1 Mifehe t’Iehovà,

hirebeke ty tane toy,

hifale o tokonose maroo.

2 Ie arikoboñen-drahoñe naho hamoromoroñañe;

havantañañe naho ty hatò ro ioreña’

i fiambesa’ey.

3 Miaolo Aze ty afo, mamorototo

o rafelahi’eo mb’etia mb’eroa.

4 Nihazavae’ o hela’eo ty voatse toy;

niisa’ ty tane toy le nihondrahondra.

5 Nitranake hoe karafo o vohitseo

ami’ty niatrefa’ Iehovà,

añatrefa’ i Talè’ ty tane toy iaby.

6 Mitalily ty havantaña’e o likerañeo,

vaho fonga mahaoniñe ty enge’e ondatio.

7 Hene salatse ze mitoron-tsare sokitse,

o misenge raha kòakeo;

miambanea ama’e ry ndrahare iabio!

8 Nahajanjiñe ty Tsiône le niehake,

nirebeke o anak’ampela Iehodào,

ty amo fizaka’oo ry Iehovà.

9 Amy te Ihe, ry Iehovà,

ro Andindimone’ ty tane toy;

vaho onjoneñe andigiligi’

ze hene ndrahare irehe.

10 Hejeo o haratiañeo ry mpikoko Iehovà; ambena’e ty fiai’ o noro’eo,

avotso’e an-taña’ o lo-tserekeo.

11 Ararake ho a’ o vantañeo ty hazavàñe,

ho a’ o mahity arofoo ty hafaleañe.

12 Mirebeha am’ Iehovà, ry vantañeo,

vaho andriaño i tahina’e masiñey.