1 Ry Iehovà, atretréo o miatreatre ahio, mialia amo mifandrapak’ amakoo.

2 Andrambeso fikalan-defoñe

naho fikala-meso,

le miongaha hañolotse ahy.

3 Apontsoaño ty lefo’o naho i fekon’ aliy;

hatreatrè’o o mañoridañ’ahikoo

saontsio ami’ty fiaiko ty hoe :

Izaho ro fandrombahañe azo.

4 Salatse naho po-asiñe

o mipay ty fiaikoo;

ampiambohò vaho ampimeñaro

o mikilily hijoy ahikoo.

5 Ano ho kafo’e aolon-tioke eo,

le hatao’ i anjeli’ Iehovày soike.

6 Ano haieñe naho halamañe

ty fombà’ iareo,

horidañe’ i anjeli’ Iehovày.

7 Tsy aman-taly ty nañetaha’iareo harato,

tsy vente’e ty nihalien-koboñe ty fiaiko,

8 Hivovò ama’e abey ty firotsahañe,

le ho tsepahe’ i harato naeta’ey;

vaho amy firotsahañey ty hivarinjonjoha’e.

9 Hirebek’ am’ Iehovà ty fiaiko,

hirenge amy fandrombaha’ey.

10 Hanao ty hoe iaby o taolakoo:

Ry Iehovà ia ty hambañ’ Ama’o?

Mpandrombake o rarakeo

amy maozatse te ama’ey;

Eka, ty poie’e naho ty mpisotry

amy mpamaok’ azey.

11 Mitroatse o mpitalily tsivokatseo,

mañody ahy an-draha amoeako.

12 Valè’ iereo raty ty soa;

mampioremeñe ty fiaiko.

13 Aa naho izaho, nisaron-gony

te natindry iereo,

nirè-batañ’aman-dilitse,

fe nimpoly an-troko i halalikoy.

14 Nandenako hoe t’ie nirañeko ndra nirahalahiko; nidròdreke an-kontoke manahake te nandala rene.

15 Fe nirebeke iereo t’ie nikoletra, nifañosoñe,

nifanontoñe hiatreatre ahy

o mpamofoke alik’ amakoo,

nandrimitse ahy avao tsy nitroatse;

16 hoe mpiteratera tsi-aman-Kake

an-tsabadidake,

ty ikodrita’ iareo nife;

17 O Talè, pak’ ombia te hisamba avao?

Avotsoro ami’ty fandrotsaha’ iareo ty troko; amo lionao ty fiaiko.

18 Andriañeko am-pivori-bey ao;

mijejo azo am-balobohòk’ ao.

19 Lonike tsy hirebeha’ o rafelahiko tsy amam-poto’eo;

tsy hipie maso amako o malaiñe ahy

tsy aman-tali’eo.

20 Tsy mivolam-pilongoañe iereo,

te mone mikilily volam-pitake

amo mianjiñe an-tane atoio.

21 Eka ivañavaña’ iereo vava

manao ty hoe :

Hiy! Hiy! fa nitrea’ o maso’aio.

22 Nivazoho’o

ry Iehovà, ko mianjiñe;

ry Talè, ko mitòtse amako

23 Mitsekafa, mivañona hañomea’o to ! Imbao i ahikoy ry Andrianañahareko

naho Talèko.

24 Izakao ry Iehovà Andrianañahareko

ty amy havantaña’oy;

le ko apo’o hirebeha’ iereo.

25 Ko ado’o hanoe’e ty hoe

an-troke:

Hiry! ty fañiria’ay! ndra ty hoe :

Fa nabea’ay.

26 Atraofo salareñe naho meñareñe o mitohàk’ amy haemberakoio;

ampisikinen-kameñarañe naho inje

o mirengèvok’ amakoo.

27 Hipoñak’ an-drebeke naho

handia-taroba

o mifale ami’ty halio tahikoo;

hitolom-panao ty hoe:

Onjono t’Iehovà,

ry mpifale amy fanintsiña’ i mpitoro’eiy.

28 Hitaroñe ty havantaña’o ty lelako,

ty enge’o lomoñandro.