1 Mitamà azo e Tsiône ao ty sabo,

ry Andrianañahare:

vaho ama’o ty ifantàñe.

2 O ry Mpijanjin-kalaly,

mitontoñe ama’o ze kila sandriñe.

3 Maozatse te amako o sata tsi-vokatseo,

f’ie ty hanao fijebañañe ho amo fandilara’aio.

4 Haha t’indaty joboñe’o

vaho ampitotohe’o

himoneñe an-kiririsa’o ao:

ho heneke ty hasoa añ’akiba’o ao zahay,

an-kivoho’o miavake ao.

5 Fitoloñañe mampañeveñe

ro anoiña’o anay an-kavantañañe,

ry Andrianañaharem-

pandrombahañe anay,

Ihe ro fatokisa’ ze olon-tane iaby,

naho o an-driake tsietoitaneo.

6 Ie ami’ty haozara’o ro nampijadoñe

o vohitse misadia hafatrarañeo;

7 Ihe ro mampitsiñe ty fitroña’ o riakeo, ty figodobo’ o kinerakeo,

vaho ty fivoamboaña’ o borizañeo.

8 Mampañeveñe o mpimoneñe añ’olon-taneo o vilo’oo; vaho ampirebehe’o

ty fionjona’ o maraiñeo naho o haleñeo.

9 Tilihe’o ty tane toy

naho tondraha’o rano:

vaho fanjàka ty nampamokara’o aze

amy sakan’Añahare miheneheney;

nañalankaña’o *Ndra ze atao vare, tsako, bajiry n. t. i. ampemba,

izay ty fañajaria’o i taney.

10 Anoe’o lonte soa o hàto’eo, amàta’o o vavahali’eo:

lotrahe’o ami’ty ereke,

tahie’o ty fitovoa’e.

11 Sabakae’o ami’ty havokara’o ty taoñe,

ampitsopatsopahen-tsolike o oloñolo’oo;

12 Mitsiritsioke o fiandrazañe

am-patrambeio;

vaho misikim-pirebehañe o vohitseo.

13 Misaroñe biby fiandrazeñe o hivokeo,

miravak’ ampemba o vavataneo;

mitreñe an-kaehake le misabo.