

5 Mampahity ty lala’ o malio tahiñeo

ty havantaña’e,

fe mikorovok’ ami’ty haratia’e

o lo-tserekeo.

6 Mañaha ty vañoñe i havantaña’ey,

fe hamahotse o piaroteñeo

ty fatiti’iareo.

7 Ie mate ty lo-tsereke,

momoke o fañiria’eo,

vaho voroke ty fitamà’ i tsy mahitiy.

8 Votsorañe amy falovilovia’ey ty vantañe,

le mb’eo handimbe aze ty lo-tsereke.

9 Mijoy ty rañe’e am-bava’e ty tsi-aman-Kàke,

fe hilala ty mañaha o vañoñeo.

10 Ie miraorao o vantañeo,

mirebeke ty rova;

ie momoke ty lo-tsereke,

inay ty firiñariñan-kobaiñe.

11 Mionjoñe ty rova tatae’ o vañoñeo,

fe rotsahe’ ty vava’ o lo-tserekeo.

12 Po-hilala ty maniva ondaty,

fe mianjiñe t’indaty mahilala.

13 Mb’eo mb’eo i mpitolom-bolañey

mampiborake ty nitangogoeñe,

fe mahakafi-draha ty migahiñe.

14 Ie po-panoroañe, mihotrake o borizañeo,

fe fandreketañe t’ie mitolom-pisafiry.

15 Toe hisotry ty miantoke

songon’ ambahiny,

fe soa fiaro ty malai-mañoho-pitàñe.

16 Asieñe ty rakemba matarike,

vaho manontom-bara ty fanalolahy.

17 Mañasoa ty tro’e t’indaty matarike,

fe mijoy ty vata’e ty mpampisoañe.

18 Mikarama hakoahañe ty lo-tsereke,

fe ho soa tambe

ty mitongy havantañañe.

19 Ho veloñe ty mifahatse

an-kavañonañe,

fe hihomake ty mañean-karatiañe.

20 Tiva am’ Iehovà

ty mengok’ an-troke,

fe ifalea’e ty mañavelo an-kahiti’e.

21 Tsy mikalafo te*Heb: ama’e ty tañako! tsy ho po-lafa

ty lo-tsereke,

fe ho haha ty tiri’ o vantañeo.

22 Hoe bange volamena

ami’ty oron-dambo

ty ampela montramontra

tsy mahalie-batañe.

23 Ty hasoa avao ty fisalala’ o vañoñeo;

fe haviñerañe ty fitamà’ i lahiaga.

24 Eo ty fampiparaitahañe

mbe mampitombo avao;

eo ty matity ami’ty mañeva,

f’ie ho rarake.

25 Hiraorao t’indaty matarike,

vaho ho tondrahañe ka ty manondrake.

26 Honjire’ ondatio ty matity ampemba,

fe fitahiañe ty ho añambone’

i mandetak’ azey.

27 Osiheñe ty mitsoe-kasoa,

fe ami’ty mipay haratiañe,

izay ty ho zoe’e.

28 Hihotrake ty miato vara,

fe handrevake hoe ravets-atae

maindoñe o vantañeo.

29 Handova tioke ty mpanolo-tsotry

añ’anjomba’e,

le hitoroñe ty mahihi-troke ty dagola.

30 Hataen-kaveloñe ty vokare’ o vantañeo,

vaho mpandrekets’arofo ty mahihitse.

31 Kanao ho tambezeñe an-tane atoy

o vantañeo,

àntsake ty tsereheñe naho o piaroteñeo.