1 Sabo’ i Davide

Ry Iehovà, janjiño ty filolohako,

atokilaño mb’amo halalikoo

ty ravembia’o ty amo figahiña’oo naho o havantaña’oo.

2 Ko ampanesefe’o an-jaka ty mpitoro’o;

fa tsi-mbia tsy ho añatrefa’o ty veloñe.

3 Fa nampisòañe ty fiaiko o rafelahio,

nigorè’e an-tane ty haveloko;

nampitoboheñe añ’ieñe ao,

manahake t’ie nilolo ela.

4 Aa le mitsikorak’ amako ty troko;

mioremeñe ty añovako ao.

5 Tiahiko o andro taoloo,

niniheko iaby o fitoloña’oo tsakorèko o satam-pità’oo.

6 Ahitiko mb’ama’o o tañakoo;

limpoañe ty ama’o ty fiaiko hoe tane mivaràkivaràky. Selà

7 Toiño masìka ry Iehovà;

fa mimoremoretse ty troko.

ko aeta’o amako ty lahara’o

hera hanahake o mizotso

mb’an-kaly aoo.

8 Ampitsanoño ahy ty fiferenaiña’o

te maraiñe,

amy te Ihe ro iatoako.

ampandrendreho ty lala hombako,

fa ama’o ty fañonjonañe ty fiaiko.

9 Ihahao amo rafelahikoo,

ry Iehovà; Ihe ro fitsolohako.

10 Anaro ahy ty hanao o satri’oo,

Ihe ro Andrianañahareko;

le ampiaolò ahy an-tane mira

ty Arofo’o soa.

11 Isotrafo amy tahina’oy, ry Iehovà,

afaho amo hasosorañeo,

ty amy havantaña’oy.

12 Aitò amako o rafelahikoo

ty amy fiferenaiña’oy, vaho

fonga rotsaho o mitsibore ty fiaikoo,

fa mpitoro’o iraho.