1 Andriaño t’Iehovà, ry troko;

ry Iehovà Andrianañahareko,

jabahinake irehe,

asiñe naho volonahetse ro misaroñ’ azo,

2 ihemiholonkon-kazavañe hoe sarimbo;

velare’o hoe tèmetse o likerañeo.

3 Ampandrè’e an-drano ao o faham-batsa’eo, anoe’e sarete’e o rahoñeo,

draidraite’e añ’ ela’ o tiokeo.

4 Anoe’e ira’e o tiokeo,

mpitoro’e o afo mibelañeo.

5 Naore’e amo faha’eo ty tane toy,

soa tsy hasiotse nainai’e donia.

6 Siniki’o hoe saroñe i lalekey;

nijohañe ambone’ o vohitseo ty rano;

7 Nibioñe iereo te trinevo’o,

nibororoñe mb’eo ami’ty fivolan’ ampi’o;

8 Nionjoñe o vohitseo,

nilempotse o vavataneo,

mb’amo toetse tinendre’o ho a iareoo

9 Jinado’o efetse tsy hililara’e;

tsy mone hibalike hañàmpo ty tane toy.

10 Añirahe’e rano migoangoañe

o goledoñeo;

mikararak’ añivo’ o vohitseo;

11 ampinome’ iereo rano

o bibin-kivoke iabio;

afa-karan-drano o borìke lìio.

12 Mimoneñe añ’olo’ iereo eo

o voron-dikerañeo;

mivolañe an-tsinga-katae ey.

13 Tondraha’e hirik’amo efe’e amboneo

o vohitseo;

mahaeneñe ty tane toy

o vokam-pitoloña’eo.

14 Ampitiria’e ahetse o añombeo,

vaho añañe, vale’ ty fitoloña’ ondatio, hampahavokare’e haneñe ty tane,

15 naho divay hampifale ty arofo’ ondaty, naho solike hañamendo ty lahara’e,

vaho mahakama hahavaño ty arofo’e.

16 Enen-drano o hatae’ Iehovào,

o *sedera: hatae mafe mandrevakemendorave’ i Lebanone nambolè’eo,

17 ama’e ao ro anoa’ o voroñeo traño;

naho ty fañaoke, anakao ty akiba’e.

18 Ho a o ose lì-o o vohitse aboo;

fiampiram-panaloke o tevañeo.

19 Nanoe’e fifotoañañe i volañey; apota’ i àndroy ty toem-pitsofora’e.

20 Tinendre’o i ieñey,

mivotrake te haleñe ty fitinga­tingàña’ ze hene biby añ’ala ao.

21 Mitreñe, mitsatsa hena o liona tora’eo,

mipay ty hane’e aman’ Añahare.

22 Ie manjirike i àndroy, mipoliotse iereo vaho mandre an-dakato’e ao.

23 Miavotse mb’am-pitoloña’e mb’eo

ondatio, ampara’ te haleñe.

24 O ry Iehovà, akore ty hamaro’

o fitoloña’oo!

kila nanoe’o an-kihitse;

manitsike ty tane toy o vara’oo.

25 Indroke i riakey, jabajaba mihenehene,

ifamorohotam-biby tsy hay iaheñe—

ty kede naho ty bey.

26 Ama’e ty ionjonan-dakam-bey,

naho i fañaneñe nitsenè’o hihisa aoy.

27 Songa mandiñ’ Azo

hamahana’o haneñ’ an-tsa’e.

28 Anjotsoa’o, le atonto’ iareo,

sokafe’o ty fità’o, vaho

hene ànjan-draha soa.

29 Aeta’o ty lahara’o, le lonjetse iereo;

sintone’o ty kofò’e, le mihomake

mimpoly an-debok’ ao.

30 Irahe’o t’i Arofo’o, mioreñe iereo,

vaho vaoe’o ty tarehe’ ty tane toy.

31 Tsy mb’ia ho modo ty enge’ Iehovà;

ho rebehe’ Iehovà o fitoloña’eo,

32 Mampititititike ty tane toy te vazohoe’e,

mahatoeñe o vohitseo te edrè’e.

33 Ho saboeko t’Iehovà

kanao mbe velon-draho;

ho rengèko an-tsabo t’i Andrianañahare

katao mbe mahakofòke.

34 Toe mamy t‘ie itsakoreakoo,

ifaleako t’Iehovà.

35 Ho mongoreñe an-tane atoy

o mpanan-tahiñeo

le tsy ho eo o lo-tserekeo.

Andriaño t’Iehovà, ry troko.

Treño t’Ià†Halàl’ià: Haleloia; ze atao ty hoe Treño.