1 A ondatio ty fisafirin-arofo,

fe a Iehovà ty famaleam-pameleke.

2 Malio am-pihaino’ ondaty

ze hene sata’e,

fa mpandanja arofo t’Iehovà.

3 Apoho am’ Iehovà o fitoloña’oo,

le hijadoñe o safiri’oo.

4 Kila tsinene’ Iehovà

ho ami’ty fanoa’e,

ndra o lo-tserekeo ho an-tsan-kòheke.

5 Fonga tiva am’ Iehovà o mpibohabohao,

tsy kalafo t’ie tsy ho po-lafa.

6 Mampijebañe fiolañe

ty fiferenaiñañe naho ty hatò,

Fisitahañe ami’ty raty ty fañeveñañe am’ Iehovà.

7 Ie no’ Iehovà ty sata’ ondaty,

le hampanintsiñe’e o rafelahi’eo.

8 Hàmake ty kedekede an-kavañonañe,

ta ty tambe bey tsy an-kahiti’e.

9 Misafiry ty lala’e ty tro’ ondaty,

fe tehafe’ Iehovà o lia’eo.

10 Fañentoan’ Añahare

ty am-pivimbi’ i mpanjakay;

tsy hiota ty falie’e te mizaka.

11 A Iehovà o vatom-pandanja

naho balantsio;

hene sata’e o vato an-koroñeo.

12 Tiva amo mpanjakao ty mpanao raty,

fa norizañe an-kahiti’e i fiambesa’ey.

13 Mahafale o mpanjakao

ty fivimby mahity,

vaho isohe’e ty misaontsy

an-kavantañañe.

14 Mpisangitrike fikoromahañe

ty haviñeram-panjaka,

fe hampanintsiñe aze

t’indaty mahihitse.

15 Haveloñe ty filoeloean-daharam-panjaka,

naho hoe rahoñe minday oran-dohataoñe

ty fañisoha’e.

16 Soa hatò ty ahazoan-kihitse

ta ty volamena! naho ty hijobon-kilala

te ami’ty volafoty.

17 Ty ihankaña’e haratiañe

ro lala’ o vantañeo,

vaho mahavontitits’ aiñe

ty mahambeñe i lia’ey.

18 Miaolo ty firotsahañe

ty firengevohañe,

vaho iaoloa’ ty troke miebotsebotse

ty fihotrahañe.

19 Hàmake te mpiamo rarake

an-troke mirekeo,

ta te mitraok’ amo mifanjara

o kinopake am-pibohabohañeo.

20 Hene hanjo hasoa ze mañaoñe i tsaray,

haha ty miato am’ Iehovà.

21 Atao mahatsikarake ty mahihitse añ’arofo;

mahafañosike fañòhañe ty saontsy malea.

22 Ranon-kavelo migoangoañe ty hilala

amy ze manañ’aze;

fe hagegeañe ty fandafàñe i dagola.

23 Mañòke ty falie’ i mahihitsey ty tro’e,

vaho tompea’e fañòhañe o fivimbi’eo.

24 Hoe papy tantele

ty saontsy mampanintsy,

mamy añ’arofo naho

mampijangan-taolañe.

25 Eo ty lalañe atao’ t’indaty ho vantañe,

fe fikoromahañe ty figadoña’e*Rzs 14:12.

26 Mifanehake ho aze ty fiai’ ondaty,

vaho azim-palie’e.

27 Mikabo-draha t’i Beliale1, afo misolebotse ty am-pivimbi’e ao.

28 Mampiboele hotakotake

t’indaty mengoke,

mampifanarake mpiatehena ty bisibisike.

29 Risihe’ t’indaty piaroteñe ty rañe’e,

vaho kozozote’e mb’an-dalan-tsy soa.

30 Mikinia raha mengoke

ty mpipie maso,

vaho mampifetsake haratiañe

ty mpimontso.

31 Sabakan-engeñe ty maroi-foty;

oniñe an-dalan-kavañonañe eo.

32 Lombolombo ty fanalolahy

ty malaon-kaviñerañe,

vaho ambone’ ty mpitavañe rova ty mahafeleke ty tro’e.

33 Tora-tsato-piso am-pe,

Iehovà avao ro Mpanampake.