1 Mandranjy ty akiba’e

ty rakemba mahihitse,

fe arotsa’ ty minè an-taña’e ty aze.

2 Mañeveñe am’ Iehovà

ty mañavelo an-kahiti’e,

fe manirika aze ty mengok’ amo lala’eo.

3 Am-bava’ i dagola ty kobay

ho an-dambosi’e,

fe mañaro ty mahihitse o fivimbi’eo.

4 Ie tsy eo añombe, koake ty riha’e;

Toe mahavokatse ty haozaran’ añombe.

5 Tsy mandañitse ty mpitalily migahiñe,

fe mikofòke habodiake

ty mpitarom-bande.

6 Mipay hihitse ty mpanivetive

fa tsy mahatrea,

fe mora ami’ty mahafohiñe

ty hitendreke hilala.

7 Mihankaña ami’ty fiatrefañe i minèñey,

fa tsy ho oni’o eo ty soñy mahilala.

8 Ty hihi’ i mahilalay :

le t’ie mahatsikarake ty lia’e,

fe hakalitahañe ty hagegean-dagola.

9 Sirikae’ ty minèñe ty fisolohoañe,

fe amo vañoñeo ty fiharoan-drehake.

10 Fohi’ ty troke ty hafaim-piai’e,

vaho tsy itraofa’ ty ambahiny

ty firebeha’e.

11 Harotsake ty akiba’ i rati-tserekey,

fe hiraorao ty kivoho’ o vañoñeo.

12 Eo ty làlañe atao’ ondaty ho vantañe,

f’ie migodañe mb’an-kavilasy ao*Rzs 16:25.

13 Mikoretse ty arofo

ndra t’ie miankahake,

vaho migadoñ’ an-kontoke ty rebeke.

14 Atsake o sata’eo ty midisa-voly,

fe mahaeneñe t’indaty soa i azey.

15 Kila iantofa’ ty seretse,

fe tsakorè’ ty hendre o lia’eo.

16 Mihilotse ty mahihitse

vaho iholiara’e ty raty,

fe mijikajika naho mitsidaredare

ty dagola.

17 Manao raha tsi-roe-tafa-toe

ty mora boseke,

vaho tsambolitioheñe ty mikinia.

18 Mandova hagegeañe ty seretse,

fe sabakaen-kilala ty hendre.

19 Hidrakadrakak’ anatrefa’ ty soa ty raty,

naho an-dalambei’ o vantañeo ty tsereheñe.

20 Heje’ ty rañe’e i rarakey,

fe maro ty mikoko i mpañalealey.

21 Aman-tahiñe ty manirìka ondaty,

haha ka ty matarike amo poi’eo.

22 Tsy hidridrike hao ty mpikilily?

Fe fiferenaiñañe naho hatò

ro amo misafiry hasoao.

23 Amam-bokatse ze hene fitoloñañe,

fe mahararake ty soñy mikofofoake.

24 Sabaka’ o mahihitseo ty vara’e;

fe hagegeañe ty hanè’ o dagolao.

25 Mpañaha aiñe ty mpitaroñe mahity,

fe mpikitro-draha ty mikofò-bande.

26 Fañarovañe fatratse ty fañeveñañe

am’ Iehovà,

vaho amam-pipalirañe o ana’eo.

27 Havelo ­migoangoañe ty fañeveñañe

am’ Iehovà,

toe fampiariañe o fandri-kakoromahañeo.

28 Enge’ i mpanjakay ty borizañe maro;

ampoheke ka ty ana-donake

tsy ama’ ondaty.

29 Àmpon-kilala ty malaon-kaviñerañe;

fe mpañonjo hagegeañe ty mora boseke.

30 Mahavelon-tsandriñe ty arofo hendre,

fe mahavoroke taolañe ty farahy.

31 Mitera i Andrianamboatse aze

ty mamorekeke o rarakeo,

fe miasy Aze ty mitretre mahatra.

32 Arotsa’ ty fandilara’e ty rati-tsereke,

fe am-pitsalohañe ty vañoñe te mivetrake.

33 Mimoneñe añ’arofo’ i mahilalay

ty hihitse,

fe abentabenta’ o dagolao ty antrok’ ao.

34 Mañonjom-pifeheañe ty havañonañe,

fe mañìnje o borizañeo ty hakeo.

35 Osihe’ ty mpanjaka ty mpitoroñe

mitoloñe an-kihitse,

fe atretrè’e an-kaviñerañe

ty manao hasalarañe.