1 Nitsara t’Iehovà Andrianañahare

Tsitongerè, nikoike ty tane toy

boak’ am-panjiriha’ i àndroy

sikal’ am-pitsofora’e añe.

2 Hirik’e Tsiône ao,

ty hafoniran-kamotsotsoreñe,

ty fireandreañan’ Añahare.

3 Mb’ etoy i Andrianañaharen-tikañey,

ie tsy hianjiñe;

mamorototo aolo’e ty afo,

iarisehoa’ ty tangololahy.

4 Kanjie’e mb’andikerañe añ’abo eñe,

naho mb’an-tane atoy

hizaka’e ondati’eo:

5 Atontono amako o norokoo, o nifañina amako an-tsoroñeo.

6 Mitsey ty havantaña’e o likerañeo;

amy te Ie ro Andrianañahare,

Ie ty Mpizaka. Selà

7 Mijanjiña ry ondatiko,

le hivolan-dRaho;

Ry Israeleo, hisesehako,

Izaho ro Andrianañahare, Andrianañahare’o.

8 Tsy o fisoroña’oo ro añendahako azo,

ie añatrefako eo nainai’e

o enga fañoroa’oo.

9 Tsy ho rambeseko boak’añ’akiba’o ao

ty añombelahy,

ndra hirik’an-golobo’o ao ty oselahy.

10 Amy te hene ahiko ze biby añ’ala ao,

naho ty añombe am-bohits’ arivo.

11 Haiko iaby o voroñe am-bohitseo,

Fonga ahiko ze misitsitse an-kivok’ ao.

12 Naho nikerè Raho, tsy ho nivolañe,

amy te Ahiko ty voatse toy,

naho ty halifora’e.

13 Hihinañako hao ty nofo’ o añombeo?

hinomako hao ty lio’ o oselahio?

14 Engao aman’ Añahare

ty sorom-pañandriañañe,

naho avaho amy Andindimoneñey

o nifantà’oo.

15 Le koiho Raho añ’andro

maha-an-koheke;

ho hahako irehe, vaho hiasia’o.

16 Fa hoe t’i ­Andrianañahare

amo tsivokatseo

Ino ty anoñona’o o fandiliakoo?

vaho endese’o am-bava’o ao i fañinakoy?

17 Inao t’ie malain-dilo,

naho afetsa’o amboho’o ao o entakoo.

18 Ie manjo-mpikizo irehe, le no’o,

vaho ireketa’o o karapiloo.

19 Avotso’o an-kaloloañe ty falie’o,

vaho mikilily fitake ty famele’o.

20 Mitoboke irehe vaho mifosa rahalahy;

dramote’o ty anan-drene’o.

21 Ie anoe’o izay, hijomohoñe hao Raho?

natao’o ho hambañe ama’o hao,

toe endahako,

vaho alahako añatrefam-pihaino’o eo

o entako ty ama’oo.

22 Aa le ereñereo zao,

ry mpandikok’ an’Andrianañahareo

kera ho rangodrangoteko,

ihe tsy amam-pañaha.

23 Mañonjoñ’ Ahy ty mañenga

sorom-pañandriañañe;

vaho hampalangeseko

amy mamantañe i fañaveloa’eiy

ty fandrombahan’ Añahare.